2 Stori 5 - Nobonob Baibel

¹ Amu Yawenu mettid lagnu uɗat, Solomon heum ele, amu malak daye, Solomon nug mameg Dawit nug keeke Yawenu tituana mettom ele, nug keeke amu oh awa, Kayaknu mettid lag, amuppa en maknu oo anen anen, nug amuppa meum. Keeke amuam silwa, gol am Yawenu mettid lagnu keeke laala ele.

Solomon nug Kayaknu Tituanak Nainu Kunup awa, Yawenu mettid lag, amuppa ukkom

² Amu Solomon nug Yawenu Tituanak Nainu Kunup kontrak inak ele, nug kunup amu Sion, Sion am Dawitnu aab amu, nug appanu awa, Yawenu mettid lag, amuppa mekkunu dabmeum amunu, nug Israel dilag ikki danab, Israel dilag huu okkai anen anen dilag danab okkai oh, amu Israel baekkudppan dilag okkai ele ag nai doon ahan, Jerusalem uɗiglagnu onilagppa eum.

³ Aria, ag nai amu doona, ag kalam eblaih aɗitppa, kalam amuppa Peh Dayaknu hobul haenppa ag oh King Solomon gumidna uɗin qagmeppig.

⁴ Amu Israel dilag ikki danab ag oh uɗin daaeg, Lewi buɗub ag Tituanak Nainu Kunup humappig.

⁵ Ag human, ag kunup amu, mettid haknu peh lag danab ah appa qagmetteb ele, amu lag amuppanu keeke, Yawenu tituanak daatteb ele akkan aon, Kayak laug guguittak uɗippig. Mana mettak danab, amu Lewi buɗubppan mana mettak danab iitta, ag ele ag keeke amu heppig.

⁶ Mana mettak danab, amu Lewi buɗubppan mana mettak danab iitta ele, ag gona teegeg, Solomon nug, amu Israel danab ag uɗin, nug talilidna daappig ele, ag King Solomon ele oh anuqna ukkaegeg, laa ag Kayaknu Tituanak Nainu Kunup maoppig ele ag dim lamadna uɗippig. Ag anam uɗinna, Solomon, danab ele ag sipsip, makau ele huanaknab, laa ebaqa, bukppa yaakkunu elele iitta manadna, Yawe medappig.

⁷ Ag anam henan uɗin, mana mettak danab ag Yawenu Tituanak Nainu Kunup kontrak inak ele maon, Yawenu mettid lag ooppa Oo Gunnab Eleppa, nuhig aben aguppa daakkunu babaittak dayom ele, ag amuppa nona, meeg dayom. Engel okkai-kerubim dottog aɗit haulah tikkaɗe daaeheh, haulah waappa meppig.

⁸ Kerubim aɗit aa haulah am Tituanak Nainu Kunup daakkun aben attan daaya, kunup amu, amu nuhig mawaknu tuqai aɗit ele tonatpiɗ.

⁹ Tuqai amuam aa elabnab, noolah Tituanak Nainu Kunup eɗidpiɗ amunu, danab nug Oo Gun Ele, oo amuam Oo Gunnab Ele noobppa dayom amu, danab nug appa dayaya, nug neekkeb ukkeb, anatkkunu elele, amge danab nug lag amu dimittim daakku dayeb, nug neekkeb ukkeb, anidkkunu elele iitta. Gemu ⌊nai imu yaak haenppa⌋ ele Tituanak Nainu Kunupnu tuqai aɗit aa anam daattep.

¹⁰ Amu Tituanak Nainu Kunup ooppa am keeke kuɗum iitta; men maha aɗit, amuppa Kayaknu ɗo nai yaak ele, Moses Horep appa kunup amuppa meum ele amu, men aɗit amuib aguppa dayom. Horep appa amu, Israel danab ah ag Isip uun uɗin, Horep bena daaegeg, appa amu Yawe he, Israel Nug ele ag nug tituanna nai qagappig.

¹¹ Mana mettak danab oh deɗ amuppa daappig, ag obatak attenppanu amu, ag Yawenu tituana mettak daaglagnu hena daappig, diig amunu ag uɗat amu hekkulagnu elele daappig. Ag elele daan hewona, ag eɗun dimittim uɗieg,

¹² amu Lewi buɗubppan mana mettak danab iitta, ag am musik hak danab, ag qaɗabppan kaɗag uɗitteppanu daanna, ag simbal hena, harp, laia ele qeppig. Ag oh am linen lamen hakkab tagappig. Ag am Asap, Heman, Jedutun amu ahilkad nid danab, laa ag ele tiilag laippu ele. Ag musik amu heegeg, mana mettak danab 120 ag trampet iwalppig.

¹³ Laa ahi edappig, laa trampet iwalak heppig amu, ag baag laippu hak bia henana, ag Yawe binag mekkulagnu, ag Nug amegppa, “Ena heme,” akkulagnu, ag ahi ettanna, trampet iwalppig. Danab ag trampet laa iwalppig, laa simbal heppig, laa ag musik haknu keeke laala heppig ele amu, ag oh laippu hena, ag baalag okkaippa Yawe binag meppig. Aɗinu? Yawe Nug enaib dayaya, enaib ele hette. Laa amu, nuhig oo mauhaknab kobol hanhan alet daatte. Ag anam heeg, lombig na he, Yawenu mettid lag ambak dayom.

¹⁴ Lombig Yawenu mettid lagppa ambeum amunu, mana mettak danab ag ahilag uɗat hekkulagnu elele iitta. Aɗinu? Yawenu binag amahlak oppiaawak ele am Kayaknu mettid lag, amuppa ambak dayom.