Aisaia 19 - Nobonob Baibel

Yawe Nug Isip bu madakku

¹ Nai meunab ele Isip wanppanu Yawe he, Aisaia doyom ele am iikku. Antteg! Yawe Nug lombigppa dayebeb, lombig nug pahanab Isip wanppa uɗikku. Yawe Nug uɗiebeb, Isip dilag kayak hambuppuak dottolkad ag baɗan hahaɗkkulag. Ao, Isip danab ah ele ag huan ottaina, baɗan, oolagppa gai-iitta dooglag.

² Yawe Nug inam atte. “Da heppi, geha Isip ag akka akka nug qekkulag; awag amag ag geha akka akka nug qekkulag, lailkad ele akka akka nug qebeppeg, aab okkai laa ag aab okkai laa ele nug qebeppeg, amu wan obatak laa, ag wan obatak laa ele nug qekkulag.

³ Isip danab ah ag anam henana, dabmak kuɗum aoppeg, ag oolag na qeebeb, da geha heppi, Isip dilag maittak keeke laala hekkulagnu kaboliak dayeb, ag anam daanna, ag geha ahilkad kayak hambuppuak dottolkad ag ehanadkkulagnu oɗ mattanna, ag gona, mauhak ele gamag danab, mauhak ele mattiak danab ele gumadna gona, dabmak ahilag aoglagnu ele oɗ mattaglag.

⁴ Da geha heppi, Isip ag king nau laa, nug laa guittak mettaknu uug laa ii dootte, ag nug eppegppa gona, nug waappa daaglag. Ao, da geha heppi, king nau, nug danab ɠagattagnab, nug ag gumadkku.” Naɗi, Yawe Nukka Ɠagattag Oh Ele, Nug anam aakku atte.

⁵ ⌊Amu Isip he nauhak haenppa amu, Yawe Nug heeb,⌋ geha Nil le am noa ukka, iitta mekku. Le iitta meeb, wan ba, wan qaɗaietta autanab aokku.

⁶ Haen Nil le qaɗaiettebeb, le ippu naunau eppelagppa heppig ele qaɗaiedappeg, leppanu keeke oh mauhadppeg, uɗig okku. Isipnu le nag laa ele qaɗaiedappeppeg ukkeb, qaɗaiettaglag. Qaɗaiedappeg, gikkiɗah, qao ele le daugppa daatteb am ele bunaɗkkulag.

⁷ Laa ele, le Nil daug daug, le oɗeppa ele, keeke oh amu geha bunaɗkkulag. Nil le daugppa ee ebappig amu, ee amu oh qaɗaiettan malappeg, wan ele qaɗaietta auta autanab aweb, ulah uɗia, keeke eppak dayaya qaɗaiettom amu, keeke amu oh iwaleb ukkeb, wan hamu niikku.

⁸ ⌊Isip dilag⌋ kakai awak danab, ag huk ena kakai aotteb amu, Nil le qaɗaietteb, ag oolagppa uug doon mahiglag. Ge! Danab ag Nil leppa uhui ena, kakai aotteb amu, ag uug doon, hamunab daaglag.

⁹ Danab ag keeke laa onig plaks aon, linen muɗi hetteb ele, ag uug naunab doon, “Ig ib iitta, attem hekkunig,” akkulag. Ge! Danab ag muɗi linen aon, linen lamen hakkab agatteb ele, ag uug okkainab doon, ag ele, “Ig ib iitta, attem hekkunig,” akkulag.

¹⁰ Isip dilag danab okkai ag geha uug doon, padal mekkulag. Amu Isip appa, danab ag uɗat henan, men doɗo aotteb amu, danab amu ag ele uug nauppanab daaglag.

¹¹ Soan aab okkaippanu ikki danab ag dabmak iitta ele. Danab Paro ulum medatteb ele, ag ulum nai dabmak pehettak iitta medatteb. Ag Paronu ehanittak danab anam daatteb amu, ag Paro amegppa inam maditteb. “Ig am doyak dabmak ena ele danab anukka daappig, ig amu buɗulkad daattem; ig king anukkanab daappig amu, ig amu buɗulkad daattem,” aon atteb. Ag anam maditteb, amge aɗinu ag anam nug amegppa hambuppun atteb?

¹² Anam amu, O Paro, ⌊gadon.⌋ Attem be, doyak dabmak ena ele danab nahip ag anam daatteb? Danab amu ag genab doyak dabmak ena ele danab daatteb dayeb, ag Yawe Nukka Ɠagattag Oh Ele, Nug Isip dilagppa aɗi keeke oh hekkunu maittak awom amu, ag na amenppa appeg doye! ⌊Amge ag elele iitta.⌋

¹³ Soan aab okkaippan danab okkai ag am dabmak iitta ele. Mempis huunu ikki danab ag am dabmak hambuppuak dim lamidtteb. Isip danab okkai amu ag Isip danab ah ib ena ippunadkkulagnu daatteb, amge ag ib nau amuppa omaladppig.

