2 Stori 8 - Nobonob Baibel

Uɗat laala Solomon heum

¹ Solomon Yawenu mettid lag buua malowa, nuhig lag enanagnab ele buua malom. Nug lag hak uɗat amu oh am maɗ 20 heum.

² Amu dimppa amu, Solomon nug aab naunau Hiram nug mettom amu eɗua bappalatta, Solomon he, Israel danab ah ag wana, aguppa daappig.

³ Laa amu, Solomon nuhig daup ele ag gona, Hamat Soba danab ele ban hena eɗadna, Solomon awom.

⁴ Amu ele nug aab Tatmor, atu taɗakppa appa kala, nug aab okkai laala Hamat atuppa ele kalattom. Aab amu oh am keeke maatte dayaknu aab.

⁵ Amu Solomon nug Bethoron attan, Bethoron honap ele eɗua bappalata, aɗ, keeke ele he, aab aɗit amu aa aakku aab okkai ɠagattag aɗ ele daapiɗ. Nug aɗ, aɗnu od, od manak qaknu keeke ele aɗ amuppa heum.

⁶ Nug aab Balat ele eɗua babaitta, amu nug keeke maatte dayaknu aab okkai laala ele kalattom. Laa amu, nug bannu karis, hos ele maatteb daaglagnu aab kala, amu keeke laala oh ele nug Jerusalem, Lebanon ele, amu wan oh nug gumom ele, appa hekkunu dabmeum amu, nug aakku heum.

⁷ Amu Israel wanppa danab ah buɗub laappan, Israel iitta, ag ele daappig. Amuam Hit danab, Amo danab, Peres danab, Hiwi danab, amu Jebus danab ele.

⁸ Am anukka Israel ag danab ameg amu aqappig, amge ag ohnab ii aqappig, aakku gemu laa ii aqappig ele, ag buɗulkad aakku tuɗidna, Israel wanppa daappig. Ag aakku daappig amu, Solomon nug danab amu diia he, ag begbeg maɗi nid daan, nuhig uɗat heppig. Ag anam heeg uɗie, gemu ⌊nai imu yaak haenppa⌋ ele, danab amu ag begbeg maɗi nid daan, uɗat aakku hetteb.

⁹ Amge Solomon nug he, Israel nid laa nug begbeg maɗi nid dayaya, uɗat ii heum. Iitta. Nug Israel amu he, laa ag nuhig ban danab daappig, laa ag ban daup ikki danab daappig, amu laa ag ban daup bannu karis attan daan, ban heppig, ban daup ag hos attan daan, ban heppig ele, ag amu dilag ikki danab ele daappig.

¹⁰ Aria, Israel laa, ag am King Solomonnu ehanittak anuqak danab okkai daappig. Ag ahilag ebqak am 250, amu ag danab uɗat amu heppig ele, ag ahilag gumak danab daappig.

¹¹ Amu Solomon nug aum. “Aben adekku Yawenu Tituanak Nainu Kunup deɗ laala dayom ele amu, aben amuam Kayaknu tituanak daatte. Anam daatte amunu, ah dahil, Paro aɗeg nug Israel dilag king Dawitnu lag enanagppa ii daama,” awa aum. Nug anam aum amunu, nug lag enanagnab laa ha, nug he, nug wau, Paro aɗeg amu, nug Dawitnu Aabppa, lag dayomppanu aha, lag enanagnab amuppa, nug appa daakkunu ukkom.

¹² Amu Solomon nug Yawenu qaɗab, Solomon qaɗab amu heum ele amu, nug qaɗab amuppa manaknu ofa hekkunu doɗ manatta, Yawe mettom. Qaɗab amuam oo laa, veranda bia, oo amu odppa dayom

¹³ Moses nug king doɗ gane Sabat deɗ anen anenppa, kalam bau betteppa, Bret Yis Iitta Lanaknu Hobul Nakokppa, Ee Tatam Oɗue Digma Awaknu Hobulppa, Pehppa Dayaknu Hobulppa ele manatta, Yawe medakkunu haknunab aum amu, Solomon nug amubiaib aakku heum.

¹⁴ Nug mameg Dawit nug, nug hekkununab aum bia, anamib nug mana mettak danab ag obatak anen anenppa daan, ahilag uɗat hekkulagnu otiatta, nug Lewi buɗubppan mana mettak danab iitta, ag oolagppanu laa ag danab ah ag Kayak binag mekkulagnu anuqak daaglagnu otiatta, Lewi buɗubppan mana mettak danab iitta, amu oolagppanu laa ag deɗ deɗppa aɗi uɗat daatte amu, ag mana mettak danab amuppa ehanadkkulagnu ele otiattom. Amu Dawit, Kayaknu danab, nug amu haknu aum amunu, Solomon nug ele Lewi buɗubppan mana mettak danab iitta, nug amu oolagppanu laa ag obatak anen anenppa daanna, ag odnu gumak uɗat od anen anenppa hekkulagnu ele otiattom.

¹⁵ Lewi buɗubppan mana mettak danab, Lewi buɗubppan mana mettak danab iitta ag king haknunab aum tutukkuib dim lamidppig. Ag nai amu nakok laa ii tippalppig. Ag amu hena, ag en maknu oo anen anennu nai nuhig ele tutukkuib dim lamidppig.

¹⁶ Aakku Solomon nug aɗi uɗat digmeum amu, aakku ha gogppa teum. Nug Yawenu mettid lag digma he, danab uɗat amu heppig ele ag men ukku nuhig meeg ugekke, heegeg ukke ukke, lag amu malappig amunu, Yawenu mettid lag aakku malak dayom.

¹⁷ Amu dimppa amu, Solomon nug aha, Edomnu yu ihippa aab aɗit onilah Esiongeber, am Elat ele dilahppa ukkom.

¹⁸ Amu King Hiram nug uub, amu uub gumaknu uɗat nid ag yuppa oiyaknu doyak ena ele nuhig amu maatte ukkaeg, ag Solomonnu uɗat nid ele ag oh qagmena, uub amuppa uɗat heppig. Amu ag Opir wanppa gona, appanu 16,000 kilogram gol King Solomonnu akkan uɗidppig.