2 Stori 6 - Nobonob Baibel

Solomon nug danab ah nai mattom

¹ Anam dayeye, Solomon nug danab ah amelagppa aum. “Yawe, Nug bud gatatu manak amuppa daakkunu aum,” awa aum.

² Solomon nug danab ah amelagppa anam awowa, nug nai tuɗitta, Yawe amegppa inam unuqittom. “O Yawe, gemu amu, da mettid lag enanag nahip, na haen oh imuppa daakkutnu iikku hemi,” awa unuqittom.

³ King Solomon nug unuqittowa, nug eɗua Israel danab ah oh ag appa hippaidna daappig ele, nug ag neekkattatta, Kayak onigppa danab ah itittak ena mattom.

⁴ Nug itittak ena mattowa amu, nug inam aum. “Ig Yawe, Nug ig Israel, ihinig Kayak, ig Nug binag metu! Nug da mamel Dawit amegppa Nug oɗeppa nai ana qakkom amu, nug nai amu dim lamitta he, meu oum.

⁵ Nug da mamel Dawit amegppa inam aum. ‘Haen da dahilad danab ah Israel, ag Isipnu diie uɗimi, haen amuppanu uɗie, gemu batak, da Israel dilag huu okkai oh oolagppa aab okkai laa, amuppa ag mettid lag laa, da onil amuppa daakkunu hekkulagnu amu laa ii tituanmi. Ele amu, da danab laa nug dahilad danab ah Israel dilag okkai daakkunu ii tituanmi.

⁶ Amge gemu da Jerusalem, da onil aguppa daakkunu tituanen, da na Dawit, da na dahilad danab ah, am Israel danab ah, da na ag gumadkkutnu da na tituanidmi,’ awa aum.

⁷ Aakku da mamel Dawit nug gumak uɗat amu haaha, nug mettid lag laa, Yawe, Israel dilag Kayak, Nug onig amuppa daakkunu helonu dabmeum.

⁸ Nug anam dabmeum, amge Yawe Nug da mamel Dawit amegppa aum. ‘Na mettid lag laa, da onil amuppa daakkunu buukkutnu dabmeme amu, dabmak nahip amuam ena,

⁹ amge na dahil mettid lag amu ii buumna. Iitta. Dimppa na nahip nidnab laa, nug mettid lag, da onil amuppa daakkunu buukku,’ awa aum.

¹⁰ Yawe Nug nai ana qakkom amu, nuhig nai qakkak amu, nug aum bia gemu oh iikku be, amu da mamel Dawit amu, da nug abenabppa gemu da ag Israel, da ahilag king daattem; Yawe Nug nai qakka aum amubia. Amu da Yawe, Nug ig Israel, ihinig Kayak, da mettid lag Nug onig amuppa daakkunu aakku buumi.

¹¹ Da Nug laug buuen, da Tituanak Nainu Kunup lag amuppa memi. Amu men aɗit Tituanak Nainu Kunup amu ooppa daattep. Men aɗit amuppa tituanak nai, Yawe Nug he, Nug Israel danab ele nug tituanppig, nai amu amuppa daatte.” Solomon nug anam aum.

Solomon nug unuqittom

¹² Solomon nug nai amu mattia mala, nug eɗua, Yawenu qaɗab guguitta ukka, qaɗab am noobppa daye, Israel danab ah oh noolagppa anam dayaya, nug eppeg laih laih oh bahia, eppeg oo oh ottale daye, ⌊nug Yawe unuqittom.

¹³ Amge imu oh ii hak haenppa, tatam⌋ Solomon nug balal okkai brasppa heum. Balal amu elab nuhig am 2 mita, 20 sentimita ele, nuhig emaitak am 2 mita, 20 sentimita ele, amu attan tak nuhig am 1 mita, 30 sentimita ele. Nug amu ha, nug balal amu danab ah dilag haɗap gamagppa me daye, Solomon nug amu attan ta daya, nug Israel danab ah oh daappig noolagppa gateg qaun o, nug ⌊haen amuppa nug⌋ eppeg laih laih oh bahia, eppeg oo oh ottale hume daye,

¹⁴ nug unuqitta aum. “O Yawe, na am ig Israel, ihinig Kayak. Kayak laa na bia habppa, o honap wanppa ele laa ii daatte. Amu na nahipad maɗi nid maɗi ah ele, ag meulag ohppa nahip ib dim lamittegeg, na hee, na danab ah amu ele ag nug oo mauhaknab doyaknu nug tituana nai qakkak hetteb amu, na nug tituana nai qakkak amu ii okkulttem.

