2 Stori 26 - Nobonob Baibel

Amasaia bekka Usia nug Juda dilag king ba dayom

¹ Ag Amasaia boumeg, Juda danab oh ag Amasaia bekka Usia, nug maɗ 16 dayaya, nug mameg abenabppa king ba daakkunu tituaneg, nug king dayom.

² Usia mameg Amasaia nug mauhe, amu dimppa amu, Usia nug aab onig Elat eɗua awe, Juda dilag baula daye, Usia nug aab amu babaitte, ena dayom.

³ ⌊Matu anak, amubia,⌋ Usia nug maɗ 16 dayaya, nug king ba dayom. Nug king ba, nug maɗ 52 Jerusalem appa king dayom. Nug anig am Jerusalem ah onig Jekolia.

⁴ Usia nug Yawenu neekkakppa kobol genab tutukku ele dim lamittom; nug mameg Amasaia heum bia, nug heum.

⁵ Sekaraia nug Usianu ehanittak danab laa. Nug Usia ebehi oh Yawenu bodoetta le mekkunu ippunittom amunu, Sekaraia bau dayom, haen amu oh Usia nug Yawe antta dim lamidkkunu Nug mattiom. Amu nug Yawe antta dim lamidkkunu Nug mattiom, haen amu oh Kayak Nug he, Usia nug aɗi heum am ena beum.

⁶ Amu Usia nug aha ukka, Pilistia ele ban ha eɗatta, nug Pilistia dilag aab Gat, Jabne amu Asdot ele dilag aɗ loppaɗom. Usia nug loppaɗa, nug aab laala Asdot guguittak, Pilistia wanppa aben laalappa ele kalattom.

⁷ Kayak ehanitte, nug Pilistia dilag daup, amu Arebia danab Gurbal daappig, amu Meun danab ele eɗattom.

⁸ Amon danab ele ag hanhan maɗ anen anenppa en takis bia, aon uɗin, Usia medappig. Amu Usia nug king daye, nuhig ɠagattag am okkai ele amunu, danab Isip ooppa ele, ag nuhignu nai dooppig.

⁹ Amu Usia nug Jerusalem appa aɗnu od onig Daugppan Od, aɗnu od laa onig Oolnu Noaknu Od, amu aben laa aɗ tutukku ii ukkom ele, aben amu ohppa nug ⌊ban haknu⌋ lag attan ta ukkak menppa hak heum. Nug lag amu ha malowa, nug he, ɠagattag daappig.

¹⁰ Amu Usia nug ⌊daup ag aguppa daappeg, kekeɗ ag uɗippeg anadna ban hekkulagnu,⌋ atu taɗakppa ele ⌊ban haknu⌋ lag attan ta ukkak menppa hak ele hattom. Usia nug doɗ kuɗumnab ele. Doɗ amuam qauko okkai diigppa qauko nakok daatteb, amuppa, amu wan uɗemppa ele daappig amunu, nug le aben laala wan moɗppa qagmeeb, doɗ ag lakkulagnu wan moɗ ele buuattom. Amu Usia nug dad hekkunu oo huana heum amunu, nug he, danab kuɗum ag eenu dad nuhig, grepnu dad nuhig ele, qauko nakokppa, oolnu noak wan ittag eleppa daappig amu, danab amu ag aguppa daan atognoadppig.

¹¹ Amu Usianu daup ag ban hekkulagnu elele daan, ban hekkulagnu babaittak daappig. Nai yaak danab, Jeiel, daup dilag okkai laa Masea ele aa ban danab amu ebqeya, ag obatak anen anenppa daaglagnu otiadya maadpiɗ. Kingnu ehanittak anuqak danab laa, Hanania, nug danab aɗit amu gumatom.

¹² Judanu baekkudppanu okkai danab, ag daup dilag okkai ele daappig amu, ahilag ebqak am 2,600.

¹³ Daup dilag okkai 2,600 amu waappa, daup danab 307,500 daappig. Daup amu, ag ban hekkulagnu sul aon malappig amu, ahilag ɠagattag am okkai, amu ag kekeɗ ahappeg, king ehanidkkulagnu elele daappig.

¹⁴ Daup ag anam daappig amu, Usia nug ag oh ban hekkulagnu keeke, amuam guppiɗ, ban, igippan hat aenppa hak, beɗuppan lamen aenppa hak, lat, katapulnu men ele, nug keeke amu oh daup amu mattom.

