Aisaia 10 - Nobonob Baibel

¹ ⌊Danab okkai⌋ ag ɗo nau qabatteb ele amu, ahilagnu gadonnab gadon. Ao, laa ag ɗo laala, ɗo amuppa ag danab ah laa eheɗ hadatteb amu, laa ag ɗo anam bappaidna metteb ele, ahilagnu am gadonnab gadon.

² Ag eheɗ henana, ɗo eheɗ amu qabattebnu diig am, ag daɗek danab dilagnu nai doya mala hettoɗia epeɗia elele mettak kobol dim lamidmananu ɗo nau qabatteb. Ao, ag dahilad danab ah keekenu tutu mak, nau daatteb ele, laa ag eppelagppanu keeke laa yab awom, ag hettoɗiakppa keeke amu eɗun aolob, o ag hettoɗiakppa kobol laala amubianu ehanittak laa aolob, amge ag amu dilag anam ehanadmananu, ag ɗo nau anam qabatteb. Ag ah qab, ag ahilag keeke yab aoglagnu anam hetteb. Ao, nid ag mamelkad mauhak ele, ag amu dilag keeke yab aoglagnu ag anam hetteb.

³ Ag anam hetteb amunu, Yawe Nug geha ahilag hak nau amu nob mekkunu haen tituanom, amuppa Nug ag uug naunab madakkunu dabmette amu, ag amu eɗidkkulagnu elelete? Iitta! Haen amuppa Nug danab wan laa umanu diieb, ag ulah ɠagattag uɗitte, amubia ag uɗin, ag ag eheɗ madappeg, ag geha attem hekkulag? Ag geha oolna, aun toppa ehanadkkunu gokkulag? Keeke kuɗum ag aoppig, geha ag keeke amu aben adekkuppa mekkulag?

⁴ Ag am keeke laa hekkulagnu ib iittanab iitta. Geha kekeɗ ag ag aqaglag, o iitta ag aɗualadppeg, ag ag eppelagppa daaglag. Anam, amge amuppa Yawe Nug nuhig oo nauhak am iinab bodoettama. Iitta. Nug ⌊bu tuɗitta madakkunu⌋ eppeg huma daakku.

Kayak Nug geha Asiria wan heeb nauhkku

⁵ Amu Kayak Nug atte. “Asiria danab ah dilagnu am gadonnab gadon. Gemu Asiria nug da eppelppa bu aɗak bia da aɗai dayeye, danab ah ag da oo nauhak meɗatteb amu, da amuppa ag uug matte, eheɗnab mataɗadttem. Ao, Asiria nug da eppelppa daɗib bia da aɗai dayeye, da danab ah dilagnu oppoɗi bak huanak doyeye, amuppa bu madattem.

⁶ Anam amu, da Kayak, da heppi, Asiria danab, ag danab ah laa, danab ah amu ag dahilnu, dahil haknu ele uuak dootteb, ⌊am Israel danab ah aakku,⌋ da ag danab ah dahil amu bu mattaglagnu ahilag wanppa gokkulagnu gokkulag. Ao, da, Kayak, da Asiria ag danab ah amu ag oo nauhak da meɗatteb, ⌊am Israel danab ah aakku,⌋ da ag danab ah dahil amu dahil bu aoglagnu heppi, ag ahilagppa gokkulag. Da Asiria ag banelag gona, Israel dilag keeke, ahilag en ele aoglagnu heppi gokkulag. Yo, da Asiria ag gona, Israel eheɗ hattan, tappaladppeg noppeg, oɗoɗadna autna aoglagnu heppi gokkulag.

⁷ Amge dahil dabmak amu, Asiria kingnu dabmak ele laippu ii daama. Nuhig dabmak am laa daakku. Aɗinu? Nuhig dabmak am nug wan imuppan wan kuɗum heeb nauhna, iitta mekkulagnu daakku. Nuhig dabmak am anam daakku.

⁸ Anam amu, diig amunu nug ⌊beɗu akoniaya⌋, ‘Dahil ban danab ikkilkad ag anen anen ag king bia iite daatteb?

⁹ Wan da eɗatten, aab okkai ahilag aomi ele, aab okkai amuam Karkemis, Kalno, Arpat, Hamat, Damaskus, am Samaria ele. Ag oolagppanu laa nug da eɗilkkunu elele iitta. Iitta! Da laa dilagppa hemi bia laa ohppa anamib hemi.

¹⁰ Wan imuppan wan laala da hei nauheg, tappalatti noppig ele amu, amu dilag kayak hambuppuak dottolkad kuɗum daappig, amge ahilkad kayak hambuppuak ag ag ii ehanadppig; da ag eɗadmi. Ahilkad kayak hambuppuak dottolkad amuam Jerusalem, Samaria ele dilag kayak dottolkad eɗadppig, amge da ag oh eɗadmi.

¹¹ Da ag oh eɗadmi, amubia da Jerusalem eɗidkkul. Genab, da Samaria, ag ahilkad kayak hambuppuak dottolkad ele oh hei nauhppig, amubia da Jerusalem ag ahilkad kayak hambuppuak dottolkad ele oh heppi nauhkkulag,’ awa atte.” Kayak Nug anam awa atte.

