2 Timoti 2 - Nobonob Baibel

Kristusnu daup ena dayaknu nai

¹ O da bekkal, na Kristus Jesusnu ehanittak okkai hamu mettak, na amuppa ɠagattag daye!

² Am nai oh dahil, da danab ah kuɗum noolagppa mattiyi doome ele amu, na danab diilag ena ele, ag am oɗe dim lamittak danab, ag laa nai amu ippunadkkulagnu elele amu, na ag amelagppa madippe doyeg!

³ Kristus Jesusnu daup ena nug hekkunu daatte bia, na anam oibppe, uɗat imunu uug ig Kristusnu daup laala ig ele oh laippu maognig.

⁴ Danab nug ban daup uɗat hette amu, nug wan imuppan uɗat laala ele ii aɗatte. Nug ban daup uɗat ena heebeb, ban daup ikki nug nuhig uɗatnu ena dookkunu aakkuib dabmette.

⁵ Laa nug, nug eɗittaknu qaiqaɗ gotte amu, nug qaiqaɗ ukkaknu ɗoppa qaiqaɗ gotte. Am nug ɗoppa qaiqaɗ ii gotte amu, nug laa oh eɗidkkutai, amge ag nug eɗittaknu keeke ii medatteb.

⁶ Amu ele, danab nug dad uɗat ɠagattag hette amu, nug dad amunu meu digdig tatam aokku am kobol tutukku.

⁷ Na da attem imunu dabmak aoppeppe amu, Naɗi Nug dabmak nahip matuleb, nai imu oh diig tutukku anidkkut.

⁸ Na Jesus Kristus, da Nai Ena madittem amubia, Nug Dawit buɗubppanu doum, Kayak he, Nug eɗua hibaittom amu, na amunu haen oh dabmenan oiye!

⁹ Da Nai Ena imu madittem amunu, danab ag dahilnu, “Nug am danab nau,” ana, uug digdig meɗatteb. Ao, ag amu oh henana, ag da maniguittakppa ele meiɗppig, amge Kayak nai amu maniguittak daakkunu elele iitta.

¹⁰ Amunu amu, da ool ɠagattag qetten, da Kayak Nug danab ah nuhikkud tituanattom, ag ele Kristus Jesusnu eɗua awikkak aon, haen oh hab aabppa daaglagnu, da ag ehanadkkulnu heinne, uug imu oh maottem.

¹¹ Imu nai genab. “Ig Nug ele mauhmut dayeb; ig Nug ele oh bau daagnig.

¹² Ig uug maognignu ɠagattag daattem dayeb; ig Nug ele keeke oh gumadkkunig. Ig Nug dimettagnig dayeb; Nug ig ele dimegakku.

¹³ Ig nuhignu oo metta ii uuak kobol ii dim lamidkkunig dayeb; Nug nuhig diignu oo metta ii uuak kobol dim lamidkku. Aɗinu? Nug nuhig diig attem daatte, Nug amunu oo metta ii uuak kobol ii dim lamidkkunu elele iitta.”

¹⁴ Na haen oh keeke imu oh nahipad danab ah ag daulagppa dokkunu amelagppa appe doyeg! Na Kayak noobppa ag amelagppa ag nau aomnanu nai ana, ag nai onig digdignu nug aib qeppig. Nai onignu nug qak, amuam meu iitta, danab laa ele ii ehanidtte. Kobol amuam danab ag nai amu dootteb amu, am ag he nauhtteb aakkuib.

Uɗat danab ena amu nug Kayaknu binag aotte

¹⁵ Kayak Nug nahipnu ena dookkunu na uɗat nahip pehettakib hekkutnu wagai me! Na maɗi nid nug nuhig uɗat enaib hette, diig amunu nug uɗat nuhignu uɗa ii nette, amubia na danab ah Kayak nai tutukkunab ippunatte!

¹⁶ Na nai Kayaknu dabmak dim ii lamidtte ele aib mattime. Aɗinu? Danab ah ag nai amu mattinna daatteb ele, ag Kayak dimettan, umanab gokkulag.

¹⁷ Danab nai amu maditteb ele, ahilag nai amuam ihilag nau anig yaak okkai mette, amubia okkai mekku. Danab amu hetteb ele oolagppa am Himeneus, Piletus ele.

¹⁸ Danab amunu amu, ag doyak diig genabib apiɗidna, ag inam atteb. “Mauhakppanu eɗua hibaittak am ba malom,” aon atteb. Ag nai amuppa danab laala ag ahilag ooppa genab doyak heeg nauhtte.

¹⁹ Amge Kayak Nug ukku aɗom amu, ukku amuam ɠagattag eppom daatte. Ukku amuppa nai inam daatte. “Naɗi Nug nuhikkud danab ah doyadtte.” Nai laa ele inam daatte. “Ag oh, ag Naɗi onig diitteb, ag kobol nau dimetteg!”

²⁰ Lag okkai laa ooppa tappiɗ laa golppa hak, laa silwappa hak, laa adppa hak, laa wanppa hak bia daatteb. Tappiɗ amu oolagppa amu, danab ag laalanu ena dootteb, amge laalanu amu enanag ii dootteb.

²¹ Amunu amubia danab laippu laa nug kobol nau oh amu lamitte ukke, nug oppiaawak daatte dayeb amu, nug am tappiɗ, nuhignu enanag dootteb, amubia nug Kayak amegppa enanag daakku; nuhig uɗat hekkunu elele. Nug aɗi uɗat ena oh hekkunu babaittak daakku.

²² Amu nid bau dilag dabmak eheɗ nahip dabmakppa beeb amu, na tabappe naɗ! Na kobol genab tutukku, ooppa genab doyak kobol, oo mauhak kobol, amu maɗoɗ kobol ele, laala ag oolag tutukku ele, ag kobol nau uun, kobol ena amu oh aɗan, Naɗi onigppa etteb ele amu, na ag hetteb amubia he!

²³ Amge na laa ag dabmak Kayaknu doyak iittappanu betteb, o dabmak kaaka ele, ag amunu nai aeg ona aeg dotte ele amu, na ag ele daan, nai amunu mattiaknu uue! Na doottem, mattiak amuam he, nug mehqak bette.

²⁴ Naɗinu maɗi nid nug am nug mehqak kobol ii hema. Iitta. Nug danab ah oh noolagppa oo bodoettak ele daakkuoitte. Nug ippunittak danab ena daakkuoitte, amu nug dagom ele dayaɗ!

²⁵ Nug laa ag nai nuhig tappaeg nette ele oo bodoettak kobolppa ag ib tutukku ippuanattaɗ! Kayak Nug ag oo eɗuak madakkunu, ⌊ag oolag eɗueb,⌋ ag doyak diig genabib tutukku dooglagnu nug anam hekku.

²⁶ Anukka Satan danab amu ag nug dim lamidkkulagnu nuhig aɗppa maattom, amge Kayak Nug heeb, ag oolag eɗueb, ag nai genab doona, ag kobol ena ele doona amu, ag baula nuhig aɗppa ii daamna.