Aisaia 18 - Nobonob Baibel

Kus wanppan danab ah dilagnu nai

^1-2 Kus wanppa le laala piia wana, piia ugekke, amuppanu uɗiak wan laa daatte. Wan laa amuppa keeke naunau haulkad ele huanak daatteb. Wan amuppan danab okkai ag heeg, nai awa ukkak danab ag uub papairusppa hak ele le qaɗeppa wana, ahilkad okkai dilag nai wan laappan danab madatteb. Anam amu, wan amuppan ⌊nai awa ukkak⌋ danab, ag doyeg! Ag nai awa ukkak danab, ag wan laappa gotteb ele, wan amuppan danab ah ag danab ah elab elab; ag beɗulag anttaknu am ena, qa oppiaawaknab, danab wan amuppanu ag am ban danab nau, laa ohbia ag ag baɗadtteb, wan amuam wan ɠagattag, wan amuppan ban danab ag wan laa eɗadtteb, ahilag wanppa amu, le kuɗum wan oppatatte, obatak obatak daatte, ⌊amu wan amuppan danab ah uug ahilagppa bekkunu daatte dooglagnu,⌋ ag nai awa ukkak danab, ag wan amunu danab ah, ag ahilagppa paha ukkeg!

³ ⌊Amu uug ahilagppa bekkunu nai am inam.⌋ Ag wan ohppan danab, ao, ag danab ah wan atu ohppa daatteb, ag ⌊wan laappa ban ahakkunu daatte miag anidkkulagnu,⌋ haen danab ag pilak qaukoppa qabappeppeg, ag anidkkulag! Ao, ag ⌊wan laappa ban ahakkunu daatte miag anidkkulagnu,⌋ haen danab ag trampet iwalppeppeg, ag daulagppa dooglag!

⁴ Aɗinu? Yawe Nug da amelppa inam atte. “Da geha toette, aam nug ba huan gakkaɗa, nug ihi le ele laippu daattep qe, amemɗiag aotte, o gu hoɗopai hippuɗak nakok na, ee keeke uɗulagppa daatte, da anam toette daakkul. Da anam dayeye, da daattem abenppa dayeye, geha da neegppi ukkeb, da ⌊wan amuppan danab ag aɗi henan daatteb antten, da geha, haenppa dahil uɗat hekkul.⌋” Nug anam atte.

⁵ Laa amu, haen muɗi grep meu lep ii mak, haɗag bala neeg, grep meu daatteb, amge ii oɗuak, haen amuppa danab nug qep awa, grep muɗi ita bette okkulowa, eppeg elabnab ugekke, okkula aotte, amubia Yawe Nug heeb, danab amu, ag eheɗ nau aoglag.

⁶ ⌊Kekeɗ ag geha ban danab wan amuppan kuɗumnab aqappeg mauhppeg,⌋ ag gaɗalag geha mauhna niippig, aben amuppaib anam niippeg, ai doɗ latteb ele, ag lattaglag. Ao, doɗ, ag doɗ teppu latteb ele amu, ag lattaglag. Gakkaɗak haenppa, geha ai teppu latteb ele, ag lakkulag; oug haenppa am geha doɗ teppu latteb ele, ag lakkulag.

⁷ Haen amuppa wan laappan danab ah, ag danab ah elab elab; ag beɗulag anttaknu am ena, qa oppiaawaknab, danab wan amuppanu ag am ban danab nau, laa ohbia ag ag baɗadtteb, wan amuam wan ɠagattag, wan amuppan ban danab ag wan laa eɗadtteb, ahilag wanppa amu, le kuɗum wan oppatatte, obatak obatak daatte, amu danab ah huu wan amuppan ag geha keeke ɗo mettak ena amu Sion qaukoppa aon uɗin, Yawe Nukka Ɠagattag Oh Ele, Nug aguppa daatte, ag keeke amu nuhig daakkunu, hamu mettaglag. Ag geha keeke amu aon uɗin, aben laa, aben amuppa Yawe Nukka Ɠagattag Oh Ele, Nug onig aben amuppa daatte amu, ag aben amuppa keeke amu Nug mettaglag.