Aisaia 15 - Nobonob Baibel

Moap dilagnu nai

¹ Nai meunab ele Moap wanppanu Yawe he, Aisaia doyom ele am iikku. Tuqan laippuppa kekeɗ ag uɗin, Moap wanppa aab okkai Ar oh heppeg nauheb, Moap aakku na qekku amunu, ⌊da mahittem⌋. Ge, tuqan laippuppa kekeɗ ag uɗin, Moap wanppa aab okkai Kir oh heppeg nauheb, Moap aakku na qekku amunu, ⌊da mahiak hettem⌋.

² Moap danab ah Dibon aabppa daatteb, ag amu doon, ahilag mettid lakka, ahilag kayak hambuppuak dilag mettid lag nakokppa ele tena, appa gaaglag. Ao, kekeɗ ag aab aɗit Nebo, Medeba ele, ag amu heppeg nauhpeɗ, Moap danab ah ag amunu dabmenana, ag qanaglag. Moap danab ah ag uug naunab doon gaan, ag ohnab ikkilag uɗug otaɗna, bikkalag ele daaglag. Ag id ele aoglag.

³ Moap ag uug doon, lamen heɗiag ele takkan, aab mattan oiglag. Ag lamen amu takkan gona, Moap aab okkai ooppa haɗap-ppa, amu ag laulkad koɗokko uɗem ukkakppa ele oinna, aben amu ohppa ag qanak huanak hekkulag. Ag qanak heppeg, ukkeb ukkeb, ag ebehilag bodoedakku.

⁴ Moap danab ah aab okkai Hesbon daatteb, laa Eleale aab okkaippa daatteb ele amu, ag baalag okkaippa enan qanappeg, Moap danab ah Jahas aab okkaippa daatteb, ag dooglag. Ag anam qanaglag amunu, Moap ban danab ag ebeppeg, ebehilag ele bodoedakku.

⁵ Moap danab ah oolna gona, laih daaglagnu hena gona amu, ameg laa ag oolna gona, Soar batak tekkulag. Ameg laa ag oolna gona, Eklat Selisia batak tekkulag. ⌊Gadonnab,⌋ da Moap dilagnu oo doyak huan doottem. Aɗinu? Laala ag gona, Luhit tenana, ag qananna qananna gokkulag. Ele amu, laala ag Horonaim gokkulagnu gonana, ag ibppa gonana, ag eheɗ aoppignu qanaglag.

⁶ Qanaknu diig laa amu ⌊kekeɗ ag heppeg,⌋ lenag Nimrim ituak daya, nauhak daakku. Aria laa amu, ⌊le daugppan⌋ gikkiɗah bunaɗeb, keeke laa oh ⌊le daugppa⌋ wanppa beum amu, keeke amu ele iitta mekku. Ao, ⌊le daugppan⌋ keeke oh am bunaɗadna malaglag.

⁷ ⌊Uug eheɗ anam bekku⌋ amunu, Moap danab ah ag keeke ena ena aɗappig amu, ag amu qagmewona, ag gona, oolnu noak onig Popla, ag amu eɗidna gokkulag.

⁸ Amu Moap dilag wan makkulak ohppa ukka tom ohppa batak, amu makkulak amu ohppa danab ah qanannaib daaglag. Ag qanappeppeg, danab ah Eglaim aab okkaippa ag dooglag. Ao, ag qanappeg, Berelim danab ah ag dooglag.

⁹ Aɗinu ⌊ag qanannaib daaglag? Kekeɗ ag heppeg,⌋ Dimon leppa tiilag kuɗum noa, le kokoɗ ebakku. Laa ele amu, anam aakkuib ii bema. Iitta. Da ⌊Yawe,⌋ da geha heppi, laion nug Moap danab ah oolna gona, laih daaglag am eheɗ madakku; laa oolna ii goppig amu, ahilagppa ele anam bekku.