2 Stori 19 - Nobonob Baibel

¹ Amu ag ban anam heeg ukke, iitta me, haen Juda dilag King Jehosapat nug maɗoɗ ele eɗua, Jerusalem aabppa nuhig lag enanagnabppa te amu,

² Hanani bekka Jehu, nug propet amu, nug aha, King Jehosapat uɗa ta, nug amegppa aum. “Na danab nau ehanidkkut am enate? Na laa nug Yawenu nau ninig ele doottenu oo mauhak dookkut am enate? Na anam heme amunu, Yawe Nug nahipnu oppoɗi bak dootte.

³ Na nau amu heme, amge na ele he, Juda wanppa kayak hambuppuak Aserah dabmekkulagnu biidod ii daatte, na ele meut ohppa Kayak anidna dim lamidkkutnu Nug madittem amunu, Nug nahip ena hak laala amu ele anidtte,” awa aum.

Ag epeɗiak uɗat hekkulagnu, Jehosapat nug epeɗiak danab tituanattom

⁴ Amu Jehosapat nug Jerusalem appa dayom, amu nug aha, appanu Juda wan ohppa, amuam aab Berseba ukka, Epraim wanppa, qauko qauko daattebppa batak, nug aben amu ohppa oiyaya, nug danab ah ag eɗun, Yawe, ag mamelkad aɗi dilag Kayak, nug ag eɗun, Yaweib dim lamidkkulagnu a, aakku ag heppig.

⁵ Nug anam haaha, nug Juda wanppa danab ag aab okkai ɠagattag aɗ ele anen anen amuppa epeɗiak danab daanna, ag epeɗiak uɗat hekkulagnu tituanattom.

⁶ Nug epeɗiak danab amu amelagppa aum. “Ag danab waalagppa daan, ahilag uɗat ii hetteb. Iitta. Ag Yawe waappa daan, epeɗiak uɗat hetteb amunu, ag ahilag uɗat pehettak dabmenan heig! Ag haen oh epeɗiak hena, aun nug ena heum, aun nug eheɗ heum aegeg, Yawe Nug ag ele daatteb.

⁷ Amunu ag amu dabmena, ag ebehilag oh Yawenu bodoetta le maɗ! Yawe, ihinig Kayak, Nug nai doya mala hettoɗia epeɗia elele mettak kobol dim lamidtte; Nug kaliak nakok laa ii hette. Nug men doɗo awa, laa eheɗ heumnu, ‘Nug ii heum,’ iinab atte amunu, ag epeɗiak maɗi ahilag pehettak, eleleib heig!” awa aum.

⁸ Jehosapat nug anam ha, nug Jerusalem appa Lewi buɗubppan mana mettak danab iitta, ag oolagppanu laala, aria mana mettak danab laala, amu Israel baelkadppan dilag ikki laala ele ag Yawenu ɗo tippalaknu, danab ah dilag nai haknu ele epeɗiadkkulagnu tituanattom. Nug ag tituanatte, ag Jerusalem daappig.

⁹ Jehosapat nug danab amu tituanatta, nug ag amelagppa inam haknunab aum. “Ag ebehilag oh Yawenu bodoetta le meebeb, ag ahilag uɗatppa oo metta ii uuak kobol dim lamidna hanhan pehettak, meulag ohppa ele heig!

¹⁰ Ag lailkad, Juda danab ah, ag aab okkai anen anenppa daan, uug digdig ag epeɗiak danab, ag bappaidkkulagnu aon uɗiglag. Uug amuam ɗo digdig oolagppan laa tippalaktai, o haknunab anak tippalaktai, o ɗo mak nai laa tippalaktai, o layag qe mauhaktai, uug amu oh ag aon, ag bappaidkkulagnu uɗiglag. Ag nai amu aon uɗippeg, ag epeɗiak danab tituanak daatteb ele, ag danab amu ag Yawe, nuhigppa hipunin hemananu, ag nau aomnanu nai ag amelagppa mattieg! Ag amu ii hekkulag dayeb amu bu nau, Yawe eppegppanu, bu amu ag, amu ag lailkad ele ag tonadkku. Ag epeɗiak danab ag uɗat amu pehettak hekkulag amu, ag hipunin ii hemana.

¹¹ Amu nai laa Yawenu ɗonu uɗieb amu, mana mettak ikki danab, Amaraia, nug amunu okkai daakku. Amu nai laa wan ɗonu uɗieb amu, Juda dilag okkai laa, Ismael bekka Sebadaia, nug amunu okkai daakku. Aria, Lewi buɗubppan mana mettak danab iitta, ag ahilkad ehanittak anuqak daan, ag noolagppa uɗat hekkulag. Ag epeɗiak danab tituanak daatteb amu, ag oolagppa ɠagattag doon, uɗat heig! Amu henana, ag oolagppa aun aɗi ag ena hetteb ele amu, Yawe Nug ag ele daaglagnu ool daatte,” awa aum.