2 Stori 23 - Nobonob Baibel

Jehoiada nug he, Joas nug Juda dilag king ba dayom

¹ Atalia nug anam kuin dayaya, kuin dayak nuhig maɗ eblaih aɗit ele, maɗ amu ooppa amu, mana mettak danab Jehoiada nug nuhig ɠagattag he, miag atiom. Nug ban daup 100 dilag ikki, nug ag ele nug tituanna nai qagappig. Danab amu onilag am; Jeroham bekka Asaria, Jehohanan bekka Ismael, Obet bekka Asaria, Adaia bekka Masea, am Sikri bekka Elisapat.

² Amu danab tanig ele amu ag Jehoiada ele nai qakkan, danab tanig ele amu ag ahan, Juda wan ohppa oinna heeg, Lewi buɗub, Israelnu baelkadppan danab okkai ele ag aab anen anen ohppan ahan, Jerusalem uɗippig.

³ Ag Jerusalem uɗin, ag Kayaknu mettid lag, amuppa ag Joas ehanidkkulagnu nug tituanna nai qagappig. Ag uɗin daaegeg, Jehoiada nug ag amelagppa aum. “Anukkanab Yawe Nug Dawit buɗub oolagppanu laala ag ahilag haen anen anenppa, ag Israel dilag king hanhan bena daaglagnu nai ana qakkom amunu, Kayak aum bia king bekka Joas nug king ba daakkunu daatte.

⁴ Anam amunu, ag inam inam hekkulagnu daatteb. Ag mana mettak danab, amu ag Lewi buɗubppan mana mettak danab iitta, ag ele, ag obatak obatakppa daatteb, amu obatak laa ag Sabat deɗppa ahilag uɗat hekkulagnu tituanak daatteb, ag ahilag uɗat hekkulagnu uɗinna, ag oolagppanu obatak laa ag Yawenu mettid lagnu od guman daaglag.

⁵ Obatak laa ag king laug enanagppa wana guman daappeg, aria obatak laa ag am aabnu aɗnu od onig Ukkunu Od, ag appa wana daaglag. Ag mana mettak danab, aria ag Lewi buɗubppan mana mettak danab iitta ele, ag anam daaglag, amge ag danab laa oh, ag Yawenu mettid lagnu haɗap anen anenppa daaglag.

⁶ Ag wana, anam daappeg, danab laa nug Yawenu mettid lag ooppa ii wama. Iitta. Lewi buɗubppan mana mettak danab, Lewi buɗubppan mana mettak danab iitta ele, ag deɗ amuppa Yawenu mettid lag, amuppa uɗat hekkulagnu daatteb, ag Yawenu tituana mettak daatteb amunu, ag Yawenu mettid lag, amuppa wakkulagnu elele, amge ag danab laa oh, Yawe Nug danab aun nug Lewi buɗub iitta, nug nuhig mettid lag ooppa ii nomanu aum amunu, ag nai amu dim lamidna, dimittim dayeg!

⁷ King, nuhigppa eheɗ laa bemanu ag Lewi buɗubppan mana mettak danab iitta, ag king talilidna dayeg! Ag anam daanna, ag anen anen oh ag ahilag ban haknu keeke ag eppelagppa aɗeg! Ag anam daappeg, aun nug Yawenu mettid lag, amuppa ukkaknu ehah iitta ele gokkunu heebeb, ag nug qeppeg mauhaɗ! Ag king guman daappeg, nug adeppa adeppa gokku amu, ag nug ele oh ukkeg!” awa aum.

⁸ Jehoiada nug anam a, Lewi buɗub, Juda danab oh ele ag mana mettak danab Jehoiada nug haknunab aum bianab aakku heppig. Lewi buɗub laa ag Sabat deɗppa ahilag uɗat hena malan, ag laulkadppa gokkulagnu daappig, laa ag haen amuppaib uɗin, uɗat digmena hekkulagnu daappig ele, Jehoiada nug ag oh daaglagnu aum, nug obatak laa ag lakka gokkulagnu ii aum amunu, ag ele aakku anamib daan, ahilkad okkai anen anen dim lamadppig.

⁹ Anam daanna, Jehoiada nug ban daup 100 dilag ikkilkad, nug ag qep elab, guppiɗ okkai, naunau ele, keeke amu oh anukka King Dawitnu daappig amu, nug keeke amu awa, ban daup ikki amu mattom. Keeke amu oh am Kayaknu mettid lag, amuppa daappig.

