Aisaia 11 - Nobonob Baibel

Jesi buɗubppanu laa nug heeb, geha wanppa haen ena uɗikku

¹ Danab ag ad oeg qiia, dimppa ad amu ita bette, amubia Jesi buɗub ooppanu laa geha ba, nug king daakku. Ao, ad bunaɗom, diɗi ita qa ba meu otte, amubia Jesi buɗub laa dimppa ba, king dayaya, meu okku.

² Yawenu Ouɗi amu nuhigppa daakku. Yawenu Ouɗi Nug doyak dabmak ena elenu diig, Nug am diignu doyak tutukkunu diig, Nug am laa ulum ena mettak diig, Nug ɠagattag ena ohnu diig, Nug doyak ena ohnu diig, amu Yawenu ebehi oh bodoetta le maknu diig ele Nug daatte.

³ ⌊Yawenu Ouɗi amu geha Jesi buɗubppan laa, nuhigppa dayebeb,⌋ Jesi buɗub nug Yawenu ebehi oh bodoetta le mekkunu enanagnab dookku. Nug geha gaɗappaib neekkakppa danab ah dilag nai doya mala, hettoɗia, epeɗia, elele ii mettama. Ge, Nug ulah naippa danab ah dilag nai doya mala, hettoɗia, epeɗia, elele ii mettama.

⁴ Amge nug geha kobol genab tutukku ele dim lamitta, nug daɗek danab ah dilag nai am epeɗia bappaidkku. Ao, nug nai doya mala hettoɗia epeɗia elele mettak kobol dim lamitta, nug danab ah huu laa ag keekenu tutu meppig daatteb, nug amu dilag nai am epeɗia bappaidkku. Nug ab, geha danab ah kobol nau heppig ag bu aoglag. Ao, nug geha naiib ab, nau hak danab ag mauhkkulag.

⁵ Danab nug matagiɗ tagatte, amubia ⌊Jesi buɗub⌋ nug genab tutukku hak kobol aɗa dim lamidkku. Ao, danab lamen tagatte, amubia geha nug oo metta ii uuak kobol haen oh dim lamidkku.

⁶ Nug anam heeb, haen laa amuppa, wulp ag geha sipsip nakkud ele daaglag. Amu lepad ag meeme nag ele daaglag. Makau nalkad, amu makau nalkad maɗ laippu aoppig ele, ag laion ele daaglag. Amu nid danab nakok, nid ahin nakok ele, ag doɗ amu atognoadkkulag.

⁷ Makau ag geha bea ele ee lakkulag. Ao makau nalkad, bea nalkad ele, ag oh laippu huu mena niiglag. Amu doɗ laion nug gikkiɗah, makau laatteb bia lakku.

⁸ Nid yuɗ, huh lanan, ekkuɗkkuɗ gotte ele, nug geha mat nau kobra teɗuabppa notte, oɗe amuppa qiɗ hekku. Nid yuɗ, anig huh aɗittom ele amu, nug eppeg bahieb, mat naunab nau teɗ oɗeppa noa, ooppa nokku.

⁹ Le yuppa ambeum, amubia danab ah huu ohnu, wan ohppa ag Yawenu dabmak amu aoppeg, ahilagppa ambekku. Anam daakku amunu, Yawenu qauko, qauko amuam Yawenu tituanak daatte, ⌊am qauko Sion aakku⌋ qauko amuppa ⌊wan ohppa ele⌋ laippu laa nug laa heeb ii nauhma; o keeke laa heeb ii nauhma, iitta!

Yawe Nug heeb, nuhikkud danab ah wan ohppa ukkak daatteb, ag eɗun ahilag wanppa gokkulag

¹⁰ Haen amuppa am inam daakku. Jesi buɗub nug geha king daakku. Nug pilak laa, pilak amuam ad elab attan ta ukkak galaeg daatte, nug amubia daakku, amu wanppan huu anen anen ohppan danab ah ag geha nuhigppa uɗin, gumidna dona, nug dooglagnu ba daakku. Nug anam dayebeb, wanppan wan ohppan danab ah ag nug gumidna goppeg, nuhig dayaknu aben am binag amahlak oppiaawak ele daakku.

¹¹ Aria haen amuppa Naɗi Nug baula inam hekku. Danab eppeg bahia, keeke laa aɗa, nug eppeg eɗua aotte, amubia Naɗi Nug nuhikkud danab ah oɗo yaak Asiria wanppa daatteb, Isip wanppa daatteb, Kus wanppa daatteb, Elam wanppa daatteb, Babilon wanppa daatteb, Hamat wanppa daatteb, yunu nudppa daatteb ele eɗua diikku.

¹² Naɗi Nug pilak laa, pilak amuam ad elab attan ukkak galaeg daatte, Nug pilak laa amubia galeb daakku. Nug pilak amu anam meeb, pilak amuam danab ah wan atu ohppanu ag anidna, ⌊pilak amuam Naɗi Nug nuhikkud danab ah ag diia ukka laih me dayak danab ah daatteb, Nug ag eɗua diikku ippunadkku⌋. Nug anam ha, Nug Israel danab ah ag diia ukka laih me dayak danab ah wan laalappa daatteb amu, Nug ag eɗua diikku. Ao, Nug Juda danab ah tamtam gona, aabaab daatteb, Nug ag eɗua diikku. Nug nuhikkud danab ah gona aben ohppanab daatteb eɗua diikku.

¹³ Israel huu ag Juda dilagnu, ihinigppa anam daalon dabmak iinab aɗan daamna, amu Juda ⌊ag Israel⌋ aqaglagnu dab-ii-memana. Ao, Israel huu ag Juda dilagnu, ihinigppa anam daalon dabmak ii aɗan daamna, amu Juda huu, ag Israel dilagnu, “Ag ihinig kekeɗ daatteb,” ii doomna. Iitta.

¹⁴ Israel huu, amu Juda huu ele ag geha buɗub laa aam nodeppa daatteb, ag am Pilistia danab, ag ag eɗadkkulag. Amu ag buɗub laa aam bedeppa daatteb, ag ag ele eɗadna, ahilkad keeke aoglag. Israel huu, Juda huu ele, ag Edom huu, Moap huu ele eɗadna, ag Amon ele eɗadkkulag. Eɗadppeg amu, Amon ag Israel huu, Juda huu ele waalagppa daaglag.

¹⁵ ⌊Amge haen Israel, Juda ele ag eɗun ii uɗippeg, haen amuppa⌋ Yawe Nug heeb, le kokoɗ uttug laih qaɗaietteb, Nug heeb, ulah gakkaɗak naunab ele uɗia, le Yupretis heeb, oppata, le naunau eblaih aɗit ele beeb, danab nug le mataɗkkunu uug iitta doya mataɗkku.

¹⁶ Yawe Nug anam heeb, nuhikkud danab ah oɗo yaak Asiria daatteb amu, ag ahilagppa ib ena beeb, ag eɗun ahilag wanppa uɗiglagnu ib uug iitta ena daakku. Haen matu anukkanab, Yawe Nug nuhikkud danab ah Isip uuglagnu ib ahilag heum, kobol anambia, amuppa geha Nug ib madakku.