Aisaia 24 - Nobonob Baibel

Yawe Nug geha wan heeb nauheb, Nug nukka geha wanppan danab ah gumadkku

¹ Yawe Nug genab geha wan atu oh heeb nauhakib daakku. Nug geha wan tappa oɗoɗa, eɗua eɗua ma heeb, wan am geha eɗua, iɗu laanab daakku. Nug geha heeb, danab ah ag oolna, matatun gokkulag.

² Danab ah oh uug amu anidkkulag; laippu laa ii eɗidma. Iitta! Oh ag geha uug amu aoglag. Mana mettak danab, am danab ah hamu, ag oh, uɗat gumak danab, am maɗi nid, ag oh, uɗat gumak ah, am uɗat hak ah hamu, ag oh, keeke aon meeg, laa daden metteb danab, am danab uɗin, keeke ahilagppa daden metteb ele, ag oh, danab men doɗo lon laa eppegppanu aotteb, am danab, laa ag nug eppegppa lon aotteb, ag oh, danab amu oh ag geha haen nau amu anidkkulag. Laippu laa haen amu ii eɗidma. Iitta.

³ Wan geha nauha auta awa, anam nauhakib daakku. Wannu etetuab laippu laa ii daakku bia. Iitta. Oh bia iitta mekkulag. Yawe Nug nai anam mattiom daatte amunu, am anam bekku.

⁴ Wan nug qaɗaietta nauhkku. Ao, wan nug hamu daya nauhkku. Ge, wanppan danab okkai okkai, ag padal mekkulag.

⁵ Wan imuppan danab ah ag heeg, wan imuam Kayaknu neekkakppa dubuttid tak ele daatte. Aɗinu? Ag ɗo dim ii lamidna, ⌊kobol nau digdig henana,⌋ ag Kayak dimettan, nai nuhig tappaeg ne, ag nuhig nug tituana nai qakkak hanhannu Kayak Nug ag ele heppig amu, ag tippalppig.

⁶ Ag anam heppig amunu, eheɗ laa awaknu anak waappa dayaknu nai wan imu tone, wan aakku nauhtte. Danab ah ameg naɗi oh ag ahilag eheɗ haknu nob nau maoglagoitte. Ao, diig amunu wan imuppan danab ah oh ag aab keeke ewe iitta mette bia padal mena, danab ah ameg nakokib daaglag

⁷ Grep meu guɗ oh qaɗaiedappeg, muɗi grep ele bunaɗkku. Am danab ah ag wain, grep lebuppan hak, ag amu lakkulagnu gamalag ahatte, danab ah amu ag amunu oolag doyeb, gaan oiglag.

⁸ Ag gamalag ahak muttub qena, tambarinppa musik iinab hemana. Laa ag gamag ahak huanak dootteb ele amu, ahilag muttub qak iinab daama. Harp-ppanu musik gamag ahak ele amu, amu ele iitta mekku.

⁹ Ag baula oo gamag ahak doon, wain lanana, ahi ii ettamna. ⌊Uug ahilkad amu heeb,⌋ le ɠagattag, bia ag latteb amu, ag oɗelagppa ubuhi ii doomna. Iitta. Ag ninig dooglag.

¹⁰ Aab okkai ⌊anen anen⌋ amu hele-ettak daappeg, ⌊danab ah laippu laippu ii mauhppig, appa lag laippu laippu ii nauhak daatteb, ag appa daan baɗan⌋ heppeg, laulkad od oh manak qak daaglag.

¹¹ Laa amu, wain, danab ah ag lakkulagnu am iitta mekku amunu, aab okkainu ib ohppa ag hippaidna daanna, wain lakkulagnu ekkulag. Uug naunab wan ohppa beeb, oo gamag ahak eɗua, oo uug doyak daakku. Laa oo gamag ahak iinab dooma.

¹² ⌊Kekeɗ heppeg,⌋ aab okkai ⌊anen anen⌋ nauha aota aokku. Ag aɗnu od okkai amu heppeg na qa, aoɗakib daakku.

¹³ Amu uug amu aakkuib geha wanppan danab ah diig oh dilagppa beeb, danab ah oɗo yaak laib laibib daan oiglag. Amuam haen danab ag ad olip meu aonna, olip meu laib laib ii aoeg, ad attan daatteb, anamib daaglag. O ag grep meu laippu laippu grep dadppa meu aonna uuppig daatteb bia daaglag.

