Aisaia 14 - Nobonob Baibel

¹ ⌊Yawe Nug geha Babilon heeb nauhkku.⌋ Aɗinu? Yawe Nug Israel danab ah dilagnu oo doya, oo madakku. Nug anukka ag nuhig danab ah daaglagnu Nug tituanattom, anamib geha Nug baula tituanatteb, ag nuhig daaglag. Amu Nug heeb, Israel ag eɗun gona, wan ahilagppanab daaglag. Ag daappeg, wan laihnu danab ag geha uɗin, Israel oolagppa daaglag. Daanna, Jakop buɗub bia bena daaglag.

² Amu danab ah wan laappan ag geha eɗun, Israel huu omaladna uɗin, ahilag wanppa maadkkulag. Ag omaladna uɗippeg, Israel ag ahilag wan Yawe tituana mattomppa daanna, appa Israel ag heppeg, buɗub laappan danab ah ag ⌊Israel dilag okkai daappig⌋ amu, ag geha Israel dilag maɗi nid maɗi ah daaglag. Huu laa ag Israel danab ah aɗualadna, diin goppig amu, Israel ag eɗun, huu amu aɗualadppeg, ag eppelagppa daaglag. Ao, huu laa ag heeg, Israel ag maɗi nid maɗi ah ahilkad daappig, amubia Israel ag heppeg, huu amu ag Israel waappa daanna, maɗi ahilag hekkulag.

³ Yawe Nug geha heeb, ag Israel, ag huu laa waappa daan, ahilag nai dim lamidna, ag amu dilag uɗat nau heppig amu, ag baula ii anam hemana. Ag uɗat amuppanu guittak baula iinab doomna. Ag ooppa uug nau doyak amunu baula ele iinab doomna. Haen amuppa amu

⁴ ag Israel ag Babilon dilag king na qeumnu aon aon qettan, ahi imu ettaglag. “Yawe Nug he, danab umu, nug danab laa eheɗ nau hattom ele, nug na qa, iitta meum. Nug eɗua, ig baula eheɗ iinab heigma.

⁵ Yawe Nug nau hak danab dilag hokkat he qiiom. Ao, Nug king dilag qakun, ⌊qakun amuam aun aɗatte nug king daattenu epponak keeke dayaya, king laa aɗe ukke, nug mauhe, king laa aakku aɗatte⌋ amu, Nug qakun amu he qiiom.

⁶ Kingnu qakun amu aɗappig ele amu, ag oo nauhakppaib daan, ag haen oh danab ah laa oh eheɗib hadappig. Ao, ag oppoɗilag be amelag kokoɗ eppe, ag haen oh ban henana, wan laa oh eɗadnana heeg, agib waalagpa daappig.

⁷ ⌊Amge king amunu haen gogppa teeb, Yawe Nug heeb, king amunu batakppan king nug na qeeb,⌋ wan oh toettak, maɗoɗ ele daaglag. Wan oh ag anam daanna, amu danab ah aab ohppan ag gamalag ahebeb, ag ahi ettaglag.

⁸ Ad pain, ad sida Lebanonnu amu, ⌊ag danab ah daalob⌋ ag gamag ahak doon, ag king amu amegppa alobnab. ‘Laa nug na nitte mauhme amunu, gemu laa ad ob qiikkunu uɗia, nug ig ii oikke neta qettem.’ ” Ag anam ahi ettalob.

⁹ ⌊O Babilon dilag king,⌋ danab mauhna gona, nami aabppa daatteb amu, ag na ele nug uɗa tekkulagnu ahan, muttub qetteb. Mauhak danab appalag am ⌊danab hette bia haaha⌋, mauhak aɗi ag na humidkkulagnu, nug danab mauhppig dottolkad maɗatte, na anidkkulagnu aakku daatteb. Ameg amu, haen ag wanppa bau daanna, ag wanppan danab okkai daappig. Ge, mauhak danab appalag ⌊danab hette bia haaha⌋, danab mauhppig dottolkad, ahilag sia kingppanu ahaglagnu maɗatte, ag na anidkkulagnu aakku daatteb. Ameg amu ag anukka ii mauhppig daanna, ag wanppan king daappig.

¹⁰ Aab amuppan ag na anidna, ⌊aon aon nittan⌋ akkulag. “Gemu na ɠagattag iitta, ig bia beme. Gemu na ig bianab daattem,” akkulag.

