2 Stori 18 - Nobonob Baibel

Propet Mikaia nug Israel dilag king nug nau aomanu dabmettak nai mettom

¹ Amu Jehosapat nug anam he ukke, nug en okkainab, binag ele okkainab ele dayom. Nug anam daya he, nug bekka laa Israel dilag king Ahap aɗeg awom amunu, Juda, Israel ele ag layam batappig.

² Jehosapat nug anam ha daye, maɗ laala ukke, nug Ahap anidkkunu aha, Samaria ukkom. Nug ukke, Ahap nug sipsip, makau ele kuɗum Jehosapat, danab nug ele oh goppig ele lakkulagnu baalag otaɗatta, hobul naɗi ha, nug Jehosapat nug nuhikkud daup ele ag ahappeg, ag Israel dilag daup ele oh aab Ramot, Gileat wanppanu banelag gokkulagnu amegppa aum.

³ Ahap, nug Israel dilag king, nug amu hekku haaha, nug Jehosapat, Juda dilag king, nug oɗ mettom. “Na nahipad ele, am da dahilad ele ig oh aab Ramot, Gileat wanppanu ig appa banelag gota, ig aab amu eɗut aognigte?” awa oɗ mettom. Oɗ mette, Jehosapat nug oɗeppa awa aum. “Da na ele i laippu daattep. Ihintad danab ele ag anamib aakku amunu, ig ag ele oh gota, ban hekkunig,” awa aum.

⁴ Jehosapat nug Israel dilag king amegppa anam aum, amge nug ele aum. “Amge tatam na Yawe Nug amunu aɗi attenu oɗ mette!” awa aum.

⁵ Jehosapat nug anam a, aria Ahap, Israel dilag king, nug he, propet danab, ahilag ebqak am 400, ag uɗieg, nug ag oɗ mattom. “Ig aab Ramot, Gileat wanppanu banelag gota, aab amu eɗut aognigte, o iitta da iitai gopa?” awa oɗ mattom. Nug ag anam oɗ matte, ag appig. “Na ahan ukke! Kayak Nug aab amu na eppenppa mekku,” aon appig.

⁶ Ahapnu propet ag anam appig, amge Jehosapat nug Ahap oɗ metta aum. “Ig nug oɗ mettagnignu amu, Yawenu propet laa gemu ippa ina daattetai o iittatai?” awa oɗ mettom.

⁷ Jehosapat nug Ahap anam oɗ mette, Israel dilag king Ahap nug aum. “Laippu laa ig hepput, nug Yawe oɗ metteb, aɗi ab doya, nug ab doognignu elele. Nug am Imla bekka Mikaia, amge da danab amunu nau ninig ele doottem. Aɗinu? Haen oh nug dimppa aɗi bekkunu nai dahilnu da amelppa maditte amu, keeke ena laa bekkunu ii maditte. Iitta. Nug nauib bekkunu atte,” awa aum. Ahap nug anam a, Jehosapat nug aum. “O king, na anam madikkutnu am ena iitta,” awa aum.

⁸ Aa anam awoya, Israel dilag King Ahap nug nuhig ehanittak anuqak danab laa onigppa e uɗie, amegppa aum. “Na paha gona, Imla bekka, propet Mikaia, nug omalna uɗie!” awa aum.

⁹ Haen amuppa Israel dilag king, amu Juda dilag king Jehosapat ele, king aɗit amu aa kingnu lamen elab enanag takkadya, sia king ahilahppa, Samaria aɗnu od guguittak ee aeg mumuɗaknu aben dayom amu, aa aguppa daaeheh, propet laa ag aa noolahppa daan, propet nai ahilag madippig.

¹⁰ Propet amu ag ahilag nai mattiegeg, ag oolagppan laa, Kenana bekka Sedekaia, nug doɗ qeqeɗi dottog aenppa hak awa, nug aum. “Yawe Nug inam atte. ‘Na imuppa Aram dilag daup yaaladna, yaaladna, oh yaaladna maladkkut,’ awa atte,” awa aum.

¹¹ Sedekaia nug anam a, propet laa oh ele ag anamib madippig. Ag propet nai inam King Ahap amegppa appig. “Na aab Ramot, Gileat wanppanu baneb gona, ban hena, genabnab genab aab amu na geha aokkut. Yawe Nug geha na ehanitteb, Aram eɗadkkut,” aon appig.

