Aisaia 13 - Nobonob Baibel

Babilon dilagnu nai

¹ Nai meunab ele Babilon wanppanu Yawe he, Amos bekka Aisaia doyom ele am iikku.

² Ag qauko laa igippa ad iitta ele, ag amuppa tena, ban danab ag ban hekkulagnu pilak laa qabappeg dayaɗ! Ao, ag baalag okkaippa ⌊daup ag uɗin, qagmekkulagnu⌋ huana eig! Ag eppelagppa ippunadppeg, ag gona ban hena, ag aab okkai laa ⌊Babilon⌋, appan danab ag dada danab daatteb amu, ban danab ag gona, aab okkai amunu od aoglagnu ban heig!

³ ⌊Amu Kayak Nug atte.⌋ “Da dahil ban danab, huu da epeɗiadmi amu, da ag gona, ⌊Babilon eɗadkulagnu⌋ haknunab amelagppa ami. Ao, da ⌊Babilon danab ah dilagnu oppoɗil bette amunu, da⌋ ban danab dahil ag noob mettak nau ⌊Babilon⌋ mattaglagnu onilagppa emi. Ban danab huu amuppanu amu, ag da onil attannab daakkunu gamalagnab ahatte.” Yawe Nug anam atte.

⁴ “Ag toettan daanna, keeke imu anidna doyeg! Qauko laappa oqotti naɗinab daatte. Oqotti amuam danab ah kuɗum huanak qagmena, muttub qena, oqotti okkai hetteb, amubia daatte. Ao, ag toettan daan, keeke doyeg! Oqotti okkainab wan atu oh oolagppa daatte. Oqotti amuam ban danab kuɗum huanak ban hekkulagnu uɗin qagmetteb, amubia daatte. Yawe Nukka Ɠagattag Oh Ele, Nug nuhikkud ban danab ag ban hekkulagnu qagmaadtte.

⁵ Ban danab huu amu ag miagnu ii uɗitteb. Iitta! Ag wan laa umanabnu uɗitteb. Yawe Nug ag onilagppa eum; ag nuhig lat, lat doɗo keeke bia daatteb. Nug Babilonnu oppoɗi bak nau doya, Nug ban danab huu umanabnu amu ag Yawe, nuhig oppoɗi baknu nob nau mettak ⌊Babilon⌋ medappeg, geha ⌊Babilon⌋ eheɗ nau aokkunu onilagppa eum. ⌊Yawe Nug ag onilagppa e, ag uɗitteb, amu oqotti okkai doyak diig am aakku.⌋” Nug anam awa akku.

⁶ ⌊O Babilon danab ah,⌋ ag huan gayeg! Aɗinu? Yawenu deɗ naɗi miag doum. Deɗ amuppa amu Laa Nukka Ɠagattag Oh Ele Nug geha keeke kuɗum heeb nauhkkulag.

⁷ Yawe Nug geha anam hekku amunu, danab ah oh geha ebehilag gokkaɗa nekku. Ao, ag oh ag oolagppa ɠagattag iinab daamna.

⁸ Baɗak okkai, eheɗ naunab tonatteb, geha guittak okkai dooglag. Ag geha ah nid aokkunu guitte, beɗu itoɗia akkoniaya bia hekkulag. Ag akka akka nug iɗu neekkidna, iɗulagppa haen naunab aakku beum anidkkulag. Ag geha anam anidna ag geha nau, eheɗnab baɗaglag.

⁹ Antteg! Yawenu deɗ naɗi aakku uɗitte. Deɗ amuam deɗ naunab nau laa. Deɗ amuppa Yawenu oppoɗi bak, nuhig oo nauhak huanaknab ele am geha miag beeb anidkkulag. Deɗ amuam wan atu oh am hele-ettak daaglagnu, hipunin danab am heeb iitta mekkulagnu uɗitte.

¹⁰ Amu deɗ amuppa habppan hoɗopai ag amahlak ahilag ii wan mettamna. Am genab, habppa hoɗopai huu mak daatteb, ag amahlak ahilag wan ii mettamna. Aam bau bette am amahlak nuhig wan iinab mettama; kalam nuhig amahlak ele wan ii mettama.

¹¹ ⌊Yawe Nug atte. “Deɗ amuppa⌋ da geha danab ah oh wan ohppanu aun aɗi ag nau heppig bu aqakkul. Ao, da geha danab ah oh wan ohppanu aun aɗi ag nau hak danab ah daatteb ele, da ag hipunin heppig, da amunu bu aqakkul. Da amu, da dada ha laa eɗittaknu dabmak awak danab, ag beɗuppa tak kobol dim lamidtteb ele, da geha heppi, ahilag kobol amu oh iitta mekku. Ao, danab ah ag laa dilagppa oo doyak ii doon nau hadatteb, da geha ag eheɗ hadappi, ag onilag am qe nak daaglag.