¹¹ Danab ag na binan, onin okkai humaegeg oime ele amu, binag amu ele ippa, danab mauhak appalag imuppa uɗiom. Danab ah ag harp qena, ag musik nahip heeg doon gaman ahom ele amu, musik amu ele ippa uɗiom. Nahip balal, na amuppa niikkutnu amu, balal amuam ag doɗ teppu beɗaknu mamat gokkaɗna, ag amuppa bappaidna heppig. Ao, beɗun laidna niikkutnu lamen amu, lamen amuam gawat aakkuib.

¹² ⌊O Babilon dilag king⌋, na amu buttuanu hoɗoppai boitinan bia daame, amahlak okkai ele, amge gemu na habppanu nena qena, uɗin wanppa qeme. Na anukka daanna, na wan kuɗum eɗadme, amge gemu laa nug na ha buɗitte, wanppa neme.

¹³ Na nakka, nahip dabmakppa, na ame. “Da geha attannab hab eɗitten tein ukken daakkul. Geha da heppi, dahil sia king am Kayaknu hoɗoppai daatteb eɗatta ta daakku. Da geha anam hein, da geha sia king dahilppa qauko kayak qagmena daattebppa daakkul. Ao, da geha qauko ⌊kayak daatteb, da⌋ amuppa attannab daakkul.

¹⁴ Da geha attan tein ukke, lombig eɗitten daakkul. Da dakka da hein, da geha Kayak Attannab, laa oh eɗattak daatte bia daakkul.”

¹⁵ ⌊Na anam ame⌋, amge laa nug he, na mauhak danab appalagppa uɗime. Na uɗina amu, na mauhak danab dilag aab batakppanab daattem.

¹⁶ Danab ah mauhppig, ag amelag behabe, neekkidnana, ag nahip-ppa keeke beumnu dabmena, ⌊ag akka akka nug oɗ medatteb⌋. “Danab imute nug he, wan uɗalom. Danab imute nug he, wanppan wan anen anen ag hahaɗppig?

¹⁷ Danab laa nug he, wan oh atu taɗak bia be, amu aab okkai kuɗum eɗatta, danab ah kuɗum aɗualatta, diia ukke daappig amu, nug ag uuatteb, ag appalag diigppa gokkulagnu oo ii daye he, ag aakku anam daappig amu, danab amuam danab imu iikkuibte?”

¹⁸ King laa oh wan laala ohppan mauhppig, gaɗalag boumak aben enanagnabppa boumatteg niitteb. Mauhak gaɗalag anen anen amu ag ahilag aben piɗe piɗeppa maadppig niitteb.

¹⁹ King laala oh ag matmatppa anam niitteb, amge laa nug na gaɗan matmatppa ii meum. Iitta. Na gaɗan am hamu, miag daatte; doɗ laa mauha beɗeɗe, danab anidtte, amge nug keeke laa ii hette, na gaɗan am amubia daatte. O na gaɗan am ban haenppa kekeɗ ag ban gudkkudppa o latppa danab kuɗum aqaeg mauheg, laa ag mauhak gaɗalag amu moɗ hamuppa akkaeg nona daatteb, na gaɗan amubia daatte. O na gaɗan amu danab laa banppa oiye oiye, qeeg mauha, na qa wanppa niieye, ban danab laa ag baelagppa danab mauhom amu tappanna gotteb, na gaɗan am anam bia daatte.

²⁰ Na wan nahip he nauhe, danab ah nahipad aqame amunu, nahipad huu ag na matmat enanagnabppa ii meidmana; king laala ahilkad huu heppig bia. Danab ag hak nau, na heme bia hetteb ele amu, laa ag amu bekkalkad alalkad dilag baula ii dabmemana.

²¹ King, nug mamekkud aɗi ele, ag kobol naunab kuɗum heeg amu, king bekkod ⌊ag kobol nau amu ooppa nona, tuɗitteg ukka, okkai bekkunu daatteb amunu, anam ii bemanu⌋ ag aqappeg mauhkkulagnu aben babaitteg! Nug bekkod aɗi ag ahan daanna, wan aon appatna, danab ah kuɗum bena, aab okkai kuɗum heppeg bena, ⌊baula kobol naunab kuɗum ii hemananu,⌋ ag mauheg!

²² Yawe Nukka Ɠagattag Oh Ele, Nug inam atte. “Da geha ag eheɗ hadakkulnu ahen, Babilonnu amu, da heppi, nug bekkod nid danab, nug alakkud, nug buɗupud aɗi oh, ahilagppa onig Babilon daatte amu, ag oh iitta mekkulag.