Kayak, Nug nai doya mala hettoɗia epeɗia elele mettaknu diig daatte amu, ig Nug humidtu

¹⁴ Danab ah ⌊uug awak haenppa ag uugppa ii mauhppig daatteb ele,⌋ ag baalag okkaippa ekkulag. Ag oo gamag ahak naɗi doon, ag huana ekkulag. Danab ah amu, ag qaban uɗitteppanu ele, ag Yawe Nug dagom onig ɠagattag elenu qalan mattiglag.

¹⁵ Ag anam hekkulag amunu, danab ah laih aam bedeppa daatteb amu, ag Yawe binag amahlak oppiaawak ele mekkulag. Ao, ag danab ah aam nodeppa daatteb, ag oh Yawe binag mekkulag. Yawe Nug am Israel dilag Kayak.

¹⁶ Danab ah aab umanab daatteb, wan ukka batakppa amu, ag gamag ahak doon, ahi edappeg doognig. Ahi ahilag am inam. “Ig Laa, Nug Genab Tutukku Hak Kobol Diig amu, ig Nug binag amahlak oppiaawak ele metu!” Ag anam ahi ettaglag. Ag anam ahi ettaglag, amge ⌊gemu amu, da uug bekkunu doottem amunu,⌋ da inam attem. “Dahilnu am gadonnab gadon. Da oolppa uug okkainab doyeye, da hamu iitta mekkulnu hettem. Ge! Da oolppa uug okkainab doyeye, da hamu iitta mekkulnu hettem. Da eheɗ hak danab, ag kobol nau henana, lailkad hambuppualatteg anadttem. Ge! Ag laa eheɗnab hambuppualadnana, eheɗnab hattegeg anadttem,” awe attem.

¹⁷ ⌊Gadonnab gadon,⌋ wanppan danab ah ag haen naunab nau aoglag. Ag baɗak eheɗ nau dooglag. Ag danab ag doɗ aoglagnu moɗ hayag aoeg dayeye, doɗ ag oinna, moɗ hayag amuppa nona daaegeg aotteb bia, ag nau anam aoglag. O ag doɗ uhuippa tetteb bia, amubia haen nau amu ahilagnu anamnab ag aɗualadkkunu bekku.

¹⁸ Am inam bekku. Danab nug haen naunu nai doya, nug haen nau amu ii aomanu nug oolkku amu, geha nug moɗ hayagppa nokku. Aria, ⌊haen amuppa⌋ laa nug moɗ hayagppanu ba oola ukka amu, geha pelemppa tekku. Amu haen amuppa hab od oh geha matuleb, le gokkaɗa, wanppa neebeb, geha wannu ukku uɗalkku.

¹⁹ Wan ⌊eheɗ naunab nau uɗalala,⌋ panakku. Wan paneb ukkeb, oɗe okkai okkai daakku. Wan eheɗ nau hahaɗkku.

²⁰ Wan nug geha ukka uɗikku, danab nug le ɠagattag lana, spak ma oitte, amubia uɗalkku. O ulah huan he, lag uɗaltte, wan amubia uɗalkku. Hak nau, amuam danab ah dilag hipunin amu, eheɗ hak amunu uug am naunab, wan nug geha maokkunu elele iitta amunu, wan nug geha na qewowa, eɗua ahakkun elele iitta.

²¹ Yawe Nug haen amuppa hab daup, ⌊ameg laa Kayak ii dim lamidtteb⌋, am wanppan king, ⌊dada hak danab daatteb ele amu,⌋ Nug ag oh bu madakku.

²² Yawe Nug geha wanppan king aɗi oh qagmaatta, maniguittakppa maniguadkku. Ag danab maniguittak nau gatatu eleppa daatte, amubia maatteb daaglag. Ao, ag maniguittak anam daappeg, haen nakok elab ukkeb, ahilag nob awak haen ana beeb, nob nau madakku.

²³ Yawe Nukka Ɠagattag Oh Ele, Nug uɗia, Sion qaukoppa Jerusalem appa, danab ah nuhikkud dilag ikki danab noolagppa danab ah gumattebeb, Nuhig binag amahlak oppiaawak ele am miagib daakku. Anam amunu, aamnu amahlak, kalamnu amahlak ele am geha keeke hamu bia daakku. Aam o kalam danab daalo, am nug uɗa nelo.