2 Stori 30 - Nobonob Baibel

Hesekaia nug Israel ag Pasowanu Hobul hekkulagnu dabmeum

¹ Hesekaia nug Israel danab ah ag Yawe binag mekkulagnu Pasowanu Hobul hekkulagnu dabma, nug Israel oh, Juda oh ele dooglagnu ⌊nai awa ukkak danab⌋ maatte goppig. Nug amu ha, nug ele Epraim, Manase ele dilagnu pas laa ya, me ukkom. Nug ag oh ag Jerusalem uɗin, ag Yawe, Israel dilag Kayak, ag nuhig mettid lag, amuppa Nug binag mekkulagnu Pasowanu Hobul hekkulagnu dabmak awa, nug amu oh heum.

² King Hesekaia, nuhikkud ehanittak anuqak danab, danab ah Jerusalem daappig ele, ag kalam aɗitppa Pasowanu Hobul hekkulagnu maittak aoppig.

³ Aɗinu? Mana mettak danab kuɗum laa ag Yawenu tituana mettak daaglagnu ii heppig, danab ah oh ag Jerusalem appa ele ii qagmeppig amunu, ag haenppanab Pasowanu Hobul hekkulagnu elele iitta. Ag anam elele iitta amunu, ag kalam aɗitppa hekkulagnu maittak aoppig.

⁴ Ag maittak amu aoppig amu, King Hesekaia, danab ah oh appa daappig ele, ag oh maittak amunu, “Am maittak tutukku,” dooppig.

⁵ Laa keeke amunu maittak aoppig ele amu, ag amu henana, ag danab ah oh aab onig Berseba ukka Dan batak, ag Jerusalem uɗin, Yawe, Israel dilag Kayak, ag Nug binag maknu Pasowanu Hobul hekkulagnu nai dooglagnu, ag nai amu meppeg gokkunu dabmeppig. Aɗinu? Danab haen amuppa Juda wanppa, Israel wanppa ele daappig amu, ag oolagppanu kuɗumnab, ag Yawe a, Moses yom bia uɗin, Pasowanu Hobul deɗ laa ii heppig.

⁶ King nug nai awa ukkak danab ag pas aon gokkulagnunab a, ag aakku kingnu pas amu aɗualadna, ahan Juda wan ohppa, Israel wan ohppa ele goppig. King, nuhikkud ehanittak anuqak danab ele ag pas amuppa inam yaappig. “O Israel danab ah, ag Yawe, Nug eɗua ahilagppa dokkunu, ag eɗun, Yawe, Nug Abraham, Aisak, Israel ele dilag Kayak, ag eɗun, Nug waappa dayeg! Ag gemu ihinig wanppa daatteb, Asiria dilag king diin ii goppig ele amu, ag uɗieg!

⁷ Ag awalkad, amalkad, amu ag mamelkad aɗi ele heppig bia aib heppig. Laa amu, ag Yawe, ag mamelkad aɗi dilag Kayak, ag Nug ippuanattomnu oo metta ii uuak kobol ii dim lamidppig amunu, Nug he, uug naunab ahilagppa be, laa ag anadna, ag amelag iɗuak dooppig. Ag gemu amu anidtteb.

⁸ Ag mamelkad aɗi heppig bia amu, ag ahilag dabmak dim lamidkkulagnu wagai meppeg, ɠagattag eppamanu dabmeig! Ag Yawe waappa daaglagnu dabmak aon dayeg! Ag ahan, nuhig mettid lag, Nug lag amu haen oh nuhignu tituana mettak daakkunu tituanom amu, ag amuppa uɗieg! Nug gemu ahilagnu oo nauhak huanaknab dootte amu, oo nauhak amu iitta mekkunu ag Yawe, ahilag Kayak, ag Nug waappa daan, Nug oɗe dim lamitteg!

