Aisaia 22 - Nobonob Baibel

Propet nai Jerusalemnu

¹ Nai meunab ele Jerusalemnu Yawe he, ⌊Aisaia⌋ doyom ele am iikku. Jerusalem danab ah, ag attem hena, ag ahilag lag koɗokko uɗem ukkakppa teppig daatteb?

² Ag Jerusalem danab ah, ag muttub qenana hetteb. Ao, ag amu henana, ag gamag ahak nau huanaknab hetteb. ⌊Amge aɗinu ag anam hetteb? Ag ahilkad daup, ahilkad okkai ele ag pehettak atognoadppigte? Iitta!⌋ Ahilkad danab mauhppig amu, ag ban henan qep elabppa ii mauhppig. Ge, ag ban henana, kekeɗ eppelagppa ii mauhppig.

³ Ahilkad okkai oh ag laippu oolppig. Ao, ag umanab oolna goppig. Jerusalem danab ah, ahilkad oola ukkak danab ag ooleg, kekeɗ ag oh laippu aɗalatteg, ag ag eppelagppa daappig. Ao, kekeɗ ag lat doɗo laippu ii ena, ag aɗualadna, diin goppig.

⁴ ⌊Uug amu dahilad danab ah dilagppa anam beum, amge laa naunab ele bekku⌋ amunu, da attem. “Da oo doyak okkai, mua ele doye gayeye daappi, amel leb mua ele na, amel mua qeebeb daakkul amunu, ag da aib neekkiɗppig! Dahilad danab ah ag nauhkkulag; ag ena iinab daaglag amunu, ag heppeg, da ool mekkunu aib ool aoppig!” Da anam awe attem.

⁵ Aɗinu ⌊da anam doyeye daakkul⌋? Naɗi, Nug Yawe Nukka Ɠagattag Oh Ele, Nug haen laa me daye, amu haen amuppa Nug heeb, Jerusalem ippa uug digdig naunab ⌊ag Juda,⌋ ahilagppa bekkulag. Kekeɗ ag uɗin, ag huan baalag okkaippa enan, qaiqaɗ laih gona, laih uɗin hebeppeg, ag ⌊Juda danab ah, ag⌋ ottaina, kaaka aqeb, ag eheɗ nau baɗaglag. Kekeɗ ag aab okkainu aɗ loppaɗppeg, ag Juda, ag baɗan, laa ag ehanadkkulagnu ebeppeg, ag baalag am umanab ukka, qauko batakku.

⁶ Elam wanppan ban danab ⌊ag baelagppa oinna ban hetteb amu,⌋ ag ban, lat aɗualadppeg, ⌊appan ban danab laa, ag⌋ bannu karis attan daan, ban hetteb, laa ag hos attan daan, ban hetteb ele amu, ag ele oh ban hekkulagnu uɗiglag. Ag uɗippeppeg, Kir wanppanu ban danab ag guppiɗ mawadna, ban hekkulagnu uɗiglag.

⁷ Ag uɗippeg, ag Juda, ag ahilag aben oolnu noak enanag amu, amuppa bannu karis ag ambaknab daaglag. Ban danab ag hos attan daan, ban hetteb, ag aab okkainu aɗ odppa daaglag.

⁸ Kekeɗ ag heppeg, aɗi keeke ag Juda ehanadlonu amu, keeke amuam laal ii daama. Kekeɗ ag uɗin aqaglagnu hebeppeg, ag Juda ag ban haknu keeke kuɗum lag laappa, ag lag amunu, Lebanon Duppunu Lag Enanagnab atteb amu, ag bannu keeke kuɗum amuppa daattenu dabmenana, ag, “Keeke amu ehanikkeb, ig ena daagnig,” dabmekkulag.

^9-11 Ag anam dabmenana, ag Jerusalem aab okkainu aɗ am aben laala kuɗum nauhna daappeg anidkkulag amunu, ag Jerusalem, aab okkai amuam King Dawitnu amu, ag Jerusalemnu lag am oh ebqekkulag. Ag ebqewona, ag lag laala loppaɗna, lag amunu men akkan, aab okkainu aɗ eɗun bappaidkkulag. Amu ag le aoglagnu, ag le, le moɗ laa onig Honapnu Le Moɗ, ag le moɗ amuppanu heppeg, le ukka, moɗ okkai laa, ag moɗ okkai amu aɗ aɗit aab okkai talilidttep gamalahppa buuglag amu, le amu, moɗ alag amuppanu am uɗia, moɗ bau amuppa nokku. Ag keeke amu oh hattaglag, amge ag Kayak, Nug am Jerusalem aab kalak mameg amu, ag nuhignu nakok iinab dabmemana. Ao, ag Nug, Nug anukka keeke amu ohnu maittak awom ele amu, ag nuhignu dabmak iinab aomna.

