Aisaia 1 - Nobonob Baibel

Digmaknu nai

¹ Juda dilag king Usia, Jotam, Ahas, Hesekaia ele ag haen anen anen king daaegeg, Yawe Nug Juda danab ah oh, laa Jerusalemnu, laa Juda wanppa laih laihnu amu, Nug amu dilagppa aɗi bekkunu Amos bekka Aisaia miagib ippunittom amu, amunu nai am iikku.

Kayak Nug danab ah nuhikkud daulag batatte

² Hab daup ag nai doyeg! Wan danab, ag daulag human doyeg! Aɗinu? Yawe Nug inam atte. “⌊Juda danab ah ag⌋ am nid naunau dahilad. Da ag atognoatten bekkadmi, amge ag da waalppa daaglagnu uun, dahil nai tappaeg ne oitteb.

³ Makau okkai ebehi ele ag mamelag dootteb. Donki ag aben adekkuppa mamelag ee madatte, aben amu ag dootteb, amge Israel danab ah ag ⌊da⌋ ii dooiɗtteb. Ge! Dahilad danab ah ag da, ⌊laa iitta, daib ag ehanadttem amu, ag amunu⌋ diignu doyak tutukku iitta ele,” awa atte.

⁴ O gadon! Israel danab ah ag hipunin danab ah daatteb. Ag beɗulagppa aab okkainab ele. Israel anilkad mamelkad ele, ag nau hak danab ah. Kobol diig ena iitta uɗig wak ele Israel beɗulagppa ambeum daatte. Ag Yawe uuidppig oitteb. Ag Yawe, Nug am Israel, ahilag Kayak Oppiaawak Ele amu, ag nuhignu uuaknab doon oitteb. Ag Nug dimettan autna aoppig oitteb.

⁵ ⌊O Israel danab ah,⌋ aɗinu ag nai tappe nak kobol tuɗidna henana oitteb? Aɗinu ag bu baula aoglagnu hetteb? Israel ag nid laa, hibguitta haaha, bu awe, mukki gaɗa laɗue ukke, beɗu laa oh ele ihi mettom, ag amubia nauhppig daatteb. Ao, Israel ag nid laa beɗu oh oɗe ele, amubia ag nauhna autna aoppig daatteb.

⁶ Israel ag ⌊nid amu⌋ beɗu oh baegppanu ukka igippa tak nauha autanab awa, oppatpat ne, ena iittanab dayaya, beɗu ohppa ebitta bak, ihi nau, ihi okkai okkai ele ⌊bia daatteb⌋. Ihi amu laa dubuttid ii daamanu ii ihappig. Laa ii itappig. Laa ag ihinu guittak iitta mekkunu marasin laa ii laidppig.

⁷ ⌊Nid amubia amu,⌋ wan ahilag am wan hele-ettak daatte. Ao, aab okkai ahilkad amu, aab ewattom daatteb. Ag Israel ag neekkadna daaegeg, kekeɗ ag ban hena, keeke ahilag dad okkaippanu ag akkan, aon gotteb. Wan laappan kekeɗ ag wan laa heeg nauhakib daatteb, amubia ag ahilag heeg nauhe, wan ahilag amuppa keeke laa ii daatte, wan amu hamu daatte.

⁸ Kekeɗ ag heeg, Sion nukkaib daatte. Nug grep dadppan peh ⌊uɗat malak haenppa⌋ nukka, hamu daatte amu, nug amubia daatte. Ao, nug dadppan peh ⌊uɗat malak haenppa⌋ nukka, hamu daatte amu, nug anam bia daatte. Nug kekeɗ ag aab okkai laa talilidna, oo mettaeg, aab amu nukka, piɗe daatte, amubia Jerusalem nukka ⌊laa nug ehanidkkunu iitta⌋ aakku daatte.

⁹ Anam amu, Yawe Nukka Ɠagattag Oh Ele, Nug ihinkad danab ah laib laib he daatteb. Nug anam ii helo amu, geha ig oh Sodom danab nauhppig bia nauhlom. Ao, Nug anam ii helo amu, ig Gomora danab padal meppig bia padal melom.

¹⁰ Anam amu, gemu ag ⌊Jerusalem ikki danab, ag⌋ Sodom ikki danab ⌊bia amu⌋, ag Yawenu nai doyeg! Ao, ag ⌊danab ah Jerusalem daatteb, ag⌋ Gomoranu danab ah ⌊bia amu⌋, ag Kayak, ihinig Kayak, Nug nuhig ɗo nai ig ippunigtte amu, ag ele daulag human, ɗo amu doyeg!

¹¹ Am Yawe Nug inam awa atte. “Ag doɗ kuɗum main meɗatteb, amge da amunu ool ii hette. Ag sipsip dawainu manaknu ofa hena, amu doɗ ittag huanak ele, ag doɗ amu ittag main meɗatteb, amge da matu elele aomi; da baula aokkulnu ool iinab daatte. Ag makau dawai, sipsip gaiɗ, meeme dawai ele manadna meɗaglagnu henana, ag baalag otaɗattegeg, tiilag nette, amge da tiilag amunu oolppa ena ii doottem.