¹⁰ Nug daup dilag okkai ban haknu keeke amu matte, ag panin aoeg, Jehoiada nug he, danab ag king guman talilidna daanna, ag bannu keeke eppelagppa aɗappig. Ag qaɗab, Yawenu mettid lag ele guguittak daan, ag lag amunu yau uɗitteppanu ukka, yawalti uɗitteppanu aakku daappig.

¹¹ Daup ag anam daaegeg, Jehoiada, nug bekkod ele ag king bekka, Joas, ag nug omalna, dimittim uɗippig. Ag omalna uɗin, king haɗ nug igippa mena, ag Kayaknu nug tituana nai qakkak nai buk itoɗiakppa yaak niitte mettan, ag nid amu nug king daattenu eppig. Ag Joas king daakkunu goɗen gokkaɗakppa tituanna, ag eppig. “King nug haen elab bau dayaɗ!” enana appig.

¹² Ag anam eegeg, haen Atalia nug danab ag King Joasnu gamag ahak doon eppignu muttub qak doya, nug danab ag qaiettan waegeg ele doya amu, nug aha, Yawenu mettid lakka, danab ah qagmeppigppa ukkom.

¹³ Ukka, nug Yawenu mettid lag odppa biidod elab galak daatte, amu guguittak king bau amu hibaitta dayeye anttom. Nug ban daup ikki, am trampet iwalak danab ele oh ag king guguittak daaegeg anatta, laa amu, nug Juda danab ah oh appa daappig, ag gamalag ahe henan eeg, laa trampet heegeg, laa ag musik haknu keeke aɗan, binag maknu ahi guman daaegeg anattom. Atalia nug amu antta, nug nuhig lamen elab pattiɗa, nug eum. “Ag ɗo tippalna, da uuiɗna, laa okkai daakkunu hetteb!” awa eum.

¹⁴ Atalia nug anam heum, amge mana mettak danab Jehoiada nug matu ban daup 100 dilag ikkilkad amelagppa aum. “Laa nug Yawenu mettid lagppa aib qeeb mauhom,” awa aum. Nug anam matu aum amunu, gemu ag nug aon, dimittim gokkulagnu ana, nug ag amelagppa aum. “Ag nug talilidna daan, ag aon, dimittim ukkeg! Laa nug ehanidkkunu dim lamidkku dayeb amu, ag nug qeppeg mauhaɗ!” awa aum.

¹⁵ Jehoiada nug daup dilag okkai amelagppa anam a, ag anam hena, ag Atalia aɗan omalna, ag king laug enanagnab guguittak, od laa onig Hosnu Od, ag amuppa wana, ag nug qeeg mauhom.

¹⁶ Aria, Jehoiada nug he, nug, King Joas nug, danab ah ele, amu Yawe ele ag nug tituanna nai qagappig. Nug tituana nai qakkak amuam, danab ah ag Yawenu danab ah aakkuib daaglagnu nai.

¹⁷ Ag nai amu qakkan malan, danab ah ag kayak hambuppuak Balnu mettid lakka gona, ag lag loppaɗppig. Ag qaɗab, am dottolkad ele amuppa daappig heeg nauheg, ag Balnu mana mettak danab Matan qaɗab guguittak qeeg mauhom.

¹⁸ Ag amu oh hena malaeg, Jehoiada nug Dawitnu nai anukkanu oh dim lamitta, nug mana mettak danab, ag Lewi buɗub amu, nug ag Yawenu mettid lagnu uɗat oh ag eppelagppa meum. Nug anam ha, nug ele mana mettak danab ag Mosesnu ɗo nai yaak daatte bia ag manaknu ofa hena, ag gamag ahak doon, ahi ettaglagnu Dawit nug amunu haknunab nai aum bia amu, ag hekkulagnu aum.

¹⁹ Amu danab nug Yawe ele ouqak daakkunu elele iitta nug Yawenu mettid lag ooppa gomanu, Jehoiada nug od gumak danab ag od guman daaglagnu maattom.

²⁰ Jehoiada nug amu he, nug ban daup 100 dilag ikkilkad, Juda dilag anuqak danab, Juda danab ah dilag okkai, aria Juda danab ah oh appa daappig ele omalatte, ag oh king Yawenu mettid lag, amuppanu omalna, kingnu lag enanagnab, appa goppig. Ag gonana, ag od laa onig Od Attan appa wana, ag king dayaknu lag enanagppa gona, ag king sia kingppa meppig.

²¹ Ag anam heeg, Juda danab ah ag gamag ahak dooppig. Ag Atalia qep elabppa qeeg mauhom amunu, Jerusalem appa maɗoɗib dayom.