2 Stori 2 - Nobonob Baibel

Solomon nug Hiram ehanitteb, Yawenu mettid lag buukkun oɗ mettom

¹ Amu Solomon nug eɗua Jerusalem ta, nug mettid lag, Yawe onig amuppa daakkunu haknunab aum. Ana, nug lag enanagnab nuhig ele haknunab aum.

² Amu Solomon nug he, danab 70,000 ag keeke mawaknu danab daaegeg, danab 80,000 ag men qaukoppanu okkulnana aoppig. Danab 3,600 ag maɗi nid amu gumattak danab daappig.

³ Amu Solomon nug anam hewowa, nug nai laa imu me, Tair dilag king Hiram, nuhigppa ukkom. Nug aum. “Anukka da mamel Dawit nug nuhig lag enanagnab, nug aguppa daakkunu bappaidkkunu heehe, na ad sida kuɗum me uɗiom amu, da na ad amubia baula meppe uɗikkunu ool daatte.

⁴ Da digmein, Yawe, dahil Kayak, da nug laug laa buukkulnu hettem. Da lag amu nuhignu tituane medakkulnu hettem. Lag amuppa amu, ag kalu danab ile muttuɗig enanag bette ilaglag; ag bret Kayaknu tituana mettak daatte hanhan, Sabat bekkunu heebeb, balal laa Kayaknu mettid lag, amuppa daatte, ag bret amuppa mekkulag; aria, ag hanhan buttua, tueb, Sabat deɗppa, kalam bau betteppa, amu hobul dayaknu haen epeɗiakppa ele, Yawe, ihinig Kayak, Nug ippuanattom bia, ag manaknu ofa ele hekkulag. Ɗo amuam ig Israel, ihinignu hanhan daakku.

⁵ Nuhig mettid lag, da hekkul amu, amuam lag okkai, naɗinab daakku. Aɗinu? Ihinig Kayak Nug kayak laa oh eɗattak daatte.

⁶ Amge auntai laa nug mettid lag nuhig amu buukkunu elele? Hab, hab waappa, hab attan ukke ukke, adekku batatte, aben amu ohppa aben laa, Nug amuppaib daakkunu elele, laa iinab daatte amunu, aun nug nuhig lag buukku? Amu da am aun, da nuhig lag buukkul? Iitta! Da lag laa, aguppa mana mettak danab ag doɗ manan, Nug mettaglag ele aakkuib buukkul.

⁷ Amge na danab laa, nug golppa, silwappa, brasppa, aenppa, linen muɗi kaala iɗu iɗu ele, am ed, perpel, kokoɗnab ele, nug uɗat keeke amuppa haknu doyak okkainab ele, amu nug ele nai keeke menppa, o brasppa, o aenppa o adppa otaɗkkunu kobol ele doya auta autanab aotte amu, na danab amu anidna meppe uɗieb, nug dahilad uɗat nid, ag uɗat laala haknu doyak okkai ele, da mamel Dawit nug tituanattom amu, nug ag ele oh laippu Juda wan imuppa, Jerusalem ippa ele daan, uɗat hekkulagnu oɗ medattem.

⁸ Da doottem, nahipad uɗat nid ag ad oadkkulagnu doon autna aotteb amunu, na laala maadppe, ag ad sida, ad pain, algum ad ele Lebanon appanu watteg, na ad amu meppe uɗiglagnu ool daatte. Dahil danab ag nahip danab ele ag laippu daan, uɗat hekkulag.

⁹ Da ib amuppa ad elelenab aokkulnu ool daatte. Aɗinu? Yawenu mettid lag da buukkul amu, lag amuam okkainab, anttaknu enanag ele daakkuoitte.

¹⁰ Na amu hekkut dayeb amu, da nahipad maɗi nid ag ad oadkkulag amu, da 2,000,000 kilogram wit, 2,000,000 kilogram bali, 400,000 lita wain, 400,000 lita olip goɗen ele madakkul,” awa aum.

¹¹ Solomon nug nai amu me ukke, Tair dilag king Hiram nug antta, nug nai laa imu eɗua me, Solomon nuhigppa ukkom. “Yawe Nug nuhig danab ah dilagnu oo mauhtte amunu, Nug he, na ahilag king daattem,” awa yom.

¹² Hiram nug nai amu babaitta, nug tuɗitta, nai imu ele Solomon, nuhigppa me ukkom. “Ig Yawe, Israel dilag Kayak, Nug hab, wan ele heum amu, ig Nug binag humatu! Nug King Dawit nid danab laa mettom amu, nid amuam doyak dabmak ena ele. Nug dabmak meu unuqagnu doyak danab ele, nug keeke diignu doyak tutukku ele. Nid amu nug gemu king daya, nug Yawenu mettid lag, nuhig lag enanagnab ele hekku.

¹³ Da hei, Huram Abi nug na ehanidkkunu gokkunu daatte. Nug uɗat haknu doya auta autanab aotte.

¹⁴ Nug anig am Israel dilag huu okkai Dannu ah. Nug mameg am Tair danab. Nug gol, silwa, bras, aen, men, ad eleppa keeke hekkunu ippunittak awa malom. Nug linen muɗi hakkab, linen muɗi kaala iɗu iɗu, am ed, perpel, kokoɗnab ele, nug amuppa uɗat haknu dootte. Nug keeke laappa nai, o dottog otaɗkkunu ele dootte, amu na aɗi dottog medakkut, nug dottog amu golppa, o silwappa, o keeke attenppa otaɗkkunu elele. Nug ukkeb, nug nahipad uɗat nid ag uɗat laala haknu doyak okkai ele, aria, na mamen, dahil naɗi Dawitnu uɗat nid, ag ele uɗat laala haknu doyak okkai ele, nug ag ele oh uɗat hekkulag.

¹⁵ Amu na, dahil naɗi, na ig nahipad maɗi nid, na wit, bali, olip goɗen, wain ele megakkutnu nai qakkan ame amu, na amu meppe uɗiaɗ!

¹⁶ Amu da heppi, dahil uɗat nid ag digmena, Lebanon appa ad na uɗat amu hekkutnu elele oadnana heppeg, laa ag aon, yuppa mena, qagmena qakkan, aon gona, Jopa langppa eeɗkkulag. Appanu na aon, Jerusalem tekkut,” awa aum.

¹⁷ Hiram nug nai amu me uɗie, Solomon nug danab ag wan laihnu danab, Israel wanppa daan oippig ebaqom. Dawit ele anukka nug ebaqom, gemu Solomon nug baula iikku heum. Nug ebaqa, nug danab amu 153,600 daaegeg anattom.

¹⁸ Solomon nug ebaqa mala, gane daappig doya, nug danab 70,000 ag keeke maoglagnu tituanatta, nug danab 80,000 ag men qauko nakokppa okkulkkulagnu tituanattom. Nug amu ha, nug danab 3,600 amu, ahilag okkai daaglagnu tituanattom.