2 Stori 7 - Nobonob Baibel

Solomon nug mettid lag Kayaknu daakkunu tituanom

¹ Solomon nug anam unuqitta male, aab aɗu habppanu na, manaknu ofanu doɗ, amu doɗ laala ele ag manadna, Kayak mettaknu qaɗabppa daappig ewatta malom. Anam he, Yawenu binag amahlak oppiaawak ele am Yawenu mettid lag, amuppa ambeum.

² Yawenu binag amahlak oppiaawak ele na, Yawenu mettid lagppa amba dayom amunu, mana mettak danab ag lag ooppa gokkulagnu elele iitta.

³ Haen Israel danab ah ag aab aɗu hab attannu neene anidna, ag Yawenu binag amahlak oppiaawak ele, ag amu ele Yawenu mettid lag attan anidna, ag gatelag qaun ona, gomelna, ag iɗulag wanppa mena, ag Yawe noobppa dup nona binag mena, ag Nug amegppa, “Ena heme,” ele appig. Aɗinu? Yawe Nug enaib dayaya, enaib ele hette. Laa amu, nuhig oo mauhaknab kobol am hanhan alet daatte.

⁴ Amu dimppa amu, king, danab ah ele ag doɗ manadna, Yawe medappig.

⁵ Amu King Solomon nug laippu dayaknu ofa haaha, nug makau 22,000 manatta mettowa, nug sipsip, meeme ele 120,000 ele manatta mettom. Am Solomon nug mana mettak heum amu, amuppa nug, Israel danab ah ele ag Kayaknu mettid lag qeapina, Kayaknu tituanna medappig.

⁶ Ag tituanak amu haknu kobol henana, mana mettak danab ag uɗat hekkulagnu abenlagppa daaegeg, Lewi buɗubppan mana mettak danab iitta, ag Yawenu musik haknu keeke digdig aɗappig. Musik haknu keeke amuam King Dawit nug babaitta, ⌊nug danab gemu daatteb mamelkad aɗi amu haknu ele ippunattom⌋. Dawit nug Yawenu ahi hekkunu keeke amu anukkanab babaitta, nug amuppa Yawe amegppa, “Ena heme,” attom. Aɗinu? Yawe, nuhig oo mauhaknab kobol hanhan alet daatte. Ag anam daan henana, Lewi buɗubppan mana mettak danab, Lewi buɗubppan mana mettak danab iitta ele, ag huu aɗitppa daan, nug neekkidnana daappig amu, ag anam daanna, mana mettak danab ag trampet iwalegeg, Israel danab ah ag hippaidna daappig.

⁷ Laa ele, ⌊deɗ amuppa⌋ King Solomon nug wan huppu nakok laa Yawenu mettid lag odppa, haɗap amu gamagppa, wan huppu amu Yawenu tituana mettom. Wan gamag amuppa am nug manaknu ofa, amu laippu dayaknu ofa ittag ele manatta, Yawe mettom. Aɗinu? Bras qaɗab nug heum ele, qaɗab amu, nuhig okkai am elele iitta, Solomon nug manaknu ofa, amu ee aegnu ofa, amu laippu dayaknu ofanu ittag ele, nug mana mettak amu oh amuppa hekkunu elele iitta.

⁸ Amunu Solomon nug Pehppa Dayaknu Hobul deɗ eblaih aɗit ele heum. Nug, Israel danab ah oh ele ag hobul amu heppig. Israel danab ah huanaknab, Lebo Hamat appanu ukka, Isipnu Oolnu Noak batakppanu uɗin daappig.

⁹ Tatam ag qaɗab Kayaknu tituana mettaknu, ag amu hekkulagnu deɗ eblaih aɗit ele hena malappig. Amu dimugppa ag Pehppa Dayaknu Hobul deɗ eblaih aɗit ele gamag ahak ele heppig. Dayak amu dimugppa, deɗ eblaih ewamppa amu, ag eɗun, Kayak noobppa dup nona binag mekkulagnu oh qagmena, amu heppig.

¹⁰ Ag anam daanna heeg ukke, kalam eblaih aɗit, deɗ 23ppa Solomon nug he, danab ah ag Yawe Nug Dawitnu, Solomonnu, nuhikkud danab ah Israel dilagnu ele keeke digdigppa ena hattomnu gamag ahak okkai doon, ag eɗun appalkadppa goppig.

