Aisaia 16 - Nobonob Baibel

¹ ⌊Uug nau amu bekku, haen amuppa amu,⌋ ag Moap, ag ahan, ag sipsip nalkad akkan, ⌊danab laala eppelagppa meppeg, laa amu⌋ ag aab okkai Selanu ahan, sipsip amu aon, atu taɗak oppatna Sion gona, ag Juda danab okkai takis mattak bia metteg!

² Moap ah ag oolna gona, Arnon leppa, le baag qak daattebppa, ag appa daanna, ag geha adeppa gokkulagnu amu, ag ii doomna. Ag ai nug nuhig kekeɗ teɗ nuhigppa daatte doya, eɗua gokkunu elele iitta amunu, oo uug ele hagagaɗa laih ukka, laihnu eɗua uɗitte, ag amubia hekkulag.

³ ⌊Amu Juda dilag okkai na,⌋ na ulum nai matte! Na nai doya mala hettoɗia epeɗia elele mettak kobol dabmenan he! Danab ah ag aam gakkaɗaknu aam ameg tutukkuppa ad ilonppa hik aon daatteb bia, na ad lokko gatatu manak laa bia ahilagnu daye! Moap danab ah ag oolna, laih daaglagnu gokkulag ele amu, ag aben ena amuppa gona daappeg, na ag lokkumatte! Na aben amu kekeɗ aib ippunadme!

⁴ Na Moap danab ah ag wan ahilagppanu oolna gona, laih daaglagnu gokkulag amu, ag uɗin, nahip wanppa daaglagnu, “Ao,” a! Yo, na ag ena daaglagnu, kekeɗ aqamanu, na ahilag guppiɗ daye! Danab nug Moap eheɗ hadakku, nug ag nug waappa daaglagnu wagai mekku amu, nug geha iitta mekku. Nug geha iitta meeb, wan he nauhaknu kobol amu ele iitta mekku. Haen amuppa laa nug Moap danab ah tappalatteb nokkulag amu, nug wanppa baula iinab daama.

⁵ Danab amu nug geha iitta meeb, dimppa Kayak heeb, danab laa nug danab ah laa dilagnu oo mauhaknab kobol tutukku dim lamittatta, nug oo metta ii uuak kobol ele dim lamitta haaha, nug king daakku. Nug am Dawit buɗub laa. Nug hettoɗiakppa nai doya mala hettoɗia epeɗia elele mettak kobol dim lamittatta, nuhig oiyakppa ele hanhan kobol genab tutukku ele, amuppaib oikku.

⁶ Ig doot malamut. Moap danab ah ag am dada danab ah. Ge! Ahilag hak amu ahilagppa okkainab daatte; bodok iitta. Ag anam daanna, beɗuppa tak danab ele daatteb, amge ahilag dabmak amu oh am hambuppuak. Genab laal iitta.

⁷ Anam amunu, Moap danab ah, ag Moapnu qanaglag. Ao, ag danab ah oh, ag oɗelag oohob huan qanaglag. Anukka ag ee ena, grep meu qaɗaiettak batappatak, danab ah aab okkai Kirheres babaitteg lappig. ⌊Amu, ee amu iitta meeb⌋, Moap danab ah ag ee amu iittanu eheɗ huan qanaglag!

⁸ Aɗinu? Grep dad aab okkai Hesbon guguittak daatteb oh qaɗaiettaglag. Grep dad aab okkai Sibma guguittak daatteb, amu ele oh qaɗaiettaglag. Grep dad anukka niie ukka, aab okkai Jaser bata, ukka atu taɗaknu tomppanu ukka, yuppa noak niiom, amge danab okkai wan laalanu, ag uɗin, dad amu oh heppeg nauhkku.

⁹ Anam amunu, da grep dad Sibma aab okkainu nauheb, da Jaser danab ah qanaglag bia qanattem. O aab Hesbon, O aab Eleale, da ahilahnu qanattem; amel leb amu na, ahilah danab ah oh layadkkunu elele. Aɗinu? Anukka, haen ahilah danab ah ag grep meu, meu laa ele aonna, ag amunu gamalag huan ahe eppig, amge ewak amu oh iitta mekku.

¹⁰ Dad ooppa am nakok gamag ahak laa ii daama. Grep dad ooppa danab o ah laa ahi ii ettama, o laa oo gamag ahak doyaya ii ema. Grep meu tappa leppu awaknu abenppa, appa laa uɗat ii hema. Gamag ahak laa oh iitta mekku; ii daama.

¹¹ Anam amunu, da oolppa Moap wannu da uug eheɗ naunab doottem. Ao, da oolppanab da Kirheresnu anam doottem.

¹² ⌊Gadon!⌋ Am inam daakku. Moap danab ah ag ahilag kayak hambuppuak dilag mettid lag nakokppa tena, unuqidkkulag, amge ag beɗulag bahiib yaakku. Ao, ag ahilag kayak hambuppuak dilag mettid lag nakokppa unuqidkkulagnu gonana, unuqittak hekkulag, amge amuam keeke hamu, ag ehanittak ii aomna.

¹³ Nai imu amu, Yawe Nug anukka Moap wannu mattiom.

¹⁴ Nug anukka anam mattiom, amge gemu Yawe Nug eɗua baula atte. “Moap am wan imuppan wan laa, am wan onig ele, amge maɗ ewam uueb, uɗat nid laippu laa nai qakkak waappa maɗ ewam dayaya, nug haen ebqette, haen amu bianab maɗ ewam uueb, Moap wan, danab ah nuhikkud ele oh ag geha uɗa nak eheɗ aoppeg, danab ah laa geha ag anidna, ag Moap danab ah dilagnu ena iinab doomna. Moap danab ah ag laib laib geha daaglag, ag geha ɠagattag iitta,” awa atte.