2 Stori 15 - Nobonob Baibel

Asa nug he, danab ag kayak hambuppuak dottolkad Juda wanppa daappig heeg nauhadppig

¹ Juda dilag daup ag eɗun, Jerusalem ukkaegeg, Kayak Ouɗi Nug Odet bekka Asaria, Nug nuhigppa uɗiom.

² Nug uɗie, Asaria nug aha ukka, Asa uɗa ta, nug amegppa aum. “Asa na, Juda danab oh, Benyamin danab ele, ag oh dahil nai doyeg! Haen ag Yawe gukkuidna daatteb, Nug ele ag gukkuatta daatte. Ag Nug anidna dim lamidkkulagnu Nug madippeg, Nug heeb, ag Nug anidkkulag, amge ag Nug uuidppeg, Nug ele ag uuadkku.

³ Haen elab Israel ag Kayak genab ele ouqak ii daappig. Mana mettak danab laa Kayaknu ippu ag ippunadkkunu ii dayom. Ag Kayaknu ɗo ii dooppig.

⁴ Ag anam henan daappig, amge uug nau bak haenppa ag eɗun Yawe, Israel dilag Kayak, ag Nug anidna dim lamidkkulagnu mattiegeg, Nug he, ag Nug anidppig.

⁵ Haen Israel ag Kayak ele ouqak ii daappig, haen amuppa Israel wanppa, wan laa Israel talilidppigppa ele, danab ah ag toettan, maɗoɗ ele ii daappig amunu, laa nug aha, laih laih gokkunu elele iitta. Iitta. Laih ukkaknu am baɗak dayom.

⁶ Amu Kayak Nug he, uug nau digdig wanppan wan laalappa beppig amunu, wan laa ag ahan, wan laa eɗadna, heeg nauhppig. Aab okkai laappan danab ag ahan, aab okkai laappan danab heeg nauhppig.

⁷ Amge Asa na, Juda danab ele, ahilagnu amu, ag ɠagattag dayeg! Ag eɗun, bittumttum aib goppig. Aɗinu? Ag ⌊Yawe tutukku dim lamidkkulag dayeb amu, ag⌋ noob ena aoglag,” awa aum.

⁸ Odet bekka Asaria, nug propet, nug Asa amegppa anam a, haen Asa nug nuhig nai doya, nug ooppa ɠagattag qetta, nug kayak hambuppuak dottolkad, Yawe Nug amunu ooppa uuaknab dootte amu, nug dottolkad amu Juda wan ohppanu, Benyamin wan ohppanu, aab laala Epraim wanppa, qauko nakok daattebppa banppa awom amu, nug appanu ele diia, he nauhppig. Nug anam ha, nug Yawenu qaɗab, Yawenu mettid lag odppa ukkaknu oo laa, veranda bia odppa daatte ele babaittom

⁹ Asa nug anam ha mala, nug he, Juda danab oh, Benyamin danab oh, amu Epraim danab, Manase danab, Simeon danab laa oh ele, danab amu ag uɗin, Juda danab oolagppa daan oippig amu, ag oh uɗin qagmeppig. Epraim danab, Manase danab, Simeon danab kuɗum amu ag Yawe, Asanu Kayak, ag Nug Asa ele daapiɗ anidna, ag uɗin, Asa waappa daappig amunu, Asa nug he, ag Juda danab, Benyamin danab ele oh qagmeppig.

¹⁰ Nug he, ag uɗin Jerusalem qagmeppig amu, amuam Asa nug king dayaya, nuhig king dayaknu maɗ 15ppa, kalam ewamppa ag aakku uɗin qagmeppig.

¹¹ Ag Jerusalem qagmena, ag makau 700, sipsip, meeme ele 7,000 ele manadna, Yawe medappig. Doɗ amu oh am Kus ele ban heppig, amuppan awak.

¹² Ag amu henana, ag Yawe, Nug ag mamelkad aɗi dilag Kayak, ag Nug anidna dim lamidkkulagnu ag meulag ohppa Nug mattiglagnu, ag Nug ele nug tituanna nai qagappig.

¹³ Amu ag ele auntai laa nug Yawe, Israel dilag Kayak, nug Nug antta dim lamidkkunu Nug ii madikku amu, ag qeppeg mauhkkunu appig. Nai amuam danabte, ahte, danab okkaite, danab hamute, nai amuam ag ohnab aakku tonattom.

¹⁴ Ag nai amu Yawe amegppa baalag okkaippa amu hekkulagnu anan, ɠagattag qettan, ag baalag okkaippa enana, ag trampet iwalna, ag doɗ qeqeɗi ele iwalppig.

¹⁵ Juda danab ah ag ahilag nai amu hekkulagnu ag meulag ohppa ɠagattag qettan appig amunu, ag oh gamalag ahom. Ag Kayak anidna dim lamidkkulagnu dabmak ɠagattag unuqagppanu heeg, Nug he, ag Nug anidppig. Anam amunu, Yawe Nug he, kekeɗ ag eheɗ laa ahilagnu ii heppig.

¹⁶ King Asa alag ah Makah, nug kuin anignu ehah aɗa dayom ele amu, Asa nug ehah amu ele otaɗom. Aɗinu? Maka nug kayak hambuppuak Aserah dabmekkulagnu biidod laa heum. Biidod amunu amu, Yawe Nug ooppa uuaknab dootte. Amu Asa nug keeke amu okkula, he maha maha ne, nug mawa ukka, le Kidronnu oolnu noakppa manom.

¹⁷ Genab, Asa nug Israel ooppa aabaabppanu mettid lag nakok oh ii loppaɗom, amge nug bau dayaya, haen amu oh nug meu ohppa Yawe dim lamidkkunu dayom.

¹⁸ Asa nug mameg nug keeke laala oh Yawenu tituana mettom amu awa, am keeke laala oh nug nukka Yawenu tituana mettom, amu oh nug akka, Kayaknu mettid lag ooppa maattom. Keeke amuam silwa, gol, am tappiɗ keeke, iɗu iɗu oh ele.

¹⁹ Amu haen amuppanu ukke ukke, Asanu king dayaknu maɗ 35 batak amu, ban laa ii beum.