¹² Anam amunu, am inam bekku. Asiria dilag king nug dada danabnab daya haaha, nug ele beɗuppa tak kobol dim lamittatta, nai maditte amunu, Naɗi Nug heeb, Asiria dilag king nug keeke oh Sion qaukoppa Jerusalem appa hekkunu Naɗi Nug ana, nug eppegppa meum ele amu, nug amu oh ha maleb, dimppa geha Naɗi Nug dada ha laa eɗittaknu dabmak awak hak kobol nuhignu, beɗuppa tak kobol nuhignu ele, Nug diig amunu bu medakku.

¹³ Aɗinu? Asiria dilag king nug ⌊laa oh dabatta,⌋ inam atte “Da dakka dahil ɠagattagppa da amu oh aakku hemi. Da am keeke amu oh hekkulnu doyak dabmak ena ele, da amu haknu amu, da am diignu doyak tutukku ele daattem amunu, da hemi. Da hei, gemu wan imuppan wan amu oh ag da waalppaib daatteb. Ag ahilkad keeke ena ena qagmaatteg dayom am, da amu oh aomi. Da am danab ɠagattagnab dayeye, da wan amu dilag king oh, da tappalatte oɗoɗatti noppig.

¹⁴ Wan amuppan danab ah dilag enub am, oppa laa ai teɗ laappa daatteb bia daaeg, da aomi. Danab nug ai teɗ laa, ai anig oola ukka ii daatte, nug teɗ amu ooppa oppa daaegeg diiadtte, amubia da wan anen anen diiatti, da waalppa daatteb. Amu da ag, ag enulag ena ena ele aɗadkkulnu amu, da am danab ɠagattag dayeye, laa nug da tappiɗeb nokkulnu elele iitta; da aakku aomi. Ai anig nug laa nug oppa aomanu ewawa, haugppa laa amu lamidkkunu hette amu, laa amubia dahilnu ii heum,” awa atte.

¹⁵ Amu king nug anam atte, amge Kayak Nug atte. “⌊Da am Kayak amunu, da oɗmak imu oɗ mettem.⌋ Hebeb laa nug nukka nuhignu, ‘Okkai am da dakka; da amu, da danab nug da aɗaila, ad okkultte ele, da nug eɗidttem,’ attete? Amu so laa nug nukka nuhignu, ‘Da okkai daattem. Da laa nug da aɗaila uɗat hette ele, da nug eɗidttem,’ attete? Bu laa am danab aɗatte ele huma he, nuhigppa laa bu medattete? Daɗib laa ele danab aɗatte ele humattete? Amu oh iitta!” awa atte.

¹⁶ ⌊Keeke danab eppegppa daatte ele, keeke amu aha, danab aɗatte aben ii aotte, amge Asiria dilag king nug anam hekkunu hette⌋ amunu, Naɗi, Nug Yawe Nukka Ɠagattag Oh Ele, Nug heeb, oɗe nau nuhikkud daup ɠagattag aqeb, ag beɗulag aakku nauhkku. King amu nug ɠagattagnab, amge aab ewewe, ⌊ad keeke iitta mette,⌋ amubia Yawe Nug heeb, nuhig ɠagattag iitta mekku.

¹⁷ Yawe, Israel dilag amahlak, Nug aab ewak bia daakku. Ao, Israel dilag Kayak Oppiaawak Ele, Nug aab aɗu bia daakku. Nug anam dayaya, aab uud keeke qaun ele qaɗaiettaknab oh ewe iitta mette, amubia deɗ laippuppa Nug heeb, Asiria dilag daup ag padal mekkulag.

¹⁸ ⌊Asiria dilag daup ag am⌋ atuppa, ad huanaknab daatteb, o ad meu otteb dadppa eppak kuɗumnab daatteb, ⌊ag amubia daatteb, amge⌋ Yawe heeb, ag iitta mekkulag. Ag danab nug oɗe nau awa, ebehi teete ukke mauhtte, ag amubia iitta mekkulag.

¹⁹ ⌊Aab atu ewa male,⌋ ad laippu laippuib daatteb, amubia Asiria dilag daup laippu laippuib daappeg, nid nakok laa nug ebaqakkunu elele.

Israel danab ah huu ameg nakok am geha eɗun uɗiglag

²⁰ Amu haen amuppa am inam bekku. Israel danab ah ag oɗo yaak danab ah ⌊daaglag⌋. Ge, Jakop buɗub laippu laippu qagaiettakppa ii mauhadppig amu, ⌊ag daaglag⌋. Ag daanna, ag wanppanu okkai laa nug eheɗ hattom ele, ag nuhignu ehanittak aoglagnu ii dabmemana. Iitta. Haen amuppa Israel ag Yawe, Israel dilag Kayak Oppiaawak Ele, Nug ag ehanadkkunu ag genabnab Nug onigppa enana, ameg mekkulag.

