2 Stori 25 - Nobonob Baibel

Amasaia nug Juda dilag king beum

¹ Amu Amasaia nug maɗ 25 dayaya, nug king ba dayom. Nug king ba, nug maɗ 29 Jerusalem appa king dayom. Nug anig am Jerusalem ah onig Jehoadin.

² Amasaia nug Yawenu neekkakppa kobol genab tutukku ele dim lamittom, amge nug meu ohppa ii heum.

³ Amasaia nug king ba daye ukke, king dayaknu ɠagattag nug eppegppa daye amu, nug kingnu ehanittak anuqak danab aɗit, aa nug mameg qeeh mauhom ele, nug aa aqate mauhpiɗ.

⁴ Nug he, aa mauhpiɗ, amge nug Yawenu haknunab nai, Ɗo Nai Buk, Kayak Nug Moses amegppa a, Moses nug bukppa yom amu, nug nai amu laa dim lamitta, danab amu, aa nug mameg qeeh mauhom, nug aa bekkalti ii aqe mauhppig. Haknunab nai amuam inam. “Ag nid dilag hipuninnu anig mameg ii aqappeg mauhkkulagoitte. Am anig mameg hipunin heppignu nid ii aqappeg mauhkkulagoitte. Aun laa nug eheɗ heum, am nukka nuhig eheɗnu qeppeg mauhkkuoitte; laa ii mauhma.” Nai amu daatte amu, Amasaia nug amu dabmaama, nug nai amu dim lamittom.

⁵ Amu Amasaia nug nai me, Israel dilag huu okkai Judanu danab, Israel dilag huu okkai Benyaminnu danab ele doon uɗieg, nug ag onilkad, ag baelkadppa onig anen anen waappa ya, obatak amu anen anen amu, nug ag ban daup 1,000 dilag ikkilkad, ban daup 100 dilag ikkilkad amu, nug obatak anen anen amu ag danab okkai amu waappa maatte daappig. Amasaia nug amu ha mala, nug danab ag ahilag maɗ am 20, o 20 eɗittak ebaqom. Nug ebaqa, nug danab 300,000 ag daup daaglagnu elele daappig anattom. Danab amu oh ag ban, guppiɗ ele aɗan, ban hekkulagnu elele daappig.

⁶ Amasaia nug amu ha, nug Israel dilag king silwa 3,400 kilogram mette, Israel dilag king nug he, Israel dilag daup 100,000, ag Amasaia ehanidkkulagnu nug gumidna goppig.

⁷ Amasaia nug anam heum, amge Kayaknu danab laa nug uɗia, King Amasaia amegppa aum. “O king, Israel dilag daup imu ag na ele ban hekkulagnu aib goppig. Aɗinu? Yawe Nug Israel ele ii daatteb. Ao, Nug Epraim buɗub imu ele ii daatteb.

⁸ Anam amunu, na ag ele banppa gokkulag dayeb, Kayak Nug heeb, kekeɗ ag na eɗidkkulag. Ge, na gona, ban enanag, ɠagattag ele hekkut, amge kekeɗ ag na eɗidkkulag. Aɗinu? Kayak Nug laa ehanitteb, laa amu nug nuhig kekeɗ eɗidkku, o Nug heeb, laa amu nug na nidakkunu ɠagattag ele,” awa aum.

⁹ Kayaknu danab amu nug anam a, Amasaia nug oɗ mettom. “Anam, amge da Israel dilag daup imu ag uɗin, da ehaniɗkkulagnu Israel dilag king silwa 3,400 kilogram metten malami. Silwa amuam hamu qettoɗmanu am da attem hekkul,” awa od mettom. Nug anam oɗ mette, Kayaknu danab amu nug nob ma aum. “Yawe Nug amu eɗittaknab eɗua medakkunu elele,” awa aum.