¹² Ag uɗin, da noolppa mettid hekkulagnu da laul ooppa notteb, ⌊amge⌋ aun aum amunu, ag appa talilin, laih gona laih uɗinna, muttub qenana oitteb?

¹³ Ag mana mettak hamu haen oh aon uɗitteb amu, da mana mettak amunu, da ool ii daatte. Ag amu baula aib heppig! Ag uueg! Ag kalu danab ile, muttuɗig enanag bette amu, ag kalu amu amotna, da meɗatteb, amge da noolppa danab uɗig naunab doya, baula dookkunu ooppa uuaknab dootte, amubia da doottem. Ag kalam bau deɗppa, Sabat deɗppa, amu Kayak dabmekkulagnu deɗ laala eleppa ag qagmenana, ⌊oɗelagppaib da binal menana,⌋ nau ele hetteb. Da qagmak eheɗ ahilag amu baula anidkkulnu ool iinab daatte.

¹⁴ Ag ahilag Kalam Baunu qagmak gamag ahak ele henana, amu ag hobul dayaknu haen epeɗiak, ag deɗ amuppa ele hobul hetteb, amge ⌊ag hipunin ele tuɗidna hetteb amunu⌋ da nau ninig ele doottem. Ag anam henan, uug da qaɗelppa meeg, da uug amu maottem. Genab, uug amu da iwe, da beɗul bahi yaatte.

¹⁵ Amunu, ag geha ag eppelag attan human, da unuqilkkulag amu, da ag ii doyadpa, da ag ii anadpa. Ag unuqittak kuɗum hekkulagtai, ⌊amge⌋ ag amu hekkulag dayeb, diig amunuib da dookkulnu daul ii humapa. ⌊Aɗinu?⌋ Ag eppelagppa danab tiilag ambak daatte.

¹⁶ Ag nau heppig amunu, ⌊danab nug beɗu dubuttid ele le layowa, dubittid iitta daatte bia,⌋ ag oolag bappaidna, dubuttid iitta dayeg! Ag hak nau da amelppa baula aib heppig. Ag baula eheɗ aib heppig.

¹⁷ Ag dabmak ena aon, kobol genab tutukkuib hekkulagnu dabmettan, aon aɗan oiyeg! Ag kobol genab tutukku amu henana, ag nai doya mala hettoɗia epeɗia elele mettak kobol dabmenan, dim lamitteg! Ag danab laala ag lailkad laa, ɠagattag nakokib eheɗ hadatteb ele amu, ag hak nau amu bappaladnana, eheɗ hak danab bu matteg! Ag nid ag mamelkad mauhppig ele, ag hettoɗiakppa atognoatteg! Ag ah qab, laa ag amu dilag eheɗ hadatteb anidna, ag hettoɗiakppa, o adekkuppa ag ah qab amu ehanadnana, atognoatteg!” Yawe Nug anam awa atte.

¹⁸ Amu Yawe Nug atte. “Ag uɗippeg, ig qagmeta, nai mattit, hettoɗit, elele hekkunig. Ahilag hipunin am ⌊naunab,⌋ gau kokoɗnab ⌊lamen hakkab laitte, ihaknu elele iitta⌋ biatai; ⌊hipunin ahilag anambia daatteb dayeb am ena iitta,⌋ amge ⌊da hipunin amu oh uhuqen madakkulnu elele. Anam amu, da uhuqatten madappi,⌋ ag eɗun ⌊lamen ihaeg, eɗua hakkabnab daatte, hakkab amuam snonu hakkab bia,⌋ ag anam bia daaglag. Ge! Ahilag hipunin am ⌊naunab nau,⌋ gau kokoɗnab ⌊lamen hakkab laitte, ihaknu elele iitta⌋ biatai. ⌊Ag anambia daatteb dayeb am genab ena iitta,⌋ amge ⌊da hipunin amu oh uhuqen madakkulnu elele. Anam amu, da uhuqatten madappi,⌋ ag eɗun ⌊lamen ihaeg, eɗua hakkabnab daatte, hakkab amuam sipsip uɗignu hakkab bia,⌋ ag anam bia daaglag.

¹⁹ Ag ⌊dahil nai dim lamidkkulagnu⌋ oolag heeb, da aakkuib oɗel dim lamidkkulag amu, geha ag wanppa ahilag dayak ena ele daanna, ee ena ena dad ahilagppanu aon lanana daaglag.

²⁰ Amge ag dahil nai ii dim lamidkkulag dayeb, ag da waalppa dayaknu uun, nai dahil tabappeg neeb, geha kekeɗ dilag qep elab ag laadkku.” Yawe Nug anam mattiom daatte amunu, am anam bekku.

