2 Stori 4 - Nobonob Baibel

Kayaknu mettid lagnu keeke laala heppig

¹ Amu lag amunu keeke amu, Solomon nug qaɗab laa brasppa heum. Qaɗab amu elab nuhig am 9 mita, emaitak ele am 9 mita. Attan tak nuhig am 4 mita maha ele.

² Am nug le daakkunu tappiɗ naɗi okkai brasppa hak onig Yu heum. Keeke amuam tappiɗ naɗi. Laihnu laih ukkak am 4 mita, 40 sentimita. Attan tak nuhig am 2 mita, 20 sentimita ele. Tappiɗ akka talilia ukkak am 13 mita, 50 sentimita ele.

³ Akka waappa amu, Solomon nug makau dawai dottolkad maattom. Nug 50 sentimita ohppa makau dawai dottolag eblaih laih ele huu aɗitppa, laa attan laa honap, hattom. Nug bras tappiɗ naɗi, makau dawai dottolkad ele hattatta, nug bras amu aab aɗuppa me dayaya, gakkaɗaɗa, le me, tappiɗ dottogppa gokkaɗe noa, oug ma, anam dayom. Haen nug amu heum, haen amuppa nug makau dawai dottolkad, tappiɗ naɗi ele laippu heum.

⁴ Amu tappiɗ naɗi okkai brasppa hak onig Yu, amu maoglagnu Solomon nug makau dawai 12 dottolkad brasppa hatte daaegeg, ag makau amu gomelag qaɗeppa tappiɗ naɗi okkai brasppa hak onig Yu, ag amu meeg dayom. Makau gomelag, bitolag ele amu, tappiɗ bitob waappa daappig. Ag anam daanna, ag aben ohppa neegnana daappig. Makau ewam amu ag neekkeg, laih ulah yawalti uɗitteppanu ukke, ewam laa amu neekkeg, laih aam nodeppanu ukke, ewam laa amu neekkeg, laih ulah yau uɗitteppanu ukke, am ewam laa amu neekkeg, laih aam bedeppanu ukke daappig.

⁵ Tappiɗ naɗi okkai, brasppa hak onig Yu nug heum ele amu, tappiɗ amunu brasnu teppu am melemel 8 sentimita. Tappiɗ amu oɗeppa, amuam akka attan ukka, guhig batakppa batak amu, aben amuam kap bala lili haɗag bia hak dayom. Tappiɗ amuppa amu le 60,000 lita daakkunu elele.

⁶ Solomon nug amu ha mala, nug tappiɗ nakok okkai eblaih laih ele hattom. Nug tanig ele am tappiɗ naɗi heqo laih yau uɗitteppanu maatte daaeg, tanig ele laa tappiɗ naɗi heqo laih yawalti uɗitteppanu maatte daappig. Mana mettak danab ag manaknu ofa henana, ag mana mettak amuppa aɗi aɗi keeke uɗat medappig amu, laa keeke amu babaittak uɗat hetteb ele ag tappiɗ nakok okkai eblaih laih eleppa ihappig, amge mana mettak danab ag tappiɗ naɗi okkai brasppa hak onig Yu, ag amuppa eppelag, baelag keeke ihappig.

⁷ Solomon nug ele lam maknu balal golppa hak eblaih laih ele hattom. Solomon nug Dawit, nug amegppa attem attem haknu aum, nug nai nug aum, nug nai amu dim lamitta heum. Nug hatta, nug Kayaknu mettid lag ooppa, tanig ele am gilil yau uɗitteppanu daatte heqoppa maattowa, tanig ele laa ag gilil yawalti uɗitteppanu daatte heqoppa maatte daappig.

⁸ Lam maknu balal anam maatte daaegeg, Solomon nug balal eblaih laih ele hatta, nug Kayaknu mettid lagppa maattom. Nug tanig ele heqo laih yau uɗitteppanu maatte daaeg, tanig ele laa heqo laih, yawalti uɗitteppanu maatte daappig. Solomon nug amu ha mala, nug tiig amuppanu awa tauɗeb ukkaknu tappiɗ 100 golppa hattom.

⁹ Amu Solomon nug mana mettak danab dilag haɗap ha, nug haɗap laa okkainab, danab dilag, nug amu ele heum. Nug ha, nug haɗap aɗit amunu od ele hatta, nug od qaɗelagppa bras qataqeum.

¹⁰ Solomon nug amu oh ha, nug tappiɗ naɗi okkai brasppa hak onig Yu awa, mana mettak danab dilag haɗap-ppa, laih yau uɗitteppanu, appa yau uɗitteppanu daug, kaɗag uɗitteppanu daug ele tuɗittakppa me dayom.

¹¹ Amu Huram ⌊nug Solomon waappa dayaya, uɗat heum amu,⌋ nug waa ⌊brasppa hak⌋, sabol naunau, amu tiig amuppanu awa tauɗeb ukkaknu tappiɗ ele hattom. Amu Huram nug aakku uɗat King Solomon nug Kayaknu mettid lag, amuppa hekkunu nug mettom amu, nug aakku ha malom.

¹² Keeke nug hattom am inam: biidod okkai aɗit; biidod aɗit ikkiltinu ikki tonaknu keeke tappiɗ bia aɗit; ikki tonaknu keeke aɗitnu sen lo akkak bia;

¹³ ad pomigranet meu dottog 400, sen lo akkak bia aɗit, amuppa anen anenppa huu aɗitppa me ukkak aɗitppa ikkiltinu ikki tonaknu keeke tappiɗ bia aɗit bala mataknu daaglagnu;

¹⁴ balal eblaih laih ele, balal amunu tappiɗ ele;

¹⁵ tappiɗ naɗi okkai brasppa hak onig Yu, makau dawai dottolkad 12 tappiɗ amu maotteb;

¹⁶ waa ⌊brasppa hak⌋, sabol, amu teppu awaknu huɗup ele. King Solomon nug Huram Abi Yawenu mettid lagnu keeke aɗi aɗi hadakkunu aum amu, nug keeke amu oh bras amemɗi aotte eleppa heum.

¹⁷ King Solomon nug Huram amegppa keeke amu oh le Jodannu oolnu noakppa amunu dottolkad waa haknu wanppa hewowa, amuppa keeke amu oh hadakkunu a, nug appa dayaya, keeke amu oh hattom. Nug aab aɗit Sukot, Saretan ele gamalahppa, uɗem amuppa nug uɗat amu heum.

¹⁸ Solomon nug he, Huram keeke brasppa heum ele amu, nug bras huanaknab awa heum. Danab laa skelppa ii meum amunu, auntai laa nug keeke amunu uug ii dootte.

¹⁹ Solomon nug Kayaknu mettid lagnu keeke imu oh ele heum: qaɗab golppa hak; Kayak Nug ina daatte ippuanattaknu bretnu balal golppa hak;

²⁰ lam maattaknu balal gol ena dubuttid iitta eleppa hak, lam ele, Yawe aum bia, Oo Gunnab Ele odppa daanna, eoglagnu daappig;

²¹ lamnu bala haɗag golppa hak, lam, amu hoqap ele, golppaib hak;

²² lamnu wik babaittaknu keeke; tiig amuppanu awa tauɗeb ukkaknu tappiɗ, tappiɗ naunau, amu tappiɗ danab amuppa kalu danab ile muttuɗig enanag bette ilappig ele, amu oh am gol ena dubuttid iitta eleppa hak; aria, Yawenu mettid lagnu od laala golppa hak, Oo Gunnab Elenu od, amu oo anuqaknu od ele, amuam oh ele golppaib hak.