¹⁴ Yawe he, Isip dilag danab okkai, ulum mettak danab aɗi, ag ahilkad dabmak kaboliak daatte amunu, ag heeg, Isip danab ah ag oiyak ahilag am ukka nauha auta awe, ag keeke tutukku laa ii hetteb. Ag am danab le ɠagattag huan la, kaaka qe bahowa, gokkunu haaha, eheɗ oiyaya, bahomppa tappa, na qekkunu haaha oitte, Isip ag anam hetteb.

¹⁵ Isip ag laippu laa nug Isip ehanadkkunu laa iitta. Danab nug danab okkaitai, o danab okkai iittatai, danab nug keeke kuɗum eletai, o daɗek danabtai, ag oh am melemel laippu. Laippu laa nug Isip danab ah ag ehanadkkunu laa iitta.

Isip danab ah ag oolag eɗueb, Yawe noobppa dup nona binag mekkulag

¹⁶ Amu haen amuppa Yawe Nukka Ɠagattag Oh Ele, Nug Isip danab ag bu aqebeb, ag ah ɠagattag iitta daatteb bia daan, ag eheɗ baɗan, hahaɗkkulag.

¹⁷ Ag geha baɗan ottaina, ag Juda dilag ele geha eheɗ nau baɗaglag. ⌊Genabnab genab!⌋ Isip ag Yawe Nukka Ɠagattag Oh Ele, ⌊ag Nug Juda dilag Kayak daatte doon, ag⌋ Nug ag ahilagnu aɗi hekkunu maittak awom daatte dooglag amunu, haen danab laa nug Isip danab laa amegppa, “Juda,” ab amu, Isip danab amu nug geha eheɗ naunab baɗakku.

¹⁸ Haen amuppa Isipnu aab okkai tanig ele ag digmena, Hibru nai mattiglag. Mattinna, ag Yawe Nukka Ɠagattag Oh Ele, Nugib waappa daaglagnu anana, ag ahilag nai ɠagattag qettaglag. Aab amunu laa am onig Hiriopolis.

¹⁹ Haen amuppa geha Yawenu qaɗab laa Isip dilag wan ooppa daakku. Laa amu, geha men biidod laa danab ah anidna, ag Yawe tutukku dabmekkulagnu Isip dilag tomppa daakku.

²⁰ Qaɗab amu, men biidod ele aa Isip wanppa anttaknu at daaglah. Daapeɗ, danab ah anatna, ag Yawe Nukka Ɠagattag Oh Ele, ⌊Nug Isip wanppa daatte⌋ dooglag amunu, kekeɗ ag uɗin, eheɗ hadappeppeg, Yawe unuqidkkulag amu, Yawe Nug haen amuppa ehanatteb, padal memananu danab laa meeb uɗia ehanatteb, ag kekeɗ eppelagppa qagaiettak ii daamna.

²¹ Am Yawe Nug geha heeb, Isip ag Yawe Nugib am Kayak dooglag. Isip danab ah ag Nug am Yawe doyona, haen amuppa ag Nug noobppa dup nona binag menana, ag doɗ, ee aegnu ofa ele aon main, Nug mettaglag. Ag amu henana, ag keeke laala genabnab hekkulagnu nai anan qakkaglag amu, ag amuib hekkulag.

²² Yawe Nug heeb, geha oɗe nau danab kuɗum aqe mauhtteb ele Isip danab ah aqakku, amge Nug anam hewowa, Nug heeb, ag eɗun ena daaglag. Ag oolag eɗueb, ag eɗun, Nug waappa daappeg, nug ahilag unuqittak doya heeb, ag eɗun ena daaglag.

²³ Haen amuppa geha ib okkai laa Isip wanppanu Asiria wanppa ukkeb, Asiria danab ag ahan Isip wanppa gobeppeg, Isip danab ah ag ahan, Asiria wanppa gokkulag. Isip danab ah, Asiria danab ah ele oh laippu qagmena, ag Yawe noobppa dup nona binag mekkulag.

²⁴ Haen amuppa amu, Israel, Asiria am Isip ele, kantri ewam amu oh ag laippu daan, laa am laa ii eɗidma. Ag anam daappeg, wan ohppan danab ag ahilagppa itittak ena aoglag.

²⁵ Yawe Nukka Ɠagattag Oh Ele, Nug ag itittak ena inam madakku. “Isip danab ah, ag am danab ah dahilad, Asiria danab ah, da ag hattami, Israel danab ah amu, ag dahiladnab daatteb. Anam amu, ag oh ag itittak ena aon malappig,” awa ana itittak ena madakku.