2 Timoti 4 - Nobonob Baibel

¹ Jesus Kristus Nug eɗua uɗikku, nuhig ɗo maɗoɗ ele daakku, Nug bau dayak aɗi amu mauhak aɗi ele epeɗiadkku amu, da Nug amu Kayak ele, aa noolahppa na uɗat imu hekkutnu ɠagattag amenppa attem.

² Na amunu dabmak aonna, nai nuhig mehuqe! Danab ag nahip nai dooglagtai o iitta iitai doomna, amge na haen oh Kristusnu nai mehuqe! Haen oh ag Kayaknu kobol dim lamidkkulagnu na ag toliadna, daulag batan, oolag ɠagattag ele aqe! Na amu henana amu, na oo maɗoɗ doon, ippunittak ele pehettaknab he!

³ Aɗinu? Dimppa haen laa amu danab ag ippunittak nai genab ena ele uuglag. Ag akka ahilag dabmak dim lamidna, ippunittak danab hambuppuak kuɗum diiglag. Diippeg, ippunittak danab amu ag nai laala, danab ag dooglagnu oolag niitte ele, amu appeg dooglag.

⁴ Amu ag doyak diig genabib dimettana, kaya hamu amunuib daulag human dooglag.

⁵ Amge nahipnu amu, na haen oh dabmak amahlak ele daye! Uug haenppa na ɠagattag daanna oiye! Kayak nai mehuqak uɗat am na he! Na Kayaknu mehuqak danab daakkutnu amu, na aɗi uɗat hekkutnu daatte amu na he!

⁶ Dahilnu amu, da mauhkkulnu haen miag do, da gokkulnu aakku haen malom; danab ag wain gokkaɗaknu ofa Kayak medatteb, da amubia daattem.

⁷ Da Jesusnu uɗat ena hein malen, da aɗi uɗat hekkulnu dayom amu hein, gogppa tein, da dahil ooppa genab doyak ele aɗami,

⁸ amu gemu nob ena da aokkulnu amu, Kayak Nug aakku meum daatte. Nob ena amu Naɗi, Nug danab ah tutukkuib epeɗiadtte ele, Nug eɗua hibaittaknu deɗppa da meɗakku. Amge dakkaib iitta. Aun laa oh ag Nug eɗua uɗikkunu tappaɗidna daatteb ele, Nug ag ele madakku.

Polnu uɗat malakkunu hette

^9-10 Demas nug wannu haen imunu keekenu oo mauhe, da uuiɗa Tesalonaika ukkom. Kresens nug Galesia ukkom, Taitus nug Dalmatia ukkom amunu, na wagai mena, paha da gumiɗna uɗie!

¹¹ Luk nukkaib da ele daattep. Mak nug da uɗat hettemppa ehaniɗkkunu elele amunu, haen na uɗikkut amu, na nug aoppe, aa oh uɗieɗ!

¹² Da Tikikus mei, Epesus ukkom.

¹³ Na uɗinna, ulahnu lamen dahil Troas appa Karpas laugppa appa uumi daatte amu, na aon uɗie! Buk itoɗiak oh ele akkan uɗikkutnu ool daatte, amge buk laa, ag buk amu keeke laa onig pasment, amuppa heppig ele amu, na amu aon uɗikkutnunab ool daatte.

¹⁴ Aleksander, nug am keeke brasppa hak doyak danab amu, nug da eheɗnab heiɗom. Dimppa Naɗi Nug kobol nug heum ele, amunu eleleppa nob medakku.

¹⁵ Na ele nuhignu dabmena autna awe! Aɗinu? Nug ihinig nai tappeb na autanab aokkunu dabma heum.

¹⁶ Tatam da hettoɗiakppa meiɗppig amu, laippu laa da ii ehaniɗom, ohnab da uuiɗna malappig, amge da aab ag qaɗelagppa ii nemanu Kayak unuqidttem.

¹⁷ Ag anam heppig, amge iitta aɗi, ag hettoɗiak abenppa daappig, ag ele Naɗinu nai oh dooglagnu, ele amu, da nai amu madikkulnu elele daakkulnu Naɗi Nug da ehaniɗom, ɠagattag ele meɗom. Amu Kayak Nug da laion oɗeppanu behiɗom.

¹⁸ Ao, Naɗi Nug laa dilag eheɗ hak ohppanu eɗua awiɗa, da nuhig hab aabppan ɗo maɗoɗppa daakkulnu Nug ena omaiɗa, appa gokku. Binag amahlak oppiaawak ele hanhan alet ele nuhigppa dayaɗ! Genab.

¹⁹ Na Prisila, Akwila amu Onesiporus baekkudppa ele humittak dahil imu appe doyeg!

²⁰ Erastus nug Korint appanu ii ahom; appan daatte, amu Tropimus nug am oɗe ele amunu da nug Miletus appa uuidmi daatte.

²¹ Na haen gamag imuppa, oug haen iitta imuppa wagai mena, paha gumiɗna uɗie! Yubulus, Pudens, Linus, Klodia, amu ig lainkad laa oh ele na humidtteb.

²² Naɗi Nug, amu nuhig ehanittak okkai hamu mettak ele nahip-ppa dayeɗ!