¹⁵ Na anukka da mamel Dawit, nahip maɗi nid, na oɗenppa nug amegppa nai anan qakkame amu, na nai amu tutukku dim lamidna, amu na nai anan qakkame amu, na hee, nai amu oh meu o, gemu anam daatte.

¹⁶ Am gemu Yawe, na ig Israel ihinig Kayak amu, da na oɗ medattem. Na nai ana qakkak laa da mamel Dawit, nahip maɗi nid, na nug amegppa ame amu, na amunu ele heppe bekkunu oɗ medattem. Na nug amegppa inam ame. ‘Dawit, na begapad ag na hettem bia, ag haen oh da pehettak, dahil ɗo ippunadtte bia dim lamiɗna, da noolppa oiglag dayeb, geha haen oh da heppi, na buɗunppanu laa ag anen anen ahilag haenppa Israel dilag king bena, sia kingppa daaglag,’ aon ame.

¹⁷ O Yawe, na am ig Israel, ihinig Kayak, na nahip maɗi nid Dawit amegppa nai anan qakkame amu, na heppe meu okkunu oɗ medattem,” awa unuqittom.

¹⁸ Solomon nug anam unuqitta mala, nug tuɗitta inam ele unuqittom. “Amge O Kayak, na am genab nena, wan imuppa danab ele daakkut-te? Hab, hab waappa, hab attan ukke ukke, adekku batatte, aben amu ohppa aben laa, na amuppaib daakkutnu elele laa iinab daatte amunu, nahip mettid lag da hemi imuam nahipnu elelete? Am iittanab iitta.

¹⁹ Anam, amge O Yawe, dahil Kayak, da nahip maɗi nid amu, da na dahil unuqittak dookkutnu oɗ medattem. Da na ihinignu oo gai-iitta doya oo metta ehanittak kobol hekkutnu unuqidttem. O Yawe, da nahip maɗi nid amu, da na gumitte uɗien daattem amu, na dahil oɗmak, dahil unuqittak imu dookkutnu oɗ medattem.

²⁰ Amu na mettid lag imu, na, ‘Da heppi, da onil am lag amuppa daakku,’ ame amu, na deɗ oh na amen am tuqan, amun ele uɗiebeb, lag imu anidkkutnu da ool daatte. Amu haen da, nahip maɗi nid, da na unuqidkkulnu hein, da neegppi, lag imuppa uɗieb unuqidppi, geha na dahil unuqittak dookkutnu ele ool daatte.

²¹ O Kayak, nahip dayak aben am hab aab, amu na appa daanna, haen da, nahip maɗi nid, amu Israel ele, ig am nahipad danab ah, haen ig neegta, lag imu anidtata, na unuqidpput doona, amu na ihinig hipunin amu uhuqna megakkutnu oɗ medattem.

²² Amu danab laa nug layagnu, ‘Nug dahilppa nau imu heum,’ akku dayeb, laa eheɗ heumnu nai yaakppa daatte amu, ikki danab ag heppeg, nug uɗia, nahip mettid lag imuppa qaɗab guguittak dayaya, nug nai nuhig Kayak onigppa ɠagattag qa, ‘Da ii hemi,’ akku amu,

²³ Yawe na hab aabppa daanna, na nai amu doon, na hettoɗiak tutukku henana, na danab amu nug hambuppua, nai hambuppuak ɠagattag qetta mattiom, nug eheɗ amu genab heum anidttem dayeb amu, na eheɗ hak nuhig amunu na eheɗ mettan, nob nau medakkutnu oɗ medattem. Amu danab amu nug genab eheɗ ii heum anidttem dayeb, da na nuhignu, ‘Nug eheɗ laa ii heum,’ appe, danab ag nug eheɗ ii heum dooglagnu unuqidttem.