⁹ Aɗinu? Ag eɗun, Yawe waappa daaglag dayeb, Nug heeb, kekeɗ ag Juda danab ah laa diin goppig ele amu, ag ahilagnu oo bodoetta le mak doon, ag heppeg, laa amu ag eɗun, wan imuppa uɗiglag. Yawe, ahilag Kayak, Nug oo bodoette enanag maɗoɗ ele hak kobol dim lamitta, Nug oo gai-iitta, oo metta, ehanittak kobol ele hanhan hette amunu, Nug anam hekku. Ag eɗun, Nug dim lamidkkulag dayeb amu, Nug ag ii geɗadma.” Pasppa yaak anam dayom.

¹⁰ Nai awa ukkak danab ag nai amu aon gona, Epraim wanppa, Manase wanppa, Seblon wanppa ele aabaabppa gona, Seblon wanppa batappig. Ag nai amu aon gona, appan danab nai amu ippunadppig, amge appan danab ag doon, ahilagnu, “Keeke hamunab,” doon, aon aon aqappig.

¹¹ Danab laippu laippu aakkuib, ag Israel dilag huu okkai Asernu, Manasenu, Seblonnu ele, danab laippu laippu amu ag akka ag onilag qeeg ne, ag Jerusalem teppig.

¹² King, nuhikkud ehanittak anuqak danab ele ag Yawe Nug ag Pasowanu aɗi hekkulagnu ippuanattom hekkulagnu haknunab appig amu, Juda appa Kayak Nug he, Juda danab ah ag nai amu dim lamidkkulagnu dabmak amu aon dayeg, dabmak amu ɠagattag dayom.

Juda danab ah, Israelnu laippu laippu ele ag Pasowanu Hobul heppig

¹³ Amu kalam aɗitppa danab ah huanak ag uɗin, Jerusalem appa gamag ahak ele Bret Yis Iitta Lanaknu Hobul Nakokppa daaglagnu qagmeppig.

¹⁴ Ag uɗin daan, ag Jerusalem appa kayak hambuppuaknu qaɗab, laala ag doɗ manadna, kayak hambuppuak mattaknu, laa am kalu danab ile muttuɗig enanag bettenu, ag qaɗab amu loppaɗna, ag keeke amu oh aon gona, oolnu noak onig Kidron, ag appa buɗiatteg goppig.

¹⁵ Danab huanak uɗin, Pasowa hekkulagnu sipsip nag baalag otaɗatteg, mana mettak danab, Lewi buɗubppan mana mettak danab iitta, ag ele amu anadna, amunu laa ag Yawenu tituana mettak ii daappignu uɗalag ne, ag ahan, Yawenu tituana mettak daaglagnu hena, ag ele doɗ aon, Yawenu mettid lakka gona, ag manaknu ofa heppig. Ag anam hena, ag Yawenu uɗat Nug laugppa hekkulagnu elele daaeg, danab ag kalam amunu deɗ 14ppa Pasowanu sipsip aon uɗin aqappig.

¹⁶ Lewi buɗubppan mana mettak danab, Lewi buɗubppan mana mettak danab iitta amu, ag Yawenu neekkakppa elele daaglagnu ag oolag, meulag ele oh babaittak kobol oh hena malona, ag Yawenu mettid lag, amuppa Kayaknu uɗat danab Moses ɗoppa ippuanattom bia hekkulagnu aben ahilag anen anenppa gona daappig. Ag anam daaeg, sipsip mamelkad ag sipsip aqaegeg, tiilag neene, Lewi buɗubppan mana mettak danab iitta, ag tiig amu aon, mana mettak danab mattaeg, mana mettak danab ag qaɗabppa tauɗ qedappig.

¹⁷ Danab ah uɗippig ele dilagnu amu, kuɗum ag Yawenu tituana mettak daaglagnu ii heppig amunu, ag Pasowanu sipsip ahilkad anen anen aqappeg, Yawenu tituanna mettaglagnu elele iitta. Anam amunu, Lewi buɗubppan mana mettak danab iitta, ag sipsip amu aqadkkulagnu sipsip mamelkad oulag daan, sipsip aqappig.