²³ Da geha heppi, Babilon am geha ɗu beeb, hipunai ag Babilon daaglag. Da geha heppi, Babilon oh padal ma, iitta mekku.” Yawe Nukka Ɠagattag Oh Ele, Nug anam atte.

Asirianu nai

²⁴ Yawe Nukka Ɠagattag Oh Ele, Nug nuhig nai ɠagattag qetta aum. “Da keeke hekkulnu maittak aomi amu, da amuib heppi bekku. Ao, da keeke hekkulnu maitten, ɠagattag qettami amu, da geha hekkul.

²⁵ Da Yawe Dakka Ɠagattag Oh Ele, da geha heppi, Asiria ag uɗin, wan dahilppa daatteb, geha ag eheɗ naunab aoglag. Dahil qaukoppa, da ag tappaladppi nokkulag. Da heppi, geha danab ah dahilad, ag Asiria huu ehanadkkulagnu uɗat ɠagattag, guittak ele iinab hemana. Ao, ag Asiria dilag keeke uug okkai ele baula iinab maomna. Iitta!

²⁶ Wan imunu wan anen anen ohppa da amuib genab hekkulnu maittak aottem. Ao, da amu hekkulnu amu, da eppel bahien daai, wan oh tonom daatte.” Yawe Nukka Ɠagattag Oh Ele, Nug anam awa atte.

²⁷ ⌊Yawe Nug amu genab hekku.⌋ Aɗinu? Yawe Nukka Ɠagattag Oh Ele, Nug keeke hekkunu maittak awa, ɠagattag qettom dayeb amu, aun nug heeb, geha Nug keeke hekkunu dabmette amu ii bema? Ao, Nug eppeg bahiom daatte dayeb amu, aun nug heeb, Nug eppeg eɗua aokku?

Pilistia dilagnu nai

²⁸ Amu maɗ King Ahas nug mauhom, maɗ amuppa Yawe he, Aisaia nug nai meunab ele doyom. Nai amuam iikku.

²⁹ “O ag Pilistia danab ah oh, king laa nug uug matte, ag uug maoppig amu, nug aakku iitta meum, amge diig amunu ag Pilistia ag amunu aib gamalag ahom. Aɗinu? King amu buɗub, nug mameg nau ahilagppa heum amu, buɗub amu nug nau hak amu eɗittak, naunab hadakku. King mauhom ele nug am mat nau, danab emaleb mauhkku, o iitta ehanittak awa, ii mauhma, bau daakku bia dayom, amge nug buɗub am mat nau, danab emaleb, laippun, pahanab mauhkku aakkuib, amubia daakku.

³⁰ Geha da danab ah dahilad gamagppa heppi, laala ag danab daɗek naunab daatteb amu, ag am geha sipsip ag aben gikkiɗah enappa daatteb bia elele daaglag. Ao, ameg laa ag keekenu tutu daatteb, da geha heppi, baɗak iittappa daaglag, sipsip ag ii baɗana niitteb, amubia. Amge ag Pilistia, da geha heppi, enug haen naunab beeb, ad diɗi nauhe, ad bunaɗtte bia, ag iitta mekkulag. Ao, ag Pilistia, ag qagaiettak haen dimppa laippu laippu haen amuppa daaglag amu, da enugppa heppi, ag oolagppan laippu laa bau ii daama. Iitta!

³¹ O ag Pilistia huu aab okkainu aɗnu od ooppa daatteb, ag qaneg! Ao, ag Pilistia danab ah aab okkaippa daatteb, ag laa mauhe, danab ah qanatteb bia heig! Ge, ag Pilistia huu aab okkai adeppa adeppa daatteb, ag huanaknab baɗeg! Aɗinu? Laih yawalti uɗitteppanu ban danab huu buttuɗai bia uɗitteb, amu oolagppa laippu laa ɠagattag iitta laa iitta. Iitta. Anen anen oh ag danab ɠagattagib.” Yawe Nug anam atte.

³² Amu haen Pilistia dilag nai awa ukkak danab ag uɗin, amunu ig oɗ megappeg, ig aɗi amelagppa akkunig? Ig geha ahilag oɗmak inam nob mekkunig, “Yawe Nug he, Sion nug eɗua ɠagattag daatte amunu, danab o ah nuhig aun nug uug maokku, nug ukka, Sion ta, nug padal mak eɗitteb ena dayaknu aben amuppa ena daakku.” Ig anam akkunig.