2 Stori 17 - Nobonob Baibel

Jehosapat nug Juda dilag king dayom

¹ Amu Asa nug mauhe, nug bekka Jehosapat nug king abenabppa ta, Juda dilag king dayom. Nug king dayaya, nug Israel, Juda eɗadmananu nug ban haknu kobol keeke ele, am ɠagattag daakkun ɠagattag qettom.

² Juda wanppa aab laala ag aab okkai ɠagattag aɗ ele, nug he, daup ag aab amu ohppa daaegeg, daup laa ag Juda wanppa aab laalappa ele daappig. Aria, nug mameg Asa, nug Epraim wanppa aab laala eɗatta awom amu, nug daup appa daaglagnu ele maattom.

³ Jehosapat nug king abenabppa ta dayaya, nug mameg anukkanu Dawit, nug Yawe dim lamittom bia heum amunu, Yawe Nug Jehosapat ele daapiɗ. Jehosapat nug kayak hambuppuak Bal iɗu iɗu anatta dim lamadkkunu nug ii mattiom.

⁴ Iitta. Nug amu ii heum, amge nug mameg ⌊anukkanu⌋ Dawitnu Kayak antta dim lamidkkunu Nug mattia, nug nuhig ɗo dim lamittom. Nug Israel danab heppig bia ii heum.

⁵ Yawe Jehosapat ehanitte, nug king daakkunu ɠagattag nug eppegppa dayom. Juda danab oh ag keeke nuhig daakkunu hamu aon uɗin medappig amunu, nug en okkai, binag okkai ele.

⁶ Nug Yawenu ib meu ohppa dim lamidkkunu oo heum. Ele amu, nug kayak hambuppuak dilag mettid lag nakok Juda wanppa daappig, kayak hambuppuak Aserah dabmekkulagnu biidod ele he nauhppig.

⁷ Amu Jehosapat nug king dayaya, nuhig king dayaknu maɗ ewamppa nug he, nuhikkud ehanittak anuqak danab laala ag danab ah Judanu aabaabppa daappig amu, ag Yawenu ɗo ippunadkkulagnu goppig. Danab amu heppig ele am Benhail, Obadaia, Sekaraia, Netanel, Mikaia ele.

⁸ Ag amu hekkulagnu ukkaegeg, Lewi buɗubppan mana mettak danab iitta, amu oolagppanu laala ag ele oh goppig. Amuam Semaia, Netania, Sebadaia, Asahel, Semiramot, Jehonatan, Adonaiya, Tobaiya, Tobadonaiya ele. Aria, mana mettak danab aɗit amu hepiɗ ele am Elisama, Jehoram ele.

⁹ Ag gona, Juda wanppa oinna, ag Yawenu Ɗo Nai Buk itoɗiakppa yaak niiom ele maon gona, ag aab ohppa wana, ag danab ah ippunadppig.

¹⁰ Amu Yawe Nug he, wan Juda talilidna daappig ele, amuppan danab ah ag Yawenu ɠagattagnu baɗan, ag Jehosapat, Juda ele banelag ii goppig.

¹¹ Pilistia danab laa ag ⌊maɗ maɗppa⌋ silwa, en laala ele aon, takis bia Jehosapat mettaegeg, Arebia danab ag sipsip dawai 7,700, meeme dawai 7,700 ele aon uɗin, nug medappig.

¹² Amu Jehosapat nug nuhig ɠagattag okkai meeme ukke, nug aab aɗ ɠagattag ele, keeke maatte dayaknu aab okkai ele Juda wanppa kalattom.

¹³ Nug aab amu kalatta, nug ee keeke huanak appa, Judanu aab laalappa ele meum. Jehosapat nug anam ha, nug he, ban hak danab ag ban anidna malappig amu, ag Jerusalem daappig.

¹⁴ ⌊Jehosapatnu⌋ ban danab, ag Juda danab, Benyamin danab ele. Ag amu, ahilag ebqak imuam ahilkad baelkadppa anen anen dim lamidtte. Judanu daup, ag huu anen anen ebqak 1,000 ele daappig, amu dilag okkai laa tatam am Atna. Nug daup 300,000 dilag okkai dayom.

¹⁵ Judanu laa am Jehohanan. Nug am daup 280,000 dilag okkai dayom.

¹⁶ Judanu laa am Sikri bekka Amasaia. Nug daup 200,000 dilag okkai dayom. Amasaia nug Yawe waappa dayaya Nug oɗe dim lamidkkunu, nug meu ohppa nug nukka nug Yawe eppegppa meum.

¹⁷ Benyaminnu laa am Eliada, nug am daup danab ɠagattag. Nug daup 200,000 dilag okkai dayom. Daup amu ag lat, guppiɗ ele aɗappig.

¹⁸ Benyaminnu laa am Jehosabat. Nug daup 180,000 dilag okkai dayom. Daup amu oh ag ban haknu keeke eppelagppa aɗappig.

¹⁹ Daup amu ag Jerusalem appa king waappa daan nug oɗe dim lamidppig. Daup laa amu, king nug he, ag Judanu aab okkai ɠagattag aɗ eleppa daappig.