2 Stori 9 - Nobonob Baibel

Seba wanppan kuin nug uɗie, Solomon ele nai madipiɗ

¹ Amu Seba wanppanu kuin nug Solomonnu, “Nug onig okkai ele,” nai amu nug doyom. Nug doyom amunu, kuin nug Solomon anidkkunu, nug oɗmak ɠagattag laala, Solomon nuhig doyak dabmak ena ele amunu ma anttak oɗ medakkunu Jerusalem appa uɗiom. Kuin nug nuhikkud ehanittak danab ameg naɗi, kamel huanak, kuɗum ele, ag Jerusalem uɗippig. Kamel ag gol kuɗum huanak, spais digdig, amu men daden nob okkainab ele, keeke amu mawadppig. Kuin nug uɗia Solomon gumitta ba, amu nug keeke oh dabmeum, nug amunu Solomon oɗ mette, aa madipiɗ.

² Am Solomon nug oɗmak amu oh tutukkuib nob meum. Nug kuin Sebanu oɗmak amu oh mehuqa medakkunu ootot laa ii qeum. Iitta.

³ Amu Seba wanppanu kuin nug Solomonnu doyak dabmak ena ele aakku antta doya, nug nuhig lag enanagnab heum, amu ele antta,

⁴ nug King Solomon ee ena kuɗum amu nug deɗ ohppa aotte, amu nuhikkud ehanittak anuqak danab, amu ele kuɗum, ag nug ele daanna ee lappig amu, nug amu ele anttom. Laa amu, nug kingnu maɗi nid, ag ahilkad lamen elab enanag ele, nug ag ele anattom. Aria, nug kingnu wain paniak danab, ag ahilkad lamen enanag ele anatta, laa amu nug doɗ Solomon diia, Yawenu mettid lakka ukka, manaknu ofa hettom amu, nug amu ele anttom. Kuin nug keeke ena amu oh anam anatta, nug ooppa ottaiak beebe, dabmak kuɗum awom.

⁵ Aakku dimppa amu, nug King Solomon amegppa inam aum. “Da wan dahilppa dayeye, da nahipnu, keeke oh na hettem, amu na nahip doyak dabmak ena ele amu, da amunu oh nai doomi. Aria, gemu da doottem, nai amu oh am nai genabib.

⁶ Tatam, haen da ii anidmi, da naiib doomi ele, da nai amunu oolppa genab ii doomi. Amge gemu da uɗie amelppanab antte, da iikku doottem; nai amuam genab. Ge, nai amuam genab, amge nahip doyak dabmak ena ele am nai amu huanak eɗidtte. Na nai da dahil wanppa dayeye doomi amu, na nai amu eɗidna malame,” awa aum.

⁷ Kuin nug nai anam anana amu, nug baula aum. “Nahipad danab ag gamag ahak okkainab dootteb bia doottem. Nahip ehanittak anuqak danab ag hanhan na noomppa daan, nahip doyak dabmak ena ele dootteb amu, ag ele gamag ahak okkai dootteb bia doottem.

⁸ Ig Yawe, nahip Kayak, ig Nug binag metu! Nug nahipnu enanagnab doya he, na Israel dilag king daattem. Yawe, Nug ahilag okkai daatte, amge Nug he, na ag gumadttem. Nahip Kayak, Nug Israel dilagnu oo mauhtte, Nug hanhan ag ehanatteb, ag ɠagattag daaglagnu oo daatte amunu, Nug he, na nai doya mala hettoɗia epeɗia elele mettak kobol dim lamidnana, na genab tutukku hak kobol ele dim lamidnana, na Israel gumadkkutnu, na king beme.” Sebanu kuin nug anam awa aum.

⁹ Amu Sebanu kuin nug gol huanak, uug nuhig 4,000 kilogram King Solomon mettowa, nug spais huanak, amu men daden nob okkainab ele Solomon mettom. Spais nug mettom am spais enanagnab, laa oh eɗittak, anukka spais amubia Israel wanppa ii dayom.

^10-12 Seba dilag kuin nug Solomon keeke anam mette, King Solomon nug keeke oh kuin nug oo heum, keeke oh nug amunu Solomon oɗ mettom ele amu, Solomon nug keeke amu oh nug mettom. Keeke amuam keeke kuin Solomon mettom eɗittom. Solomon nug Seba dilag kuin keeke amu mette, dimppa kuin nug nuhikkud huu ele ag eɗun, kuinnu wanppa goppig. Hiram danab, Solomonnu danab ele ag gona, Opir appanu gol, amu ad laa onig almug, amunu plang, amu men daden nob okkainab ele amu, ag keeke amu oh Solomon mettaglagnu akkan uɗidttappig. Ag anam heeg, King Solomon nug ad amuppa Yawenu mettid lagnu adqaɗ, kingnu lag enanagnab elenu ha, harp, laia ele, musik hak danab ag amu qekkulagnu ele heum. Juda danab ag musik haknu keeke laa hak amubia tatam ii anidppig. Iitta. Solomon nug amu he, ag anidppig.

Solomonnu ɠagattag okkai naɗi ele

¹³ Amu Solomon nug maɗ anen anen gol 23,000 kilogram awom.

¹⁴ Laa ele, Solomon nug keeke laihnu awa dadennu mak danab, nug amu dilagppa takis men doɗo awewe, amu Arebia dilag king anen anen, am gawana Israel wan oppatakppa daatteb ele, ag ele gol, silwa ele aon, Solomon medattappig.

