2 Stori 3 - Nobonob Baibel

Solomon nug Yawenu mettid lag buuom

¹ Solomon nug amu oh ha mala, nug Yawenu mettid lag digma buuom. Nug Jerusalem appa, qauko Moria, appa digma buuom. Qauko Moria appa amu, Yawe Nug Solomon mameg Dawit appa gumitta ukka, tula beum. Anukka ee aeg mumuɗaknu aben appa dayom am, Jebus buɗubppan danab Arauna, nuhig dayom, amge Dawit nug daden ma, Yawenu mettid lag aguppa daakkunu tituanom.

² Solomon nug king abenab awa, nuhig king dayaknu maɗ waɗeleppa nug kalam aɗit, deɗ aɗitppa Yawenu mettid lag digmeum.

³ Amu Solomon nug Kayaknu mettid lag buukkunu amu, nug lag ukku he, elab nuhig am 27 mita, emaitak nuhig am 9 mita dayom. Melemel amuam ag melemel amu anukka bappaidppig dayom.

⁴ Kayaknu mettid lag noobppa od dayomppa amu, odppa ukkaknu oo laa, veranda bia dayom. Oo amu, elab nuhig am Kayak laugnu emaitak bia; amuam 9 mita. Attan tak nuhig ele am 9 mita. Amu oo laa, veranda bia amu ooppa, gilil ohppa nug gol ena dubuttid iitta ele qataqeum.

⁵ Kayaknu mettid lag ooppa, Oo Gun Ele amuppa amu, Solomon nug ad pain amuppa geɗia, nug amu qaɗeppa gol enanag qataqeum. Nug golppa ad pam dottog, sen dottog ele hattom.

⁶ Amu Solomon nug anam ha, nug men daden nob okkainab ele, nug men amuppa mettid lag amu, anttak nuhig enanag daakkunu, nug men amu gililppa qata-aqom. Gol nug Kayaknu mettid lag, amuppa qataqeum ele amu, amuam Parwaim wanppanu aoppig.

⁷ Solomon nug anam ha, nug Yawenu mettid lag koɗokko uɗem ukkaknu duug attan, od ukku, gilil oh, od oh ele qaɗeppa gol qataqa, nug engel okkai-kerubim dottolag ele gililppa hoiyom.

⁸ Amu Solomon nug Kayaknu mettid lag ooppa, Oo Gunnab Ele heum. Oo amunu elab am mettid lag, lag amunu emaitak ele melemel laippu. Oo amunu elab am 9 mita, emaitak ele am 9 mita. Solomon nug oo amu ha, nug ooppa gilil ohppa 20,000 kilogram gol enanag awa, qataqeum.

⁹ Tutui, nug tutui amuppa uɗat heum ele, amuam golppa hak, ahilag uug am 600 gram. Amu Kayaknu mettid lag heqo laih laih oo laala daatteb, oo amu attan daatteb ele, nug amunu gilil qaɗeppa ele nug gol qataqeum.

¹⁰ Amu aa Oo Gunnab Ele daaglahnu, Solomon nug engel okkai-kerubim aɗit dottolah hoyata, nug golppa tonata qataqeum.

¹¹ Kerubim amu aa haulah taiettak dayom, haulah oh elab am 9 mita. Kerubim laa haug laih noob am Kayaknu mettid lag gilil laih aɗom, haug amu elab nuhig am 2 mita, 25 sentimita ele. Aria kerubim amu haug laih noob am ukka, kerubim laa haug laih noob aɗom. Haug laih amu ele, nuhig elab am 2 mita, 25 sentimita ele.

¹² Kerubim laa amu anam daye, kerubim laa am ele anamib dayom. Kerubim amuam haug laih am ukka, Kayaknu mettid lagnu gilil aɗom. Haug amu elab nuhig ele am 2 mita, 25 sentimita ele. Aria, kerubim amunu haug laihnu noob am ukka, kerubim laanu haug noob aɗom. Haug amunu elab ele am 2 mita, 25 sentimita ele.

¹³ ⌊Matu anak amubia,⌋ kerubim aɗit aa oh haulah, haulah amu oh elab tuɗittak am 9 mita. Aa baelahppa hippaidya daayya, aa Kayaknu mettid lag Oo Gun Ele neekkidya daapiɗ.

¹⁴ Amu Solomon nug ele linen muɗi hakkab, am linen muɗi kaala iɗu iɗu, am ed, perpel, kokoɗnab ele, nug muɗi amuppa lamen otala naɗi ha, nug engel okkai-kerubim dottog amuppa ele koitattom.

¹⁵ Amu oo laa, veranda bia, Kayaknu mettid lag odppa daatte amu, Solomon nug oo laa, veranda bia amunu od, od amuppa biidod aɗit qappalatkkunu haatom. Biidod aɗit amu anen anen, ahilah elab am 16 mita. Biidod aɗit amu anen anen ikkilahppa ikki tonaknu keeke laa dayom; ikkilah tonaknu keeke amu, ahilah elab anen anen am 2 mita, nakok laa ele.

¹⁶ Amu bala daakkunu, Solomon nug biidod aɗit anen anen ikkilahppa sen, lo akkak bia, amu pomigranet meu dottog 100 ele heum.

¹⁷ Solomon nug amu ha mala, nug biidod laa awa, Kayaknu mettid lag odppan, yau uɗitteppanu, appa qappom. Nug laa am awa, yawalti uɗitteppanu, appa qappom. Nug qappalata, nug laa yau uɗitteppanu daatte am onig Jakin ataɗom. Yawalti uɗitteppanu amu, onig Boas ataɗom.