Aisaia 21 - Nobonob Baibel

Yawe Nug Aisaia Babilon na qekku ippunittom

¹ Nai meunab ele Babilon wanppanu Yawe he, Aisaia doyom ele am iikku. Wan laa, wan amuam atu taɗak, wan amunu danab ag danab ɠagattagnab, laa ag amu dilagnu baɗak eheɗ nau dootteb ele, amu wan amunu ban danab ag ulah ɠagattag kilibob atteb, Negeb atu taɗakppanu eheɗ uuetta uɗia, atu qette amu, ag amubia uɗin, Babilon heppeg nauhkku.

² Da keeke anidmi am Yawe Nug tulegleg uug okkainab ele laa da meɗe anittitti, amuppa Yawe Nug inam a doomi. “Wan laa, ag nug bubuittak kobol nau hetteb ele amu, ag amuib tuɗidna hetteb. ⌊Amuam Babilon wan.⌋ Ao, wan laa ag ban hena, wan laappan danab aqaeg, amu dilag keeke aotteb ele amu, ag amu tuɗidna hetteb. ⌊Amuam Babilon wan aakku.⌋ Ag anam heegeg, ⌊kobol nau amu ba, naɗi mette amunu,⌋ Elam ban danab ag banelag uɗin, Babilon aqeg! Ao, Midianu ban danab ag uɗin, aab okkai amu talilidna, oo mettan dayeg! Da geha uug oh Babilon ag danab ah huu laa dilagppa madappig amu, da amunu nob elele mekkul,” awa aum.

³ Yawe keeke amu ippuniɗaɗa, nuhig nai amu a doomi amunu, da beɗulppa guittak okkai doottem. Ao, da ah nid aoglagnu guittak dootteb bia guittak doottem. Da nai doomi am he, da nein qekkulnu hettem. Ao, keeke da anidmi am he, da dabmak huanaknab aottem.

⁴ Da keeke Yawe tulelegppa ippuniɗe anidmi am he, da dabmak iwe, amel qittinene, beɗul baɗeɗe ottaittem. Da aam paha paha noa tuebnab ma, uudoa, ⌊maɗoɗ daakkulnu⌋ ool huan hanhan dayom, amge iitta, da Yawe ippuniɗom am he, da amel iɗuak doottem.

⁵ ⌊Amu tulegleg amuppa⌋ danab ag ee naɗi laa heegeg ⌊anadmi⌋. Ag heɗep na dayaknu lamen okkai okkai duqatteg, ⌊danab okkai ag amuppa heɗep nena daanna,⌋ ee lanana, le lanana daaegeg anidmi. Ag aakku daan heegeg, baag laa, “Ag ban danab okkai, ag aheg! ⌊Ag hetteb am uueg! Ban hak haen uɗia malom!⌋ Ag ahan, ahilkad ban haknu guppiɗ goɗenppa babaitteg!” ewa eum.

⁶ Anam amunu, Naɗi Nug da amelppa inam aum. “Na aɗi uɗitte anittak danab laa otippe, nug geha nuhig abenppa daakku. Dayaya, nug aɗi anidkku amu, nug na amenppa amunu anaɗ!

⁷ Nug anidkku amu, amuam danab ag doɗ hos keeke attan daan oitteb. Am danab hos attan aɗit aɗit oitteb. Am danab ag donki attan oitteb. Am danab ag kamel ele attan oitteb. Nug amu anatta, nug neekka italatta auta awawa, daug ele humaɗ!” awa aum.

⁸ ⌊Yawe Nug anam a doyen, da⌋ aɗi uɗitte anittak danab ⌊mei dayaya,⌋ nug baag okkaippa, laion bia, huan ewa inam aum. “Naɗi, da aɗi uɗitte anidkkulnu deɗ deɗ oh amunppa hibaitten dayeye, ⌊ibppa neekke, gumak haen oh⌋ daattem. Ao, da aɗi uɗitte anidkkulnu tuqan ohppa da dahil uɗatppa daattem,” awa aum.

⁹ ⌊Nug anam awowa, nug neekke ukke, keeke laa antta eum.⌋ “Antteg! Da danab doɗ attan daan uɗitteb anadttem. Ag hos attan aɗit aɗit daan uɗitteb,” awa aum. ⌊Amu laa nug oɗmak he, laa⌋ nug nob ma, inam aum. “Babilon na qa nauhom. Babilon aakku na qa nauhom. Ahilkad kayak hambuppuak dottolkad amu oh wanppa nena qena, oh aoɗadppig!” awa aum.

¹⁰ Nug anam a doyen, da ami. “O dahilad danab ah Israel, danab ee aeg mumuɗkkulagnu abenppa ag ee aeg amu ad uug eleppa onana mumuɗtteb bia, kekeɗ ag oɗoɗadppig, amge da nai laa, Yawe Nukka Ɠagattag Oh Ele meɗom, ao, nai Israel dilag Kayak da meɗom amu, nai Nug da meɗom, gemu da nai amu iikku ag madattem,” ami.

Edom dilag nai

¹¹ Nai meunab ele Duma wanppanu Yawe he, Aisaia doyom ele am iikku. Danab Seir wanppa daatte amu, nug ewa, inam oɗ meɗom. “Aɗi uɗitte anittak danab, haen ganeb geha gatatu iitta mekku? Haen ganebnab iitta mekku amu, na appe doye!” awa eum.

¹² Nug anam ewa a, da, da am aɗi uɗitte anittak danab amu, da nai nob mein, inam ami. “Geha wakkaɗkku, amge geha gatatu ele baula nekku. Amu na bau eɗun oɗ meɗakkutnu amu, na eɗun uɗin, oɗ meɗakkut,” awe ami.

Arebia dilag nai

^13-14 Nai meunab ele Arebia wanppanu Yawe he, Aisaia doyom ele am iikku. Arebia danab ag ⌊kekeɗ aqadmananu,⌋ ag oolna gona, atu taɗakppa haen tutuib dayaknu aab kalan daaglag amunu, ag Dedan danab, ag aben ohppa oiyak danab, ag oinna, keeke daden mena, eɗun meeg, laa ag daden mattegeg, ag men doɗo tuɗidna aotteb amu, ag Arebia dilag, atu taɗakppa baalag qaɗaiettom ele le matteg! Ao, ag Tema wanppan danab ah, ag amu, ag ee aon gona, Arebianu oola ukka laih dayaknu danab amu, ag danab amu gumadna gona matteg!

¹⁵ Aɗinu ⌊Arebia ag oolna gokkulag⌋? Kekeɗ ag qep elab eppelagppa aɗan, lat omanattak eppelagppa ele aɗan uɗin, ban ɠagattag hena aqappeg, ⌊Arebia⌋ baɗan oolkkulag.

¹⁶ Amu Naɗi Nug da amelppa inam aum. “Danab ah Kedarnu ⌊amuam Arebia danab ah⌋ ag binalag am geha iitta mekkunu maɗ laippu daatte. Maɗi nid nug uɗat hekkunu tituanak waappa dayaya, haen amu malakkunu deɗ laib laib tutukku elelenab ebqette, amubia maɗ da geha iikku amunu na amenppa ami, maɗ amunu deɗ amu maleb, geha keeke amu oh bekku.

¹⁷ Kedar ag ban danab ɠagattag; ag latppa ban haknu ag doon autna aotteb, amge geha ag nauhppeg, ban danab ameg nakokib daaglag.” Aɗinu? Yawe, Nug Israel dilag Kayak, Nug anam awa atte.