¹⁵ King Solomon nug bannu guppiɗ okkai 200 hatta, gol hamappa qaaqa, qaɗelagppa meum. Gol amu, guppiɗ anen anennu uug am, 7 kilogram.

¹⁶ Amu Solomon nug guppiɗ naunau ele 300 hatta, gol hamappa qaaqa, qaɗelagppa meum. Gol amu, guppiɗ anen anennu uug am 4 kilogram. Nug guppiɗ hatta mala, Solomon nug guppiɗ amu oh akka ukka, lag enanagnab laa onig Lebanon Duppunu Lag Enanagnab, nug lag amuppa maattom.

¹⁷ Laa amu King Solomon nug sia king naɗi laa heum. Nug sia amu hewowa, nug sia amuppa kobol kobol hoiyak dayomppa elepan aeg babaittak qataqa, nug gol ena dubuttid iitta ele awa, elepan aeg ii dayomppa sia qaɗeppa ma tonom.

¹⁸ King nug sia king amu attan taknu am adqaɗ tappa tak eblaih laippu ele hak daappig. King nug amuppa tekkunu amu, nug amu tappa, attan teum. Aria, sia amu dayaknu aben noobppa amu, amuppa baeg maknu balal nakok golppa hak ele tuɗittak daye, amu eppeg maknu aben aɗit ele daapiɗ. Eppeg maknu aben guguittak amu, laion dottog aɗit, laa laih hibaitta dayeye, laa laih hibaitta dayom.

¹⁹ Amu laion dottog 12 ag adqaɗ tappa tak eblaih laippu ele, amu anen anenppa, naɗiap-ppa, nanehppa ele hippaidna daappig. Amu wan laalappan king ag ahilag sia king anam am laa iitta.

²⁰ King Solomonnu kap oh am golppaib hak, am nug lag enanagnab laa onig Lebanon Duppunu Lag Enanagnab, lag amuppan tappiɗ keeke, ag gol ena dubuttid iitta ele, amuppaib hak. Keeke laa ag silwappa laa ii heppig. Aɗinu? Solomonnu haenppa danab ah ag silwanu am keeke hamu bia dooppig.

²¹ Aɗinu? King Solomon nug uub okkai kuɗum ele. Hiramnu uɗat nid ag uub amunu uɗat nid daappig. Ag anam daanna, ag aben laalappa gona oinna, keeke daden maknu amu mawadppig. Uub ag haen oh gonana, aben laalappa maɗ ewam anam oinna, eɗun uɗidppig. Ag gol, silwa, elepan aeg, monki, amu ai onig pikak ele, ag amu oh mawadna eɗun uɗidppig.

²² Amu King Solomon nug nuhig doyak dabmak ena ele, amuppa amu nug enub kuɗum eleppa, nug wanppanu king laa oh eɗattak dayom.

²³ Anam amunu, wan atu oh dilag king ag Solomon gumidna uɗin, doyak dabmak ena ele Kayak Solomon mettom, ag amu dooglagnu oolag daye, qagmekkulagnu haen mekkunu nug oɗ medappig.

²⁴ Danab ag Solomon anidkkulagnu oolag daye, maɗ maɗ uɗittappig ele amu, ag oh keeke ena Solomonnu daakkunu hamu mettaglagnu ele aon uɗippig. Ag keeke silwappa hak, golppa hak, ag lamen elab, ag bannu keeke, ag spais digdig, ag hos, amu doɗ onig miul ele diin uɗin, Solomon nuhig daakkunu hamu medappig.

²⁵ Amu Solomon nug hos bannu karis eeɗppig ele, nug hos amu daaglagnu aɗ 4,000 ele. Aria, hosnu ebqak am 12,000. Nug hos, karis ele diia amu, nug aab okkai laala hos, karis ele daaglagnu aben babaittak daappig ele, nug laa appa maatte daappig. Laa amu nug he, ag nug guguittak, Jerusalem appa daappig.

²⁶ Nug wan atu oh Yupretis leppanu ukka ukka, Pilistia dilag wannu tom, Isip dilag tomppa batak amu, wan amu oh dilag king ag nug waappa daaegeg, nug ag gumattom.

²⁷ Solomon nug king dayom, haen amuppa amu nug silwa, ad sida ele huanak awa, Jerusalem uɗiom. Amunu haen amuppa silwa am men bia, ambak Jerusalem appa dayeye, amu ad sida gikkiak ele huanak, ambak, Israel wan qauko nakok qauko okkai diigppa daatteb, appa ad sikamo fig huanak daatteb, amubia Jerusalem appa ad sida gikkiak ele huanak dayom.

²⁸ Hos Solomon diiom ele amu, nug Isipnu, wan laa ohnu ele diiom.

Solomon nug mauhom

²⁹ Amu keeke kuɗum laa ele King Solomon digmakppan ukke batakppa ele heum amu, kaya amuam ag buk laalappa yaappig daatteb. Propet danab Natan nug laa amu yom. Propet danab Ahaiya, Silonnu, nug ele laa yom. Amu propet danab Ido, nug tuleglegppa keeke antta, bukppa yom amu, buk amuppa nug Nebat bekka Jeroboamnu nai ya, nug Solomonnu kaya nai ele yom.

³⁰ Solomon nug king maɗ 40 Jerusalem dayaya, Israel oh gumadttom.

³¹ Dayaya nug mauhe amu, ag nug Dawitnu Aab, ag appa boumppig. Dawit nug Solomon mameg. Solomon mauhe amu, nug bekka Rehoboam nug abenabppa king ba dayom.