¹⁵ Amu Jerusalem appa Usia nug he, doyak danab ag keeke laala bappaidppig. Amuam masin ag lat doɗo, men okkai ele eppeg gokkunu elele. Ag keeke amu aon, lag attan ta ukkak menppa hak bappaidppig, lag amunu koɗokko uɗem ukkakppa, aɗ daug daugppa ele maadppig. Kayak Nug Usia ehanittak okkai mette, diig amunu Usia, Juda ele ag ɠagattagnab daappig amunu, danab ah umanab daappig, ag nug onig aakku doon, binag humappig.

¹⁶ Amge Usia nug ɠagattag ba dayowa, Usia nug dada danab be, kobol amu he, nug na qeum. Nug dada danab ba daya oiya, nug Yawe, nuhig Kayak, nug Nug ippunattomnu oo metta ii uuak kobol ii dim lamitta ha, ⌊nug nukka nug mana mettak danab abenab awa,⌋ nug Yawenu mettid lag ooppa ukka, nug kalu danab ile muttuɗig enanag bette ele amuppa kalu muttuɗig enanag ileb baknu qaɗabppa amotkkunu ukkom.

¹⁷ Nug lag ooppa amu hekkun ukke, mana mettak danab Asaria, Yawenu mana mettak danab 80 laa ele, ag Asaria ele oh oolagppa ɠagattag dooppig amu, ag oh Usia dim lamidna wappig.

¹⁸ Ag nug dim lamidna gona, ag nug amegppa appig. “Usia, na hettem imuam tutukku iitta. Kalu danab ile, muttuɗig enanag bettenu uɗat am nahip iitta. Iitta! Am mana mettak danab, Aron buɗub, ag Yawenu tituana mettak daatteb amu, am amu dilag uɗat. Anam amunu na eɗun, Kayaknu mettid lag dimittim gokkutoitte! Na Yawe Kayak ippunittomnu oo metta ii uuak kobol ii dim lamidna, eheɗ iikku heme amunu, Nug na binan ii mettama,” aon appig.

¹⁹ Usia, nug kalu danab ile muttuɗig enanag bette tappiɗ ⌊brasppa hak⌋ ina, tappiɗ amu qaɗab guguittak aɗa daya, kalu amu ilaknu babaittak daye, mana mettak danab ag anam aeg, nug oo nauhom. Nug oo nauhe, nug Yawenu mettid lag ooppa kalu muttuɗig ena ele manaknu qaɗab guguittak ag noolagppa daya, eheɗ nau alattette, Kayak nug he, gaɗa oɗe nau nug ele uɗappa ba, miag atiom.

²⁰ Kayak Nug anam he, haen mana mettak ikki danab Asaria, mana mettak danab laa oh ele ag gaɗa oɗe nau nug uɗappa be anidna, ag nug ele lag uua, dimittim gokkunu huana tappaɗeg, nug ag ele oh paha dimittim goppig. Ge, Usia nug ele, ⌊nug eheɗ he,⌋ Yawe bu mettom doyom amunu, nug lag ooppa daya, kalu danab ile muttuɗig enanag bette qaɗabppa ilakkunu uua, nug ele paha dimittim gokkunu dabmeum.

²¹ King Usia nug eheɗ he, Yawe Nug bu metta he, gaɗa oɗe nau nug qa, ii uuitte ukke, nug mauhom batak am anam dayom. Nug oɗe amu ele amunu, nug Yawenu mettid lakka tekkunu elele iitta, amu nug kingnu lag enappa daakkunu ele elele iitta daya, nug lag piɗe laappa dayom. Usia nug anam daya, nug king dayom, amge nug bekka Jotam nug kingnu uɗat amu haaha, king laug, am wan ele gumeeme ukke, mameg Usia mauhom batak.

²² Amu keeke kuɗum laa ele King Usia nug nuhig king dayaknu haenppa digma ukka batakppa heum, kaya amuam propet Aisaia, nug Amos bekka amu, nug bukppa yom daatte.

²³ Amu Usia nug mauhe, danab ah ag, “Nug gaɗa oɗe nau ele,” appig amunu, ag nug king boumppigppa ii boumppig. Iitta. Ag boumak aben laa, king dilag boumak aben guguittak, aben amuam king dilag wan amu, ag aguppa Usia boumppig. Ag nug boumeg, nug bekka Jotam nug mameg abenabppa king ba dayom.