¹² Amu ehanittak anuqak danab Ahap he, Mikaia aokkun ukkom, amu nug Mikaia omala uɗiom, me haen aa king gumidya ii tepiɗppa danab amu nug Mikaia amegppa aum. “Antte! Propet oh ag king nug geha ban eɗidkkunu maditteb. Laa nug keeke laal ii maditte amunu, na ele kobol ag hetteb, na amubia hena, na nai ena king mette!” awa aum.

¹³ Amge Mikaia nug ehanittak anuqak danab amegppa aum. “Yawe genab bau daatte, genab amubia da dahil Kayak aɗi da amelppa atte amu, amu aakkuib da madikkulnu elele. Da keeke laanu madikkulnu elele iitta,” awa aum.

¹⁴ Mikaia nug anam a, aa king daapiɗppa teeh, King Ahap nug Mikaia oɗ mettom. “Mikaia, ig aab Ramot, Gileat wanppanu banelag gota, aab amu ele ban hekkunigte, o iitta ig iitai gomata?” awa oɗ mettom. Nug anam oɗ mette, Mikaia nug ⌊baag danab daugppa dootte, nug danab amu nug doyaya, nai genab ii maditte, Mikaia baag amuppa⌋ nob ma aum. “Ag aab Ramot, Gileat wanppanu banelag gona, ban hena, genabnab genab aab amu na geha aokkut. Yawe Nug geha na ehanitteb, Aram eɗadkkut,” awa aum.

¹⁵ Mikaia nug anam aum, amge King Ahap nug Mikaia amegppa aum. “Da hei, na Yawenu nai da amelppa akkutnu akkut amu, na Nug genab aɗi aum aakkuib akkutnu nahip nai ɠagattag qena ame. Amu da heppi, na nai amu baubau haen gane awona, na Yawenu nai genabib da amelppa madikkut?” awa aum.

¹⁶ Ahap nug anam a, aria Mikaia nug amegppa aum. “Da matu Israel dilag ban danab ag aben qaukoppa sipsip gumak danab iitta bia hamu matatun gona daaegeg anadmi. Am Yawe Nug inam a doomi. ‘Danab imu ag gumak laa iitta amunu, ag oh anen anen ag laulkadppa, maɗoɗ ele eɗun ukkeg!’ ” awa aum

¹⁷ Mikaia nai amu mattia male, Israel dilag King Ahap nug nai amu doya, nug King Jehosapat amegppa inam aum. “Da propet amu haen oh nug dimppa aɗi bekkunu nai dahilnu da amelppa maditte amu, nug keeke ena laa bekkunu ii maditte; nug nauib bekkunu atte iite ami?” awa oɗ mettom.

¹⁸ Ahap nug Jehosapat amegppa anam a amu, Mikaia nug nai amu tuɗitta nug aum. “Na daut human daappe, geha da Yawenu nai appi doye! Yawe Nug sia king nuhigppa dayeye, nuhikkud engel daup hab aabppa daatteb oh ag Nug naɗiap-ppa nanehppa ele hippaidna daaegeg anadmi.

¹⁹ Ag anam daaegeg amu, Yawe Nug engel oɗ matta inam aum. ‘Aun nug geha Israel dilag king Ahap oo eeɗeb, geha nug aab Ramot, Gileat wanppanu baneb ukka, banppa mauhkku?’ awa oɗ matta aum. Nug anam a amu, engel laala anen anen ahilag dabmak Yawe amegppa madippig. Laa nug ana male, laa nug laa aum.

²⁰ Ag anam heeg ukke, ouɗi ⌊nau⌋ laa ukka, Yawe noobppa hibaitta, nug aum. ‘Da geha ukke, Ahap oo eeɗkkul,’ awa aum. Nug anam a amu, Yawe Nug oɗ mettom. ‘Na geha gona, Ahap oo attem eeɗkkut?’ awa oɗ mettom.

²¹ Oɗ mette amu, ouɗi nug Yawe amegppa aum. ‘Da ukken, hambuppuak nai Ahapnu propet oh oɗelagppa mekkul,’ awa aum. Ouɗi amu nug anam a, Yawe Nug aum. ‘Nahip ib amuppa Ahap nug aab Ramot, Gileat wanppanu banelag aha gokku amunu, na ame bia gona he!’ awa aum.” Mikaia nug anam aum.

²² Mikaia nug anam awowa, nug tutukku Ahap amegppa aum. “Yawe Nug ouɗi nau hambubutte ele amu he, nug uɗia he, nahipad propet imu ag na amenppa nai hambubuppig. Yawe Nug na eheɗ aokkutnu mattiom daatte,” awa aum.