²¹ Amu danab ah oɗo yaak daaglag amu, ag eɗun uɗiglag. Ao, Jakop buɗub oɗo yaak daaglag amu, ag geha ⌊oolag eɗueb daanna,⌋ ag eɗun, ahilag Kayak Ɠagattag Okkai Ele, ag Nug waappa daaglag.

²² Amu O Israel danab ah, danab ah oɗo yaak daaglag, agib eɗun uɗiglagnu diig am, Yawe, Nug haen oh kobol genab tutukku ele dim lamidtte amu, Nug amu dim lamittatta, ag bu eheɗ matteb nauhkkulagnu aum daatte amunu, ag gemu huanaknab yu ihippa abuɗ niitte, ag amubia daatteb. Amge geha laippu laippuib, ag oɗo yaak daaglag. Daanna, ag eɗun Yawe gumidna uɗiglag.

²³ Ag Israel danab ah, Naɗi, Nug Yawe Nukka Ɠagattag Oh Ele, Nug ag bu eheɗ aon nauhkkulagnu aum amu, Nug geha uug naɗinab amu anamib heeb bekku.

Yawe Nug Asiria eheɗ nau madakku

²⁴ ⌊Ag Israel danab ah, laippu laippu qagaiettakppa ii mauhadna, eɗun⌋ uɗiglag amunu Naɗi, Nug Yawe Nukka Ɠagattag Oh Ele, Nug inam atte. “Danab ah dahilad Sion daatteb ag Asiria ag buppa makkuɗadna eheɗ hadatteb, anukka Isip ag ahilagppa daɗibppa heppig bia hetteb amu, ag amu dilagnu aib baɗappig.

²⁵ Aɗinu ⌊ag ii baɗamna⌋? Da ag Israel, da ahilagnu oo nauhak doomi amunu, Asiria ag gemu ag anam eheɗ hadatteb, amge dahil oppoɗi bak ahilagnu daatte iitta mekkunu am haen elab ii daatte; haen tutu daatte. Haen amu maleb, dimppa da geha eɗue awe, Asiria eheɗ madakkul,” awa atte.

²⁶ Amu Yawe Nukka Ɠagattag Oh Ele, Nug inam hekku. Nug Asiria geha buppa makkuɗadkku. Nug men laa Orep daatte, Nug amu guguittak Midian makkuɗattom amu, Nug amubia makkuɗadkku. Geha Nug eppeg huma dayaya, Asiria makkuɗadkku; anukka Isip dilagppa he, ag Le Kokoɗppa padal meppig, amubia ahilagppa hekku.

²⁷ Haen amuppa Yawe Nug heeb, ag Israel, ag uug laa Asiria ag madatteb ele amu, ag uug amu baula ii maomna. Ag Israel, ag Asirianu uug baula ii maomna.

Kekeɗ ag uɗin, Israel wan oh tonaglagnu kaya

²⁸ O gadon, kekeɗ ag uɗin, aab okkai Aiat, aab amuppa dona uɗin, aab okkai Mikron appa dona uɗiglag. Ag uɗinna, ag ahilag ee, amu keeke laala ele, ag keeke amu aab okkai Mikmas, ag appa mekkulag.

²⁹ Appa mewona ag gona, qauko ikki oppoɗu noakppa nona, aab okkai Geba, appa haen tutu dayaknu aab kalaglag. Ag appa niibppeg, danab ah Rama aab okkaippanu ag eheɗ baɗaglag. Baɗappeg, King Saul appag diig Gibeanu danab ah ag ahan, aab uun, ag oolna gokkulag.

³⁰ Ag Galim aabnu danab ah, ag baalag okkaippa huan eig! Laisanu danab ah ag daulag humeg! Aab okkai Anatotnu danab ah, ag nai nob meig!

³¹ Aab Matmenah danab ah ag oolna gobeppeg, Gebimnu danab ah ele ag oolna, lokkumak aben mattin gokkulag.

³² Ag oolna gobeppeg, deɗ amuppa kekeɗ ag gona, Nop aabppa tekkulagnu tekkulag. Ag appa tena, ag appaib daaglag, tuɗidna ii gomana. Ag daanna amu, ag eppelag bitakkan human epponna, neegppeg Sion qaukoppa gokku. Ao, ag tena, eppelag bitakkan human epponna, neegppeg aab okkai Jerusalem gokku.

³³ Amge Asiria daup, ag dabmeig! Naɗi, Nug Yawe Nukka Ɠagattag Oh Ele, Nug geha nuhig ɠagattag okkai naɗi ele, Nug amuppa oɗoɗadkku. Nug geha ahilkad danab okkai oh, danab onilag ele oh ele tabatteb nokkulag. Gemu amu, ag ad elab daatteb, ag amubia teppig daanna hetteb, amge geha Nug ag oatteb, qiin gona wanppa qekkulag, ad qiia ukka, wanppa qette, ag amubia hekkulag.

³⁴ Danab nug ad naunau huanak hebebppa oadtte, amubia Yawe Nug heeb, Asiria ag anam iitta mekkulag. Lebanon appa ad okkai elab elab dubuppa daatteb, danab ag gona oadtteb, amubia Laa Ɠagattag Ele, Nug heeb, Asiria ag nena qekkulag.