¹⁰ Kayaknu danab nug anam aum amunu, Amasaia nug Israel dilag daup ag eɗun, Israel wanppa gokkulagnu aum. Nug amu a, ag Juda dilagnu oppoɗilag be amelag kokoɗ eppe, ag eɗun, ag appalag diigppa gokkulagnu goppig.

¹¹ Israel dilag daup ag eɗun ukkaeg, Amasaia nug ooppa ɠagattag doya aha, nug nuhikkud daup noolag awe, oolnu noak onig Yunu Oolnu Noak goppig. Ag ukkaeg, appa Edom dilag daup ele ban hena, ag Edom dilag daup 10,000 aqaeg mauhppig.

¹² Juda dilag daup ag ele Edom dilag daup 10,000 laa am aɗualadppig. Ag aɗualadna, diin gona, baippa buɗiatteg nona, ag beɗulag oh aoɗe, hupu hupu neum.

¹³ Amasaia, nuhikkud daup ele ag anam heegeg, Israel dilag daup Amasaia nug ag eɗun, appalag diigppa gokkulagnu ana, nug ag ele oh banppa gokkulagnu aib aum amu, ag gonana, ag Juda dilag aab laala ele ban heppig. Ag aab amuppa ban heppig ele amu, aab amuam Samaria, Bethoron ele gamagppa daappig. Israel dilag daup amu henana, ag Juda danab ah 3,000 aqaeg mauheg, ag laih amuppanu Juda dilag en okkai ele aon goppig.

¹⁴ Amge Amasaia nuhikkud daup ele ag Edom danab kuɗum aqaeg mauheg, haen ag eɗun uɗina amu, Amasaia nug Edom dilag kayak hambuppuak dottolkad ele awa uɗia, dottolkad amu nuhig kayak daaglagnu maatta, nug ag noolagppa dup noa binalag maama, nug doɗ manatta, ag mattom.

¹⁵ Nug anam heum amunu, Yawe Nug Amasaianu oo huanak nauhom. Nug oo huanak nauhe, Nug propet laa me ukka, propet amu nug Amasaia amegppa aum. “Kayak hambuppuak amu ag ahilkad danab ah na eppenppa padal memananu ehanadkkulagnu elele iitta daappig amunu, aɗinu na kayak amu ag ulum nai mettaglagnu oɗ madattem?” awa oɗ mettom.

¹⁶ Propet nug anam mattieye, nai nuhignu mattiom am gog ii teum, amge King Amasaia nug aha, nuhignu nai am okkula, nug amegppa aum. “Da am king, amu ig na da ulum meɗak danab daakkutnu tituanidmutte? Uue! Na ii uukkut dayeb amu, da appi, na mauhkkut,” awa aum. Amasaia nug anam a, propet nug mattiak uuom, amge nug tatam nai tutu laa mattia, inam aum. “Na tatam eheɗ heme, gemu na dahil ulum mettak nai dookkutnu uume amunu, da doottem, Kayak Nug nuhig dabmak na nitteb mauhkkutnu ɠagattag eppom daatte,” awa aum.

¹⁷ Propet anam aum dimppa amu, Juda dilag king Amasaia nug nuhikkud ulum mettak danab ele nai madippig. Ag nai mattin, Amasaia nug Israel dilag King Jehoasnu nai me ukkom. Jehoas nug Jehoahas bekka. Jehoahas nug Jehu bekka. Nai nug me ukkom am, “Na nahipad daup ele ag uɗippeg, ig ban hetu!” Nug nai amu me ukkom.

¹⁸ Amasaia nug nai amu me ukke, Jehoas, Israel dilag king, nug Juda dilag king Amasaianu nai inam nob meum. “Lebanon wanppa keeke qaun ele laa ad sida toppa nai me ukke, am inam amegppa aum. ‘Da ool inam daatte. Geha na aɗen da bekkal medappe, aa ewau matulak aoglah,’ awa aum. Keeke qaun ele nug anam mattiom, amge doɗ dakkuɗ laa aben amuppa oiyaya, nug keeke qaun ele amu tappe, keeke qaun ele aakku nauhom.

