2 Stori 21 - Nobonob Baibel

¹ Amu Jehosapat nug mauhe, ag nug Dawitnu Aab, appa nug mamekkud aɗi boumadppigppa boumppig. Nug mauhe amu, nug bekka Jehoram, nug mameg abenabppa king ba dayom.

Jehosapat bekka Jehoram nug Juda dilag king abenabppa ta, king dayom

² Jehoram nug am Jehosapat bekka laa, amu Jehosapat bekkod laa am Asaria, Jehiel, Sekaraia, Asariahu, Maikel, am Sepatia. Ag, Jehoram ele oh ag Jehosapat bekkod. Jehosapat nug nuhig haenppa Juda dilag king dayom.

³ Amu Jehosapat nug ii mauhom haenppa, nug bekkod laa oh silwa, gol, en laala ele kuɗum ahilag daakkunu ag hamu matta, nug ag Juda dilag aab okkai ɠagattag aɗ ele, ag amu laala gumadkkulagnu maattom, amge Jehoram, nug nid danab tatamnu dayom amunu, Jehosapat nug Jehoram king daakkunu ehah nug mettom.

Jehoram nug Juda dilag king dayom

⁴ Amu Jehoram nug mameg king abenabppa king ba daye ukke, nug he, Juda dilag king daakkunu ɠagattag nug eppegppa daya, nug amakkud oh qep elabppa aqe mauheg, nug Israel dilag okkai laala ele anam aqe mauhppig.

⁵ Jehoram nug maɗ 32 dayaya, nug king ba dayom. Nug king ba, nug maɗ eblaih ewam ele Jerusalem appa king dayom.

⁶ Jehoram wau am Ahap aɗeg amunu, nug Israel dilag king ag kobol eheɗ dim lamidppig, Ahap nug baekkudppa ele, ag ele amu dim lamidna heppig amu, Jehoram nug ele amubia heum. Nug Yawenu neekkakppa eheɗ heum.

⁷ Jehoram nug anam heum, amge Yawe Nug Dawit ele nug tituanya, nai qagapiɗ amu, Yawe Nug nai amu dabmaama, nug Dawit buɗub heeb iitta mekkulagnu, Nug amu hekkunu uuom. Nug haen oh Dawit buɗubppan danab laa king daakkunu nai ana qakkom amunu, Nug anam heum.

⁸ Haen Jehoram nug Juda dilag king dayeye, amu Edom ag tappenak henana, ag baula Juda dilag king waappa ii daappig. Iitta. Ag ag oolagppanu laa nug ahilag king daakkunu king abenabppa meppig

⁹ Ag anam heppig amunu, Jehoram nug nuhikkud ban daup ikki, bannu karis nuhig oh ele amu diie, appa Edom ele ban hekkulagnu ukkom. Nug nuhikkud ele ag oh gona tena daaegeg, Edom ag uɗin, ag oo mattan aqaglagnu heppig. Ag anam heeg, Jehoram nug nuhikkud daup ag bannu karis gumatteb ele, ag tuqan ahan, ban ɠagattagnab hena, Edom nakok eɗadna goppig.

¹⁰ Anam amu, Edom ag eɗun, Juda waalagppa ii daappig; ahilag nai ele tabappeg nekkunu ii uuppig. Gemu ⌊nai imu yaak haenppa⌋ ele ag anamib daatteb. Amu Jehoram nug Yawe, nug mamekkud aɗi dilag Kayak, nug Nug dimetta uuittom amunu, haen amuppa ele aab Lipna danab ah ag ahan, tappe nak henana, Juda waappa ii daappig.

¹¹ Amu Jehoram nug Juda dilag qauko nakok igippa kayak hambuppuak dilag mettid lag nakok bappalattom. Nug amu ha, nug he, Jerusalem danab ah, Juda danab ah laa ele ag kayak amu noolagppa dup nona binalag meppig. Nug Juda danab ah ib eheɗppa omalatte goppig.

¹² Amu deɗ laa propet Elaiya, nug pas laa me ukke, Jehoram awom. Pas amuppa Elaiya nug inam yom. “Yawe, Nug na memetan anukkanu Dawit, nuhig Kayak, Nug inam atte. ‘Na amu, na mamen Jehosapat, na alan Asa, Juda dilag king amu, na ahilah hak bia ii heme, gemu ele ii hettem.

¹³ Iitta. Na Israel dilag king, na ahilag hak nau dim lamidnana, na he, Juda danab ah, Jerusalem danab ah ele ag Kayak dimettan, kayak hambuppuak dim lamadtteb. Israel dilag king Ahap ele anamib heum. Na amu heme, gemu ele hettem, amge amuib iitta. Na ele amapadnab aqe mauhppig. Ag am na mamen bekkod. Ag am danab ena, na danab nau.

¹⁴ Antte! Yawe Nug heeb, nahipad danab ah, na baenadppa, ah nahipad ele ag bu nau aoppeg, nahipad keeke ele nauhkku.

¹⁵ Nahipnu amu, oɗe nau na biit ooppa beeb, na mauhkkut, amge na paha ii mauhmana. Iitta! Na oɗe nau amu ele daappe ukkeb ukkeb, na biit ooppa nauha autanab aweb, na biit keha, miag beeb, na mauhkkut.’ ” Jehoram nug Elaianu nai amu pasppa awom.

¹⁶ Jehoram nug nai amu awe, dimppa Yawe Nug he, Pilistia danab, Arebia danab ele ag Kus danab gukkuattak daatteb ele, ag Jehoramnu oolag nauhom.

¹⁷ Danab amu ag anam doon, ag Juda banelag uɗin, Juda ele ban hena, ag Juda eɗadna, ag en oh kingnu lag enanagnab, amuppa dayom aon, king bekkod, nug wauud ele diippig. Ag ag diin, ag Jehoram bekka huh bieg Ahasia aakkuib uueg dayeye, ⌊bekkod laa oh aqappig⌋.

¹⁸ Amu dimppa amu, Yawe Nug he, Jehoram oɗe nau, dokta heeb ena bekkunu elele iitta amu, oɗe amu nug biig ooppa beum.

¹⁹ Oɗe amu nug biig ooppa be, maɗ aɗit ukke, oɗe heehe, nug biig keha ne, nug guittak naunab doyaya, mauhom. Nug mauhe, nuhikkud danab ah ag nug binag mekkulagnu aab naɗi ii ilappig. Nug mamekkud aɗi dilagnu ag heppig amu, ag Jehoramnu anam ii heppig.

²⁰ Jehoram nug maɗ 32 dayaya, nug Jerusalem appa king abenab awa, nuhig king dayaknu maɗ eblaih ewamppa nug mauhom. Nug mauhe, danab laa nug, “O gadon, king uuikka ukkom,” dab-ii-meum. Anam amu, ag nug Dawitnu Aab, ag appa nug boumppig, amge ag nug king dilag boumak abenppa ii boumppig. Iitta. Ag piɗe boumppig.