2 Stori 27 - Nobonob Baibel

Usia bekka Jotam nug Juda dilag king ba dayom

¹ Jotam nug maɗ 25 dayaya, nug king ba dayom. Nug king ba, nug Jerusalem appa maɗ 16 king dayom. Nug anig am Sadok aɗeg Jerusa.

² Jotam nug Yawenu neekkakppa kobol genab tutukku ele dim lamittom; nug mameg Usia heum bia, nug heum. Amge nug mameg Usia nug Yawenu mettid lag ooppa ukkom bia ii heum. Jotam nug anam heum, amge Juda danab ah ag kobol nau ahilag ii uuppig, henan daappig.

³ Amu Jotam nug Yawenu mettid lag, nug lag amunu aɗnu od onig Od Attan babaittom. Laa amu, nug aabnu aɗ qauko nakok onig Opel guguittak ele, nug aben amuppa aɗppa babaittak okkai heum.

⁴ Laa amu, Jotam nug Juda wanppa qauko nakok daattebppa aab kalatta, aab aɗ ɠagattagnab ele, ⌊ban haknu⌋ lag attan ta ukkak menppa hak ele Juda wanppa atu daatteppa hattom.

⁵ Jotam nug king dayaya, nug he, nug, nuhikkud daup ele ag ahan, Amon wan baneb gona, Amon danab aqaglagnu ag ban hena, ag Amon eɗadppig. Ag eɗadna, Jotam nug he, Amon danab ag 3,400 kilogram silwa, 1,000,000 kilogram wit amu 1,000,000 kilogram bali ele nug medappig. Maɗ amu uue, ag baula anam mettaeg ukke, maɗ amu ele uue, am baula anamib heppig.

⁶ Jotam nug Yawe, nuhig Kayak, nug Nug hanhan dim lamittom amunu, Yawe Nug he, Jotam nug king ɠagattag okkai ele dayom.

⁷ Amu keeke laala oh Jotam nug heum, ban hak nug heum, keeke laala ele, kaya amuam ag buk laappa, buk amu onig am Israel, Juda Ele Dilag Kingnu Kaya, ag buk amuppa yaappig daatte.

⁸ Jotam nug maɗ 25 dayaya, nug king ba dayom. Nug king ba, nug Jerusalem appa maɗ 16 king dayom.

⁹ Jotam nug maɗ 16 king daya, nug mauhe, ag nug Dawitnu Aab, ag appa nug boumppig. Ag nug boumeg, nug bekka Ahas, nug abenabppa king ba dayom.