²⁴ Amu ig Israel, ig am nahipad danab ah, ig nahip-ppa hipunin hekkunig dayeb, diig amunu na uuigppe, ihinig kekeɗ ag ban hak haenppa eɗigkkulag dayeb, amu dimppa ig Israel ig oonig eɗueb, ig na onin am Yawe tutukku dabmeta, ig nahip mettid lag imuppa uɗit, na noomppa ihinig hipunin uhuqna megakkutnu unuqidta oɗ mettagnig dayeb amu,

²⁵ Yawe, na hab aabppa daanna, danab ah nahipad ig, na ihinig unuqittak amu doon, hipunin amu uhuqna megakkutnu oɗ medattem. Amu kekeɗ ag ig awigna, wan laappa goppeg amu, na ig aigna, eɗun omaigna, wan imuppa uɗikkutnu ele oɗ medattem. Wan imu amu, na anukka ig mamenkad aɗi mattame; ig ele mekkame.

²⁶ Amu ig Israel, ig nahipad danab ah, ig nahip-ppa hipunin hekkunig dayeb, diig amunu na heppe, ihinigppa gu ii nekku dayeb, amu na uug amu ihinig hipuninnu nob daakkunu megappe, diig amunu dimppa ig oonig eɗueb, na onin am Yawe tutukku dabmetata, hipunin dimettata, ig amenigppa lag imuppa neegpput uɗieb, na unuqidkkunig dayeb amu,

²⁷ Yawe na hab aabppa daana, danab ah nahipad ig, Israel, ig nahipad maɗi nid maɗi ah ele, na ihinig unuqittak amu doon, ihinig hipunin amu uhuqna mekkan, na ig kobol tutukku dim lamidkkunignu ihuhuigkkutnu oɗ medattem. Amu na heppe, gu nug wan imuppa nekkunu ool daatte. Wan imu anukka nahipad danab ah ig mekkame, wan imuam ihinig, ig aunig.

²⁸ Aria, ihinig wanppa enug haen naɗi laa bekku dayeb, o oɗe nau danab kuɗum aqe mauhtteb ele laa bekku dayeb, o dattanu ee heeb nauhkkunu oɗe nau diig laala bekku dayeb, o tap-lokus kuɗum huanak uɗin, ag ee oh lappeg, ee laa ii daakku dayeb, o kekeɗ ag uɗin, ihinkad aab atten oo mattan aqaknu maadna daaglag dayeb, o oɗe nau atten, o uug naunab mettak attem bena heppeg, ig nauhkkunig dayeb amu,

²⁹ ig Israel, ig nahipad danab ah, ig anen anen uug amu, o guittak amu doot, ig oonigppanu aun nug eppeg bahia, mettid lag imu epponana, na unuqidkku dayeb,

³⁰ amu Yawe na, na dayak aben nahip, amuam hab aab, na appa daanna, unuqittak amu dookkutnu ool daatte. Doon, hipunin attem daatte amu, na uhuqna mekkan, na nakkaib danab ah oh dilag dabmak doottem amunu, na dabmak amu anidnana, na ag anen anen kobol heppig ele, na amuppa na ag melemel elele mattan, na ag kobol heppignu nob elele madakkutnu oɗ medattem.

³¹ Aɗi diignu da na anam hekkutnu oɗ medattem am, nahipad danab ah ig, ig wan na ig mamenkad aɗi mattame ele, ig amuppa bau daatta, ig haen amu ohppa nahipnu ebehinig oh bodoetta le meebeb, ig nahip ɗo, nahip hak ele dim lamidta oignig.