¹² Da heppi, geha danab ah kuɗum ag mauhkulag; am gol ena dubuttid iitta ele kuɗum wanppa ii daatte, amubia danab ah laippu laippu geha daaglag. Ao, da geha heppi, danab ah mauhkkulag; Opir appanu am gol enanag daatte, amge gol amubia wan laalappa ii daatte, Opir appa ele kuɗum ii daatte, amubia danab ah laib laibnab geha daaglag.

¹³ Amu bekkunu amu, da heppi, geha hab nug uɗalebeb, wan ele uɗalala kekuɗa, aben laappa, nuhig aben iittappa gokku.” Yawe Nug anam awa atte. Yawe Nukka Ɠagattag Oh Ele, Nug oppoɗi beebe, oo nauhak huanaknab ele bette amunu, deɗ amuppa amu oh bekku.

¹⁴ Haen Yawe Nug Babilon heeb nauhkku, haen amuppa am inam daakku. Danab ah wan laalappanu appa daatteb, ag geha ahan, oolna eɗun appalag diigppa gokkulag. Ao, danab ah wan laalappanu appa daatteb, ag geha ahan, oolna eɗun, ahilkad wan anen anenppa gokkulag. Doɗ dakkuɗ atuppan ag danab anadmananu baɗatteb amunu, haen doɗ dakkuɗ awak danab doɗ mattia oiyeye, doɗ dakkuɗ ag oolna gotteb, amubia danab ah amu ag oolna gokkulag. O sipsip danab laa ag gumadkkunu iitta, ag geha oolna, matatun gotteb, amubia huu amu ag ele oolna gokkulag.

¹⁵ Danab ah ag ii oolna goppeg, ban danab ag anadna aɗualadna, banppa yaaladppeg mauhkkulag. Ao, danab ah ag oolna gobeppeg, ban danab ag anadna aɗualadna, qep elabppa aqappeg mauhkkulag.

¹⁶ Danab ah ag hippaidna neekkadna daappeg, ban danab wan laappan ag geha Babilon danab ah bekkalkad yuɗ, aɗelkad yuɗ ele aɗualadna, buɗiadppeg, wanppa noppeg, geha ag beɗulag oh aoɗeb, hupu hupu nekku. Ban danab ag geha danab laulkadppan keeke akkan gona, danab waalkad aɗualadna, ahilagppa eheɗ hekkulag.

¹⁷ ⌊Amu Yawe Nug atte.⌋ “Ag antteg! Da geha Midia danab uɗippeg, Babilon ele ban hekkulagnu dabmak ahilag eeɗkkul. Midia danab ag silwanu dabmak okkai ii aotteb. Ao, ag golnu enanagnab ii dootteb. ⌊Ag amu oh dab-ii-metteb. Iitta. Ag ahilag dabmakib dim lamidkkulagnu dabmetteb.⌋

¹⁸ Midia huu ag geha Babilon nid bau latppa aqaglag. Midia ag nid yuɗ dilagnu oo gai-iitta doya, oo metta ehanittak laa ii doomna. Ao, ag nid naunau dilagnu oolag bodoetta, le ii mema. Ag aqakib aqappeg mauhkkulag.

¹⁹ Wanppan wan oh oolagppa, danab ah ag Babilon am attannab dabmetteb. Babilon danab ah ag dada hak kobol henana, Babilonnu, ‘Am binag amahlak oppiaawak ele,’ dootteb. Ag anam dootteb, amge Kayak Nug heeb, Babilon am Sodom, Gomora ele nauhpiɗ, amubia nauhkku.

²⁰ Babilon geha nauhkku am inam. Danab laippu laa geha appa eɗua ii daama, ukkeb haen malak batak. Ao, laa appa ii daama, ukkeb ukkeb, gog tak haenppa batak. Geha Arebia danab laippu laa nug uɗia, peh lag nuhig Babilon ii buuma. Amu geha sipsip gumak danab laippu laa nug geha nuhikkud sipsip omalatteb gona, Babilon ee mattin ii lamana. Iitta!

²¹ ⌊Danab ah ag geha appa ii daamna. Iitta!⌋ Amge doɗ dakkuɗ atu taɗakppanu ag uɗin, appa daappeg, doɗ jakal ag uɗin, lag amuppa ambena daaglag. Hipunai ag geha uɗin, appa teɗ mebeppeg, meeme dakkuɗ ag ele geha uɗin, qiɗ henan daaglag.

²² Doɗ haaina ag geha uɗin, ban haknu aben ɠagattagppa daaglag. Ao, doɗ jakal, ag uɗin, kingnu lag enanagnab, ag amuppa ele daaglag. Ag anam daanna, ag appa gaaglag. Babilonnu haen aakku iitta mekkunu hette. Da nuhig haen tuɗidppi, nakok laa ele ii daama.” Yawe Nug anam atte.