2 Stori 22 - Nobonob Baibel

Ahasia nug Juda dilag king beum

¹ Aria, anukka Arebia danab, huu aɗit ag oinna, danab eheɗ nau hattanna, ahilkad keeke aon goppig ele, ag Juda dilag daup haen tutu dayaknu aab kalakppa uɗippig. Ag ban hena, danab aqadna, ahilkad keeke aoglagnu uɗippig. Ban danab amu ag anam uɗina, ag Jehoram bekkod laa oh aqaeg mauhppig. Ag mauhppig amunu, Juda dilag king Jehoram bekka huh bieg, Ahasia nukka dayom. Nug dayom amunu Juda ag ahan heeg, Ahasia nug Juda dilag king ba dayom.

² Ahasia nug maɗ 22 dayaya, nug king ba dayom. Nug king ba, nug maɗ laippu Jerusalem appa king dayom. Nug anig am Atalia. Atalia alag am Omri.

³ Ahasia anig nug Ahasia eheɗ hekkunu ɠagattag qettom amunu, Ahasia nug kobol nau Ahap, nug baekkudppa ele heppig, nug amu dim lamittatta, nug Yawenu neekkakppa eheɗ heum.

⁴ Ahasia mameg Jehoram mauhe, Ahap baegppanu danab laala ag Ahasianu ulum mettak danab bena daappig amunu, Ahasia nug Yawenu neekkakppa eheɗ heum. Kobol Ahap baekkudppa ag heppig, amubia nug ele heum. Nug anam ha, nug aakku diig amunu na qeum.

⁵ Nug Ahap baegppanu danab dilag ulum nai doya dim lamitta, nug aha, Israel dilag king Joram, Joram nug Israel dilag king Ahap bekka amu, nug nug ele oh aa Aram dilag king Hasael ele aab Ramot, Gileat wanppanu, aa appa ag ele ban hekkulagnu gopiɗ. Aa goya ban heeheh, Aram dilag daup ag Joram guittak okkai medappig

⁶ Aram dilag king Hasael, nuhikkud daup ele ag Joram guittak medappig amunu, nug eɗua, Ramot appa guittak awom, nug guittak amunu eɗua, ena daakkunu Jesril ukkom. Joram nug Jesril appa eɗua ena daakkunu daye, Juda dilag king Jehoram bekka Ahasia nug anidkkunu appa ukkom. Aɗinu? Joram, Ahap bekka, nug banppa guittak awom.

⁷ Amu Ahasia nug Joram anidkkunu ukkom, ib amuppa Kayak Nug he, Ahasia nug na qeum. Ahasia nug Jesril appa te, Joram ele daaeheh, Nimsi bekka Jehu, Yawe Nug nug Ahap buɗub heeb iitta mekkulagnu goɗen gokkaɗakppa tituanom amu, nug uɗieye, Joram, Ahasia ele aa nug uɗa tekkulahnu nug gumidya gopiɗ.

⁸ Amu Jehu nug Ahap baekkudppa oh aqeeb mauhkkulagnu haaha, nug Juda dilag okkai laa, Ahasia ele tiig laippu bekkalkad laala ele, ag oh Ahasia ehanidppig amu, Jehu nug ag anatta, nug aqe mauhppig.

⁹ Jehu anam ha, nug Ahasia ele antta, qeeb mauhkkunu nug mattiom. Nug mattieye, nuhikkud daup ag Ahasia Samaria appa, nug lokkuma dayeye anidna, ag nug aɗan, aon gona, Jehu eppegppa meeg, nug he mauhom. Ag qeeg mauhom, amge ag nuhignu, “Jehosapat nug Yawe mattia, dim lamidkkunu meu ohppa Nug mattiom, amu danab imu nug Jehosapat bekka,” appig amunu, ag nug boumppig. Ag nug qeeg mauhe boumppig, nug nid danab okkai laa iitta amunu, Ahasia tiignab nuhig ou daya, Juda dilag king ba, king daakkun laa ɠagattag elele ii dayom.

Ahasia anig Atalia nug nukka ha, nug Juda dilag okkai ba dayom

¹⁰ Amu Jehu nug Ahasia qe mauhe, Ahasia anig Atalia nug nug bekka Ahasia mauhom doyowa, nug aha he, laa ag danab oh ag Juda dilag king ele tiig laippu amu, ag aqaeg mauhppig.

¹¹ Amge ag laippu ii qeppig. Atalia nug he, laa ag oh Juda dilag king ele tiig laippu aqappeg mauhkkulagnu heegeg, King Jehoram aɗeg laa Jehoseba, nug Ahasia bekka Joas lokkuma awa, nug ah nid amu gumom ele niiaknu oo laappa lokkumatom. Jehoseba, nug King Jehoram aɗeg, mana mettak danab Jehoiada wau ele amu, nug am Ahasia appinag amunu, nug Atalia nid amu qeeb mauhmanu anam heum.

¹² Jehoseba nug Joas maɗ eblaih laippu ele Kayaknu mettid lag ooppa nug gamu ele lokkumeh dayom. Dayeye, haen amu Atalia nug Juda dilag kuin dayom.