^18-19 Danab ag Yawenu neekkakppa elele daaglagnu ag oolag meulag ele ii bappaidna daappig amu, ⌊laa ag Judanu, amge⌋ danab ah kuɗum Epraim, Manase, Isakar, Seblon elenu uɗippig amu, ag oolagppa kuɗumnab, oh bia, ag Yawenu neekkakppa elele daaglagnu ag oolag, meulag ele oh ii bappaidppig, amge ag Pasowanu ee aakku lappig; ag ɗo yaak niitte ii dim lamidppig. Ag anam heppig amunu, diig amunu Hesekaia nug ahilagnu inam unuqittom. “O Yawe, na nahip hak am enaib. Amu na ɗo tippalppig imu oolagppanu aun nug meu ohppa na, na Kayak, na Yawe, na nug mamekkud aɗi dilag Kayak, nug na anitta dim lamidkkunu na mattidtte amu, na danab amunu ɗo tippalak uhuqna medakkutnu oɗ medattem. Ge, nug ɗo ippunigtte bia na ele ouqak daaglahnu elele iitta dayaya, Pasowanu ee latte, amge na amu uhuqna medakkutnu oɗ medattem,” awa unuqittom.

²⁰ Hesekaia nug anam unuqitte, Yawe doya, Nug danab ah amu dilag hipunin uhuqa mattom.

²¹ Juda danab, Israel danab ele ag Jerusalem appa qagmeppig amu, ag Bret Yis Iitta Lanaknu Hobul Nakok gamag ahak ele henana, ag deɗ eblaih aɗit ele gamag ahak naɗi doon daappig. Deɗ deɗppa amu, Lewi buɗubppan mana mettak danab iitta, mana mettak danab ele ag Yawe binag mekkulagnu ahi ettaegeg, laa ag Kayaknu musik haknu keekeppa musik heegeg, Israel buɗub ag hobulppa anam daappig.

²² Lewi buɗub ag Yawenu maɗi ahilag hekkulagnu diignu doyak tutukku ele oinna heppig amunu, Hesekaia nug ag ɠagattag aqom. Lewi buɗub amu ag deɗ eblaih aɗit ele aɗi ee mana mettakppanu aoglagnu daappig amu, ag ee amu aon lappig. Amu ag ele laippu dayaknu ofa Kayak mettan, ag Yawe, ag mamelkad aɗi dilag Kayak, ag Nug binag meppig.

²³ Danab ah oh qagmeppig ele, ag oh gamag ahak naɗi anam doon, ag deɗ eblaih aɗit baula qagmak gamag ahak ele amu hekkulagnu dabmeppig. Ag dabmeppig amunu, ag deɗ eblaih aɗit baula ele ag qagmak gamag ahak ele henan, gamag ahak okkai dooppig.

²⁴ Hesekaia, nug Juda dilag king amu, nug danab ah qagmeppig ele, ⌊ag doɗ aon, laih main, Kayak mettaglag, teppu laa oh ag aon lakkulagnu,⌋ nug makau dawai 1,000, sipsip, meeme ele 7,000 danab ah amu hekkulagnu ag mattom. Nug ag matte, ehanittak anuqak danab ag makau dawai 1,000, sipsip, meeme ele 10,000 ag madappig. Ag anam heeg, mana mettak danab kuɗumnab ag Yawenu tituana mettak daaglagnu hena daappig, ⌊amu diig amunu ag mana mettak uɗat hekkulagnu elele⌋.

²⁵ Juda danab ah, laa Israel wanppanu uɗippig, Lewi buɗubppan mana mettak danab, Lewi buɗubppan mana mettak danab iitta, wan laihnu danab ag Israel wanppanu, Juda wanppa ele uɗin daappig amu, ag oh ele anam daan, gamag ahak naɗi dooppig.

²⁶ Dawit bekka Solomon nug Israel dilag king dayeye, haen amuppa danab ah kuɗumnab ag Jerusalem uɗin, hobul okkai heppig. Haen amu dimppa ag kuɗum anambia ii uɗippig amunu, gemu Jerusalem appa gamag ahak naɗi dayom.

²⁷ Amu Lewi buɗubppan mana mettak danab ag ahan, danab ah itittak ena mattaglagnu heppig. Ag anam heeg, Kayak Nug hab attan, nuhig dayak aben oppiaawak eleppa dayeye, ag danab ah amu itattegeg, Kayak Nug itattak amu doya, ⌊itittak ena ag mattom⌋.