²³ Mikaia nug anam a, amu Kenana bekka Sedekaia nug Mikaia nai amu Ahap amegppa mattieye doya, nug aha, Mikaia gumitta ukka, hippeg mataɗa, nug aum. “Ouɗi Yawenu uɗiom amu, nug da uuiɗa, ib attem nahip-ppa ukka, nai amu na amenppa aum?” awa oɗ mettom.

²⁴ Sedekaia nug anam a, Mikaia nug nob ma aum. “Qinob, uug naunab beeb, na lag ooppa uma lokkumak daakkutnu wana daanna, na oɗmak nahipnu nob aakku dookkut,” awa aum.

²⁵ Amu oh ba male, aria King Ahap nug laa amelagppa haknunab aum. “Ag Mikaia aɗan, aon aab okkai gumak danab anuqak Amon, am da bekkal Joas ele gumatna gona,

²⁶ aa amelahppa inam appeg doyeɗ! ‘King nug inam atte. Aa danab imu aoya, maniguittakppa mewoya, bret, le ele nakokib medapeɗ dayebeb ukkeb, ban maleb, da maɗoɗ ele eɗue uɗikkul batak,’ ” awa aum.

²⁷ King nug anam a amu, Mikaia nug eɗua Ahap amegppa aum. “Na maɗoɗ ele eɗun uɗikkut dayeb amu, Yawe Nug da oɗelppa nai ii aum,” awa aum. Nug anam ana, amu nug tuɗitta aum. “Ag danab ah oh, ag dahil nai doyeg!” awa aum.

Kekeɗ ag aab Ramot, Gileat wanppanu, ag appa Ahap qeeg mauhom

²⁸ Aria, dimppa Israel dilag king Ahap, Juda dilag king Jehosapat ele, aa ahilti daup ele ag oh ahan, aab Ramot, Gileat wanppanu goppig.

²⁹ Amu ban ii digmeumppa, Israel dilag king Ahap nug Jehosapat amegppa inam aum. “Haen ig gota ban hekkunignu hetata amu, da geha kingnu lamen elab imu baolie, lamen laa mekkul. Meppi, geha kekeɗ ag da ii dooiɗmana, amge na amu, na kingnu lamen elab mekkut,” awa aum. Aakku King Ahap nug lamen laa me, aa banppa gopiɗ.

³⁰ Amu ban ii digmeeme, Aram dilag king nug nuhikkud ban daup ikki ban haknu karis gumappig ele, nug ag inam hekkulagnunab ag amelagppa aum. “Ig ban hekkunig, amge ag auntai laa, nug daup okkai, o nug daup hamu, ag ag laa amubia ele ban hekkulagnu dabmak anuqak aib dooppig. Iitta. Ag Israel dilag king Ahap, ag nugnab ele ban hekkulagnu anuqak doyeg!” awa aum.

³¹ Aram dilag king nug anam a, ban daup ikki ban haknu karis gumappig ele ag gona, ban henana, haen ag Jehosapat anidna, ag, “Umu am Israel dilag king Ahap,” dabmena, ag eɗun, nug qekkulagnu ban heegeg, Jehosapat nug huan baag okkaippa e, Yawe ehanitta he, Aram dilag daup ag nug uuidna, laih goppig.

³² Yawe ehanitte, daup dilag okkai bannu karis gumappig ele ag nug am Israel dilag king Ahap iitta doyona, ag nug tuɗidna, ii dim lamidppig.

³³ Amge ban danab ag ban henana, Aram ban danab laa nug lat pimala, lat doɗo hamu e, Israel dilagppa ukka, lat doɗo amu Israel dilag king Ahap beɗu laih bannu klos me, hauta ii auta awom, giɗo nakoknab dayom amu, lat doɗo giɗo amu awom. Aakku Ahap nug karis ulum aɗak danab amegppa aum. “Da guittak aomide amunu, paha karis aon eɗuppe, ban aben imu uuɗ goɗu!” awa aum.

³⁴ Amu Aram ban danab, Israel ban danab ele ag deɗ amu ohppa ban huan eheɗ heppig. Amu King Ahap nug deɗ amu ohppa karisppa anam ehanittakppa dayaya, nug neekke, Aram dilagppa ukke dayeye ukka, tueb me, aam noono, Ahap mauhom.