Aisaia 23 - Nobonob Baibel

Aab okkai Tairnu nai

¹ Nai meunab ele Tair aab okkaippanu Yawe he, Aisaia doyom ele am iikku. Ag Tarsis dilag uubnu uɗat nid, boskru aɗi, ag gayeg! Aɗinu? Saiprus danab ag mattieg dooppig, amubia ⌊kekeɗ ag uɗin,⌋ aab Tair ⌊heeg,⌋ nauha autanab awom. Aab amu, lag nuhigppa daappig, uub eeɗaknu aben ele amu, keeke amu oh am loppaɗakib daatte.

² Ag Ponisia danab ah yu ihippa daatteb, amu ag danab ag keeke laihnu awa dadennu mak danab, Saidon daatteb ele amu, ag oh toettan dayeg! Ahilkad yuppa oiyak danab ag yu qaɗeppa umanab wanana,

³ ag yu digdigppa oitteb. Ag oinna, ahilkad uubppan danab ag Isip wanppa gona, ee aeg aon uɗieg, ag mena men doɗo aotteb. Ao, ahilkad uubppan danab ag laih Nil le daugppanu ee meu aon uɗieg, ⌊ag mena, men doɗo aotteb⌋. Ahilag uubppan danab ag anam aon uɗieg, ag am wan atu ohppa keeke laihnu awa dadennu mak danab anuqak beppig daatteb.

⁴ Amge aab Saidon, na am aab aɗ ɠagattagnab ele yu ihippa daattem ele amu, na uɗan naɗ! Aɗinu? Saidon, na am ah laa nug nid iitta, hamu daatte, na amubia daattem. Nahipad danab dilag uub, uub amu ag am yu bekkod, aɗekkud bia amu, ag yu qaɗeppa appa ii oitteb amunu, yu nug ah daalo, nug inam alo. “Gadonnab gadon, nid naunau dahilad oh padal meeg, da ah nid menukkunu guittak ii doyom bia daattem. Gede, da bekkalad iitta amunu, da atognoatti, ena ii meppig. Da aɗelad iitta amunu, da atognoatti, ena ii meppig. Da hamu iikku daattem,” awa alo.

⁵ Isip danab ag haen keeke imu aab okkai Tair, nuhigppa bekku amu, ag nai amu doon, ag oo doyak eheɗ naunab nau dooglag.

⁶ Ag Tair danab ah ag gona Tarsis ukkeg! Ao, ag ⌊Tairnu⌋ nudppan danab ah, ag oolag doyeb gayeg!

⁷ Keeke attemnab Tair aab okkaippa beum? Danab amunu doya, ooppa genab dookkunu am uug nau ele. Aab okkai amuam anukkanunab; am aab okkai amunu danab ah ag oh am gamalag ahehe, muttub qeppig. Anukka aab okkai amuppan danab ah ag ahilkad danab laala ag ahan, wan laalappa gona, ag tuɗidna, aab okkai bau kuɗum buuadappig. Amge aɗinu gemu aab okkai amu nug nauhom daatte?

⁸ Tair ⌊am aab anuqak dayom amunu,⌋ appan danab ag heeg, laa king bia daappig. Tair danab ag keeke laihnu awa dadennu mak danab amu, ag king bekkod, ⌊keeke elelenab ele⌋ bia daatteb. Ao, Tair danab ag keeke laihnu awa dadennu mak danab, amu wan atu oh danab ah ag Tair danab ah dilagnu ag am binalag okkai ele doyadtteb. ⌊Anam amunu,⌋ laa nug ⌊kekeɗ ag⌋ Tair heppeg nauhkkunu maittak awom ele am aun?

⁹ Yawe Nukka Ɠagattag Oh Ele, Nug nauhak amu bekkunu maittak awom. Maittak awom am, Taia danab dilagnu, danab ah laa ag ahilagnu, “Ag binag amahlak oppiaawak ele,” dootteb amu, Nug ag nena qeppeg, laa ag ahilagnu, ag am keeke hamu, dooglagnu heum. Ao, Nug huu laa, Taia, danab ah ahilagnu, ag onilag ele dootteb amu, Nug ag uɗa nak doon oiglagnu heum.