¹² Uug imu bak haenppa Naɗi, Nug Yawe Nukka Ɠagattag Oh Ele, Nug ag haen amuppa ⌊eheɗ heppignu⌋ ag oo doyak doon gaan, ag ikkilag uɗug oh otaɗna, ag lamen heɗiag ele takkadkkulagnu amelagppa akku.

¹³ Amge antteg! Ag oo doyak kobol amu ii hemana. Iitta! Ag oo gamag ahak doon, ahi goɗak, hobul ee naɗi hena, sipsip aqan, makau baalag otaɗadnana, henan lanana, ag wain ele lakkulag. Lanana ag akkulag. “Doppeg, haen elab iitta ig mauhkkunig amunu, ig ee le ele aot latu!,” akkulag.

¹⁴ Yawe Nukka Ɠagattag Oh Ele, Nug nukka da gumiɗa na, Nug nai imu da daulppa aum. “Danab amu, ahilag hipuninnu amu, laa nug eheɗ hak amunu noob aɗi uɗat naɗippa heeb, am iitta ii mema; ukkeb, ukkeb, haen ag mauhkkulag batak.” Nai amuam Naɗi, Nug Yawe Nukka Ɠagattag Oh Ele, am nuhig nai aakku.

Yawe Nug geha Sepna uɗat nuhigppanu lamidkku

¹⁵ Amu Naɗi, Nug Yawe Nukka Ɠagattag Oh Ele, Nug da amelppa aum. “Na ahan gona, kingnu ehanittak danab laa Sepna, danab amu nug kingnu lag enanagnab, appanu keeke oh gumatte ele, na nug gumidna gona, nug amegppa inam appe doyaɗ!

¹⁶ ‘Sepna, na ⌊hee, maɗi nid nahip ag men oɗe enanag⌋ nahip boumak aben daakkunu aoeg, nahip boumak aben aakku heppig. Ao, na gaɗan aben ⌊enanagppa⌋ daakkunu na ⌊hee, danab ag⌋ men oɗe amu hoieg ukke daatte. ⌊Amge⌋ na ippa aɗin daattem? Ippa na laipad laa elete, amunu na nahip boumak aben anam iikku bappaidme?’ ” awa aum.

^17-18 ⌊Sepna⌋ na dabme! Na danab ɠagattagte dabmettem? Iittanab iitta! Yawe Nug geha danab nug qiɗnu bal ɠagattag aɗa, mawe, laih umanab ukka na qette, amubia Yawe Nug heeb, kekeɗ ag na awidna gona, wan laa umanab daatte, appa meidppeg daakkut. Na geha wan amuppa mauhppe, oiyaknu karis enanag nahip, na oot amunu huan mauhtte ele, geha keeke amu ele am wan amuppan dilag daakku. Na kingnu uɗat hettem, amge na uɗa nak nau guittak ele aon dona, king baekkudppa madattem.

¹⁹ ⌊Amu Sepna, Yawe Nug na amenppa atte.⌋ “Da geha uɗat na hettem ele amu, da na amuppanu lamidppi, laa nug heeb, na kingnu ehanittak danab baula ii daamna.

²⁰ Haen amuppa am inam bekku. Da maɗi nid dahil, nug Hilkaia bekka Eliakim, da nug onigppa eppi uɗikku.

²¹ Aria, nug geha uɗieb, da lamen elab nahip awen, da Eliakim beɗuppa mein, imuagppan lamen ena ena nahip ele nug imuagppa tagitten, da nahip uɗat, nahip ɠagattag, nahip ehah ele oh nug medakkul. Da anam heppi, nug Juda danab ah Jerusalem daatteb, laih laih laa ohppa ele daatteb amu, nug geha ag mamelag bia daakku.

²² Da heppi, nug ɠagattag okkai, kingnu bia, ehah, am ele kingnu bia ele daakku. Da King Dawit laugnu ki oh medappi, keeke laa nug matuleb, am geha danab laippu laa nug manakkunu elele iitta. Keeke nug maneb amu, geha danab laa ii matulma. Iitta.

²³ Geha da heppi, nug uɗat amuppa ɠagattagnab daakku; pin elab ad laa giɗoppa yaatteb, amubia. Nug baekkudppa oh binalag nuhignu aoglag.

²⁴ Ge, nug nuhig uɗat am uug ele, amge nug elele heeb ukkeb, nug baekkudppa oh, laa onig iittanab ele amu, geha ag oh nuhig haknu binag amahlak oppiaawak ele aoglag.

²⁵ Haen amuppa pin elab tatam ɠagattag dayom amu, geha uhuqa auta, na qekku. Ag nuhigppa aihna uug medappig, ag geha nauhkkulag. Yawe Nukka Ɠagattag Oh Ele, Nug anam mattiom daatte amunu, am anam bekku.” Aisaia nug Kayak oɗe Sepna amegppa anam aum.