2 Stori 16 - Nobonob Baibel

Israel dilag king Basa, nug nuhikkud daup ele ag Juda ele ban hekkulagnu Juda wanppa uɗippig

¹ Amu Asa nug Juda dilag king dayaya, nuhig king dayaknu maɗ 36ppa Israel dilag king Basa nug nuhikkud ban danab diie gona, Juda ele ban hena, ag aab Rama aona, danab ah ag Juda wanppa, Asa gumom ele, ag appa gomananu, appanu domananu Basa nug aɗ keeke, aab amuppa heum.

² Anam daaegeg, Asa nug Yawenu mettid lagnu en maknu oo anen anenppa, kingnu lag enanagnab, appanu en maknu oo anen anen eleppa silwa, gol, o men doɗo daatte amu, nug amu awa, nuhikkud ehanittak anuqak danab matte, ag aon, Aram dilag king Benhadat, Damaskus dayom, ag nug mettaglagnu Damaskus goppig.

³ Asa nug anam ha, nug pas ele Benhadatnu babaitta me ukkom. Pas amuppa yaak inam dayom. “I manenti anukka hepiɗ bia, i ele nug layam daagnihnu, i nug tituanɗa, nai qakkalopnu da ool daye, da silwa, gol ele imu nahip daakkunu ehanittak anuqak danab dahilad laa mattai, ag aon gona medatteb. Da am na Israel dilag king Basa ele aa nug tituanya nai qagapiɗ amu, na nai amu otaɗppe, nug nuhig ban danab amu oh diieb, wan dahil uun gokkulagnu ool daatte.” Nai amu nug ehanittak anuqak danab nuhikkud eppelagppa meum.

⁴ King Benhadat nug King Asa nai aum amu doya, nug amunu ena doyom. Nug ena doyom amunu, nug nuhikkud ban daup ikki amelagppa a, ag ban danab diieg gona, Israel dilag aab anen anen, amuppa ban heppig. Ag gona ban henana, Israel dilag aab Iyon, Dan, Abel Maim, amu keeke maatte dayaknu aab okkai laala Naptali wanppa daappig ele amu, ag amu oh ele eɗadna aoppig.

⁵ Amu haen King Basa nug Aram ag uɗin, Israel aab anen anenppa ban hetteb, nug amu doya, nug Rama aab eɗua babaittom amu, nug uɗat amu tuɗitta hekkunu uuom.

⁶ Aria, dimppa King Asa nug Juda danab oh dilagnu, ag Rama gokkulagnu, ag men, ad ele King Basa nug aab Rama eɗua bappaidkkunu qagmeum amu, ag mawadna gokkulagnu aum. Keeke amuppa King Asa nug aab Mispa, aab Geba ele eɗua bappalatom.

⁷ Amu haen amuppa propet danab Hanani nug Juda dilag king Asa gumitta ta, nug amegppa aum. “Na Yawe, nahip Kayak, na Nug ehanidkkunu ii dabmeme. Iitta. Na Aram ag na ehanidkkulagnu dabmeme. ⌊Aram ag nahipad kekeɗ,⌋ na ahilagppa ehanittak awaknu ii helom, na ag eɗadppe, ag na eppenppa daalob.

⁸ Kus dilag daup, Libia dilag daup ele ag huanaknab iite daappig. Ahilag daup ag bannu karis attan daan, ban heppig, daup ag hos attan daan, ban hetteb ele amu, ag ele huanak iite daappig. Ge, ag huanak daappig, amge na Yawe ehanidkkunu ootppa genab doye, Nug he, na ag eɗadme

⁹ Aɗinu? Yawe Nug aun nug Nugib dim lamidkkunu meu ohppa dabmette ele antta, nug ɠagattag medakkunu hanhan danab wanppa oitteb ele neekkadtte. Nug na ele kekeɗ eɗadkkutnu ɠagattag mettalo. Na heme am, na dabmak tutukku iittappa heme amunu, na hanhan ban anidnan daakkut,” awa aum.

¹⁰ Propet danab nug anam a, Asa doya, nug nuhignu oo nauhom. Nug oo huana nauhom amunu, nug Hanani maniguittakppa me dayom. Amu haen amuppa Asa nug eheɗ laa ele ha, nug Juda danab laala, ag nug waappa gai-iitta daappig amu, nug ag eheɗ hattom.

Asa mauhom

¹¹ Amu keeke laala oh, digmakppa ukka batakppa Asa nug heum amu, kaya amuam ag buk laappa, buk amu onig am Juda, Israel Ele Dilag Kingnu Kaya, ag buk amuppa yaappig daatte.

¹² Amu Asa nug king dayaya, nuhig king dayaknu maɗ 39ppa oɗe nau laa nug qeum. Oɗe amuam nug baegppa beum. Oɗe amuam oɗe nau, amge nug Yawe antta dim lamidkkunu Nug ii mattiom. Iitta. Dokta aakkuib ehanidkkunu dabmeum.

¹³ Amu Asa nug king dayaya, nuhig king dayaknu maɗ 41ppa amu, nug mauhom.

¹⁴ Amu Asa nug ii mauhom haenppa nug he, danab ag nuhig boumak aben menppa hoippig. Men moɗ amuam Dawitnu Aab, aab amuppa dayom. Amu Asa nug mauhe, ag nug aguppa boumna, ag spais, keeke muttuɗig enanag laala ele kuɗumnab amuppa meeg dayeye, ag aab naɗi nug binag mekkulagnu ilappig.