¹⁰ Ag danab ah Tarsis daatteb ele amu, ⌊Tair nauhom,⌋ uub eeɗaknu aben appa ii daatte amunu, ⌊ag gemu appa ahilkad uub eeɗadna, keeke maadppeg, daden meppeg, men doɗo aoglagnu⌋ elele iitta amunu, ag ahan, Isip danab le Nil daugppa wan buutteb bia, ag ahilag wan buun, ee aweg!

¹¹ Yawe Nug yu qaɗeppa eppeg humom daye, wan oh uɗaltteb. Nug ⌊kekeɗ ag⌋ Ponisia, ⌊amuam Tair Saidon aɗi, ag amu⌋ dilag aab aɗ ɠagattagnab ele hadappeg nauhkkulagnunab aum.

¹² Yawe Nug inam aum. “Saidon danab ah, ag baula gamag ahak doon, muttub ii qemana. Ag ah makkun laa, guittak okkai awom bia daatteb. Ag ahan, Saiprus nudppa gokkulagtai, amge ag gona, appa ele, geha ag ena, elele ii daamna. Iitta. Ag maɗoɗ ii anidmana,” awa aum.

¹³ ⌊O Ponisia danab ah, ag Yawe Nug aɗi bekkunu maittak aotte ele amu, keeke amu bette anidkkulagnu⌋ ag neegna, Babilon dilag wan antteg! Appa danab ah qainqainib oitteb. ⌊Aɗinu? Yawe dabmeum bia⌋ Asiria ag ahan heeg, Kaldia wan am nauhakib daatte. Am ai nau, doɗ nau ele dilag aben aakku daatte. Asiria ag Kaldia dilag aab laala aɗ ele, ag aab amu eɗadkkulagnu ag aɗ dimittim lag attan ta ukkak hattana, appanu eɗadppig. Asiria anam heeg ukke, ag Kaldia dilag king laug, danab okkai laulkad ena ena ele, ag lag amu ohppanu keeke oh akkan goppig. Ag wan amu aakku heeg nauhom daatte.

¹⁴ Danab ag Tarsis dilag uubnu uɗat nid, boskru aɗi, ag oolag doyeb gayeg! Aɗinu? Aab aɗ ɠagattagnab ele ahilag amu, nug nauha autanab awom.

¹⁵ Haen keeke amu beeb, danab ah ag maɗ 70 keeke anam aab okkai Tairnu geha daulag atikku. Amuam laa, nug king daakkunu haen elele bia. Haen maɗ 70 amu maleb, aria aab Tair nug ahi laa ippunigtte bia hekku. Ahi amuam ib baag ah laanu ahi. Ahi amu, ⌊am danab dilag dabmak nauppanuib⌋ am inam daatte.

¹⁶ “Ib baag ah, ⌊na kaino me,⌋ danab ag nahipnu daulag atiom amunu, na danab ag eɗun nahipnu dabmekkulagnu henana, na aab okkai ooppa ahan, miag atiak oinna, harp elelenab qenana, ahi kuɗum ele eɗualatte!”

¹⁷ Am inam bekku. Haen maɗ 70 maleb, Yawe Nug geha Tairnu dabma heeb, aab okkai amu eɗua beeb, appan danab ah ag keeke laihnu awa dadennu mak danab ah eɗun daan, wan atu ohppa uɗat amu hekkulagnu appan danab ah eeɗadkkulag. Ib baag ah danab nuhigppa uɗiglagnu eeɗadtte, amubia.

¹⁸ Amge Tair nug men doɗo aokku oh, am geha nukka nuhig qagmeeb ii daama. Aɗinu? Geha keeke amu oh Yawe nuhig keeke daaglag. Amu Yawenu danab ah ag geha keeke oh Tair qagmekku amu aoglag. Aon am, geha ag ee kuɗumnab lakkulagnu ele daanna, geha ag lamen ena ena ele aon mekkulag.