Yawe Nug baula Solomon gumitta, tul niiakppa keeke ippunittom

¹¹ Amu Solomon nug Yawenu mettid lag ha mala, kingnu lag enanagnab ele ha malom. Ele amu, nug lag aɗit amuppa aɗi aɗi uɗat laala hekkunu dabmeum amu, nug amu oh ele ha malom.

¹² Amu tuqanppa Yawe Nug eɗua, Solomon toppa na, nug amegppa inam aum. “Da nahip unuqittak doye, da lag imu, ⌊na dahilnu buume amu,⌋ da lag amu danab ah amuppa doɗ manan da meɗaglagnu tituanmi.

¹³ Amu dimppa, ⌊dahilad danab ah ag hipunin heppeg,⌋ da heppi, gu ii neegkku dayeb, o da haknunab appi, tap-lokus ag uɗin, dattanu keeke heppeg iitta mekku dayeb, o da heppi, oɗe nau danab kuɗum aqe mauhtteb ele danab ah aqakku dayeb amu,

¹⁴ haen amuppa danab ah dahilad, da onil ahilagppa daatte amu, danab ah amu ag onilag qeppeg neeb, ag unuqiɗnana, ag da aniɗna dim lamiɗna mattiɗkkulag dayeb, ag ahilag nau hak dimettan, ii hekkulag dayeb amu, ahilag hak amu dimppa da hab aabppa dayeye, ahilag unuqittak doyen, da hipunin ahilag uhuqe matten, da heppi, ahilag wan am eɗua ena daakku.

¹⁵ Amu haen amuppa, haen danab ah dahilad ag uɗin, lag imuppa da unuqiɗkkulag amu, da ag dabmatten, da ahilag unuqittak dookkul.

¹⁶ Da, da onil hanhan aguppa daakkunu, da mettid lag imu dahilnu tituana meɗak daakkunu aakku hemi. Danab nug baekkudppa ele laulagppa daatteb, danab nug lag amu dabmedette, aguppa daakkunu oo huana hette, amubia da lag imunu hanhan dookkul.

¹⁷ Amu Solomon, nahipnu amu, na da noolppa, na mamen Dawit heum bia oinna, na dahil haknunab anak oh, dahil ɗo iɗu iɗu ele na dim lamidkkut dayeb amu,

¹⁸ da na mamen Dawit ele nug tituanɗa nai qakkaɗa, da nug amegppa ami bia bekku. Da ami. ‘Da heppi, na buɗunadppanu laa nug na abenam aweb, laa nug Israel dilag gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku,’ awe ami. ‘Da anam ami amu, anamib geha haen oh da heppi, na buɗunppanu laa ag anen anen ahilag haenppa Israel dilag king bena daaglag.’

¹⁹ Amge ag Israel, ag eɗun, ag dahil haknunab anak, amu ɗo dahil ele da ag mattami amu, ag ii dim lamidnana, aria ag kayak hambuppuak dim lamadnana, amu laa waalagppa maɗi nid daan, ahilag uɗat henana, ag ag noolagppa dup nona binalag mekkulag dayeb,

²⁰ amu da geha ag Israel danab ah da wan dahil, da ag mattami imu amu, da wan imuppanu lamatten, mettid lag imu, da onil aguppa daakkunu dahilnu tituana meɗak daakkunu hemi amu, geha da baula amunu ii dabmepa. Am laa ele, da heppi, danab ah laa ag lag imuam nau bekkunu at daatte dabmena, ag aon aon qettaglag.

²¹ Amu lag imuam geha am kinipan ameg okkai hume tak daakku. Anam dayeb, danab ag geha uɗin, ippa oinna anidna, ag geha dabmak huanaknab aon, ag geha akkulag. ‘Attem daye, Yawe Nug wan imu he nauhe, mettid lag imu ele he nauhom?’ Ag anam akkulag.

²² Ag oɗmak anam hebeppeg, laa ag nob mena akkulag. ‘Imu beumnu diig am inam. Israel ag Yawe, ag mamelkad aɗi dilag Kayak, ag Nug uuppig. Nug ag mamelkad aɗi anukka Isipnu diia, omalatta uɗiom. Amge ag Yawe, ahilag Kayak, ag Nug uun, ag kayak hambuppuak dim lamadnana, ag noolagppa dup nona binalag meppig. Ag anam heeg, diig amunu Yawe Nug he, uug naunab imu beum.’ ” Yawe Nug Solomon amegppa anam aum.