Jerusalem danab ah ag Kayak uuna, dimedappig

²¹ O gadon! Aab okkai Jerusalem am ah laa bia daatte. Ah amu nug gamu ele pehettak, elele oipiɗ, amge dimppa ah amu nug gamunu oo metta ii uuak kobol ii dim lamitta, gamu uuitta, ib baag ah ba oiyom. Amu Jerusalem amubia daatte. Nug anukka Kayak pehettak, elele dim lamittom, amge gemu nug amu ii hette. Anukka nai doya mala hettoɗia epeɗia elele mettak kobol nuhigppa ambak dayom; genab tutukku hak kobol nuhigppa ele ambak dayom, amge gemu qe mauhak danab, ag nuhigppa ambeppig daatteb.

²² Jerusalem anukka na silwa ena, ⌊na amubia⌋ daame, amge gemu na kapa tiig bak, ⌊na amubia⌋ beme daattem. Anukka na wain ubuhi ele, ⌊na amubia⌋ daame, amge gemu na wain le ele kaboliak ⌊bia⌋ daattem.

²³ Jerusalem, nahipad ikki danab ag am tappe nak danab. Ag yabhok danab ele layam batappig. Nahipad ikki danab ag lokkumakppa eheɗ haknu ehanittak aoglagnu oolag huana hette. Ao, nahipad ikki danab ag keeke ahilag daakkunu hamu mettak aoglagnu wagai metteb. Ag hettoɗiakppa nid ag mamelkad mauhppig ii ehanadtteb. Ag ah qab, ag amu dilag uug ele anidna, tutukku mettan ii ehanadtteb.

²⁴ Jerusalem, nahipad ikki danab ag anam hetteb amunu, Naɗi, Nug Yawe Nukka Ɠagattag Oh Ele, Nug Israel dilag Kayak Ɠagattag Okkai Ele, Nug ahilagnu inam atte. “Da geha dahilad kekeɗ bu eheɗ madakkul. Da geha ag eheɗ heppignu nob tutukku madakkul.

²⁵ ⌊O Jerusalem, danab amu ag nahip-ppa dubuttid bia daatteb amunu,⌋ da na uug mette, geha ⌊danab ag silwanu dubuttid na gokkunu aab gakkaɗak naɗippa manatteb, amubia⌋ da eɗue, nahip hak nau bappaidppi, na geha dubuttid iitta, oppiaawak bekkut. Ao, da geha ⌊danab ag silwanu dubuttid na gokkunu aab gakkaɗak naɗippa manatteb, amubia⌋ na tutukku daakkutnu bappaidkkul.

²⁶ Da geha Israel danab ah dilagppa da epeɗiak danab bau, ahilag hak tutukku ele anukka daappig bia madappi, ahilkad epeɗiak danab daaglag. Da ahilkad ulum mettak danab ele digmakppa daappig, amubia heppi bekkulag. Da anam heppi, amu geha laa ag Jerusalem, nahipnu inam akkulag. ‘Aab okkai amuam Kayaknu oo metta ii uuak kobol dim lamittaknu aab okkai,’ amu ‘Nai doya mala hettoɗia epeɗia elele mettaknu aab okkai’ ele aon akkulag.” Kayak Nug anam atte.

²⁷ Yawe Nug nai doya mala hettoɗia epeɗia elele mettak kobol dim lamitta heebeb, Juda danab ah ag laa eppegppa dayaknu qagaiettakppanu eɗua uhuqak ha madakku. Nug genab tutukku hak kobol dim lamitta haaha, Sion danab ah, ag oolag eɗuom ele, Nug ag laa eppegppa dayaknu, qagaiettak amuppanu uhuqadkku.

²⁸ Amge hipunin danab, danab ah ag Yawe waappa dayaknu uun, nuhig nai tappaeg nette ele amu, Yawe Nug hatteb, padal mekkulag. Yo, aun aɗi ag Yawe uun dimedatteb, geha ag mauhkkulag.

²⁹ Ag ad ok, ⌊ag amu waalagppa kayak hambuppuak noolagppa dup nona binalag metteb,⌋ ag ad amunu enanagnab dootteb ele, ag amunu uɗalag nekku. Genab, ag dad ena ena, ⌊amuppa ag kayak hambuppuak noolagppa dup nona binalag mekkulagnu⌋ tituantteb amu, ag amunu laa noolagppa uɗa nak nau guittak ele dooglag.

³⁰ Ag ad ok uɗug bunaɗna netteb, ag amubia iitta mekkulag. Ag danab ee eppaeg, aam haenppa bunaɗtte, amubia ag anam qettoɗkkulag.

³¹ Haen amuppa danab ɠagattag ag gikkiɗah bunaɗak bia daappeg, ahilag kobol nau amu aab ewawa, attokke na amu, kobol nau ahilag am aab aeg amubia daakku amunu, aab ewawa, aab adokka na, aeg ta he, gikkiɗah eotte, amubia uɗat nau amu ahilagppa anam hekku. Anam bia hipunin danab ag nob nau aoglag. Amu haen amuppa danab laa nug ag ehanadkkunu laa iitta.