³² Aria, wan laihnu danab ah ag ele na onin okkainu nai, nahip ɠagattag okkainu nai, nahip kobol danab hekkunu elele iitta okkai okkainu nai ele dooglag. Ag anam dooglag, diig amunu wan laihnu danab, Israel danab iitta, ag oolagppanu aun laa nug wan umanabnu uɗia, mettid lag imu neekkittatta, nug na unuqitteb,

³³ amu Yawe, geha wan laihnu danab ah ag ig nahipad danab ah Israel, ig na dooittutut, amu ig nahipnu ebehinig oh bodoetta le mette, amubia ag na dooidkkulagnu, ag nahipnu ebehilag oh bodoetta, le mekkunu, geha wan laihnu danab ag lag imu, da hemi amu, lag amuam na laut, na onin aguppa daatte ele dooglagnu, na dayak aben nahip, amuam hab aab, na appa daanna, na wan laihnu danabnu unuqittak doon, nug na aɗi hekkutnu oɗ medatte amu, na amu hekkutnu oɗ medattem.

³⁴ Amu deɗ laa geha na heppe, ig nahipad danab ah ig na ig adeppa gota, ban hekkunignu ame amu, ig amubia gota, kekeɗ ele ban hetata, ig aab okkai na tituanme imu, amu ig nahip mettid lag, na onin aguppa daakkunu da buumi, imuppa daatte amu, ig amu oh neegpput uɗieb unuqidkkunig dayeb,

³⁵ am Yawe na hab aabppa daanna, unuqittak ihinig, amu oɗmak ihinig ele doon ehanigkkutnu ool daatte.

³⁶ Danab ah oh ag hipunin hekkulagnu elele daatteb amunu, geha ig nahipad danab ah ele nahip-ppa hipunin hepput, na ihinignu oot nauheb, na heppe, kekeɗ ag uɗin ban hena, ig eɗigna, aɗaigna, aigna wan laappa goppeg, wan amuam umatai o miagtai,

³⁷ ig kekeɗ eɗigppig ele, ig amu dilag wanppa aɗaigppeg, ag eppelagppa anam daatta, dimppa ig ihinig hak nau amu anidta, ig amunu oonig doyeb, gaata, oonig eɗueb, am Yawe ig na oo doyak ele unuqidtata, ‘Ig eheɗ hetata, hipunin, kobol nau ele kuɗum hemut,’ akkunig dayeb,

³⁸ ig kekeɗ, ag ig eɗigna aɗaikkeg, ig ag eppelagppa daattem ele, ig wan ag awigna goppig ele, ig appa ag eppelagppa daatta, ig oonig ohppa, meunig ohppa ele oonig genab eɗueb amu, ig neegpput, wan imu, na ig mamenkad aɗi mattame, am aab okkai imu, na nahip daakkunu tituanme, amu mettid lag imu, na onin amuppa daakkunu da buumi amu, ig keeke amu oh neegpput uɗieb, na unuqidpput,

³⁹ Yawe, na dayak aben nahip, amuam hab aab, na appa daanna, na ihinig unuqittak, ihinig oɗmak amu ele doon, ehanigna, amu na ig nahipad danab ah, na ig ihinig hipunin digdig, ig nahip-ppa hemut amu, na amu oh uhuqna megakkutnu ool daatte.

⁴⁰ Amu O Kayak dahil, na unuqittak ig lag imuppa hettem imu dookkutnu amu, na daut humakib daakkunu oɗ medattem.

⁴¹ Amu O Yawe Kayak, na ahan, lag bau nahip imuppa uɗin daakkutnu oɗ medattem; na amu nahip Tituanak Nainu Kunup, kunup amuam nahip ɠagattag okkainab ippunigtte amu, na kunup amu ele aguppa daakkut. O Yawe Kayak, na mana mettak danab ehanadppeppe, ag na danab ah ehanatte ag padal ii metteb danab ah amelagppa appeg dooglagnu oɗ medattem. Ao, nahipad danab ah ag nahipnu oo metta ii uuak kobol dim lamidtteb amu, ag gamag ahak dooglagnu unuqidttem.

⁴² O Yawe Kayak, na laa, na nug king daakkunu goɗen gokkaɗakppa tituanme ele ii geɗidmananu oɗ medattem. Ao, na nahip maɗi nid Dawitnu oo mauhaknab doon dim lamidkkutnu nai anan qakkame amu, na amu dabmekkutnu oɗ medattem.” Solomon nug anam unuqittom.