¹⁹ Amu na nakka, na amenppa, ‘Da Edom dilag daup eɗadmi,’ anana, gemu na dada danab, beɗuppa tak danab ele daattem. Na anam doon oittem, amge na da ele ban hekkunihnu aib heme. Na nahip wanppa daye! Aɗinu na eheɗ nidakkunu hettem? Aɗinu na heppe, na, Juda ele nena qekkulag?” Jehoas nug nai amu Amasaianu eɗua me ukkom.

²⁰ Jehoas nug nai amu me ukke, Amasaia nug anttom amge nug, Juda danab ele ag Edom dilag kayak hambuppuak noolagppa dup nona binalag meeg, Kayak Nug diig amunu Jehoas ehanitteb, nug eppegppa Amasaia, Juda ele bu madakkunu dabmeum amunu, Kayak Nug he, Amasaia nug Jehoasnu nai dabmekkunu uuom.

²¹ Jehoas nug nai amu me ukkom, amge Amasaia nug King Jehoas nai aum dookkunu uue, amu Jehoas, nug Israel dilag king, nug nuhikkud ban danab ele ag Juda wanppa ban hekkulagnu uɗippig. Ag oh anam hena, ag Juda wanppa Betsemes appa ag nug uɗa tena, ban heppig.

²² Ag ban hena, Israel dilag daup ag Juda dilag daup eɗatteg, Juda dilag daup ag oolna, laulkadppa goppig.

²³ Amu Betsemes appa ag ban henana, banppa Israel dilag king Jehoas nug Ahasia alag Amasaia, nug Joas bekka, Juda dilag king amu, nug nug aɗom. Jehoas nug Amasaia aɗa, nug awa, Jerusalem ukka, nug Jerusalem ooppa ukka he, nuhikkud daup ag Jerusalemnu aɗ laih laa od onig Epraim Od, appanu ukka ukka, od laa onig Daugppan Od, appa batak ag aɗ amu oh loppaɗppig. Aɗ laih amunu elab am 200 mita, keeke.

²⁴ Jehoas nug anam ha, nug gol, silwa oh ele Kayaknu mettid lakkanu, appa uɗat haknu keeke, Obetidom gumom, amu oh ele, amu en king laug enanagnabppa dayom ele awa ukkom. Jehoas nug amu oh awa, Juda danab ah laala ele aɗalatta, Juda ag baula ban hemananu, ag guppiɗ bia daaglagnu, nug ag ele diia, nug eɗua Samaria ukkom.

²⁵ Anam daye ukke, Jehoahas bekka Jehoas, Israel dilag king, nug mauhe, Joas bekka Amasaia, Juda dilag king, nug maɗ 15 baula daya, nug ele mauhom.

²⁶ Amu keeke kuɗum laa ele King Amasaia nug nuhig king dayaknu haenppa digma ukka batakppa heum amu, kaya amuam ag buk laappa, buk amu onig am Juda, Israel Ele Dilag Kingnu Kaya, ag buk amuppa yaappig daatte.

²⁷ Amu Amasaia mauhomnu amu, haen nug Yawe dimetta, kayak hambuppuak laa dim lamidkkunu oiyom, haen amuppa laa Jerusalem appa ag nug qeppeg mauhkkunu dabmak aon, ib madippig. Ag anam heeg ukke ukke, maɗ kuɗum uue, ⌊amu hekkulagnu wagai meeg,⌋ Amasaia nug oola, Lakis ukkom, amge ag amu hekkulagnu heppig ele ag danab laa maatteg gona, Lakis appa ag ib anidna, nug qeeg mauhom.

²⁸ Ag qeeg mauhe, laa ag gaɗa hos attan mena, aon uɗin, Jerusalem appa mamekkud aɗi boumadppigppa boumppig.