2 Timoti 3 - Nobonob Baibel

Haen gamag imuppa amu kobol nau kuɗum bekku

¹ Amge na doye, gog tak haenppa uug naunab bekku.

² Danab ag akka akka ahilagnu, amu men doɗonu ele oolag mauhkku. Ag akka beɗulag humana, ag dada kobol hena, dabittak nai ele mattiglag. Geha ag anilkad mamelkad oɗelag tabappeg neebeb, ag anen anen ag laanu, “Ena hen meɗame,” ii doomna. Ag oppiaawak ii oimna.

³ Ag tiilag laippu ele dilagnu oo mauhak ii doomna, ag laa dilagnu uhuqa mettak kobol ii hemana. Ag baeg qak nai mattiglag, ag akka ahilag oiyak pehettak atognoak kobol ii hemana, dakkuɗ kobol hena, ag kobol enanu kekeɗ daaglag.

⁴ Ag kadoi layag kekeɗ eppelagppa mak kobol, ahilag dabmak nau paha dim lamittak kobol, amu enaen mak kobol ele hekkulag. Geha ag beɗunu gamag ahak digdig kobol amunuib oolag mauhebeb, Kayaknu amu oolag ii mauhma.

⁵ Ag Kayaknu kobol amu gaɗalagppaib, danab amelagnuib hekkulag, amge Kayak kobolnu ɠagattag amu, ag dimettaglag. Na danab amu dilagnu qe mena oiye!

⁶ Danab amunu laala ag haen oh oqeqaɗakppa ah dabmak tutukku iitta ele laulkadppa tena, hambuppualadna heeg, ah amu ag amu ag danab amu dilag dabmak dim lamidtteb. Ah amu, ahilag oiyakppa ag hipunin digdig heegeg, beɗulkadppa aab daye, ag beɗunu oo gamag ahak kobol eheɗ oh dilag eeɗak doon, amu dim lamidkkulagnu dabmak aotteb.

⁷ Ah amu ag haen oh ippunittak nai dooglagnu hetteb, amge ag doyak diig genabib aoglagnu elele iitta.

⁸ Anukka Janes, Jambres ele aa Moses kekeɗ medapiɗ bia, danab amu hetteb ele, ag am doyak diig genabibnu kekeɗ daatteb. Dabmak ahilag aakku nauhom, ahilag ooppa genab doyak amu hambuppuakib.

⁹ Am ahilag kobol amu ele okkai ii mema. Ahilag dabmak, anukka danab ag Janes, Jambris ele dilah Kayak dab-ii-maama hak kobol miag atiak anidppig, amubia gemunu danab imu dilag Kayak dab-ii-maama hak kobol ahilag am danab oh noolagppa miag atiak daakku.

Timoti nug Kayaknu nai ooppa aɗakkunu nai

¹⁰ Amge na da ele oiɗa, na dahil ippunittak nai, dahil oiyak kobol, uɗat da hettem ele diig aɗinu da hettem amu, na amu oh doottem. Na amu doon, na ooppa genab doyak dahil, oo bodoettak kobol dahil, oo mauhak kobol dahil, amu uug mawewe ɠagattag dayak kobol dahil ele na doottem.

¹¹ Amu danab ag Antiok, Aikoniam, Listra appa dahilppa kobol nau kuɗumppa eheɗ heiɗna, guittak ele meɗappig amu, keeke amu ohnu amu na doottem. Ag eheɗ heiɗak amu oh heppig, amge uug amu ohppa Naɗi Nug da ehaniɗe, da ii nauhe autenab aomi.

¹² Amu aun laa oh ag Kristus Jesusnu daanna, ag genab tutukku danab daaglagnu oolag daatte ele amu, ag eheɗ hettak aoglag.

¹³ Amge danab nau, hambuppuak aɗi ele, ag kobol nau henana, tuɗidna naunab henana, ag laa hambuppualattegeg, laa amu ag ele ag hambuppualadkkulag.

^14-15 Amge nahipnu amu na Kayak, nuhignu nai, nai amuam na doyak dabmak ena ippunitta heeb, na Kristus Jesusnu ootppa genab dooppe, Nug na eɗua awidkkunu elele daatte, na nai amu nid nakok daanna, digmen doona, na nai amu oh doottem, laa ippunidppig ele na doyadttem amunu, na amu dabmenan, aɗi keeke ippunidppig ele, nai amu aɗan oiye!

^16-17 Kayak Nug he, nuhig nai oh aakku beum, amu ig Kayaknu danab, ig babaittak daat, uɗat ena oh hekkunignu elele daagnignu, nai amu ig ehanigtte. Attemun ehanigtte? Ig amuppa ippunittak aottem. Ig eheɗ hekkunig dayeb amu, ig daug batak megatte. Ig ena ii oignig dayeb, ib tutukku ippunigtte, amu ig Kayaknu neekkakppa genab tutukku hak danab daagnignu ib ele ippunigtte.