2 Stori 14 - Nobonob Baibel

Asa nug Juda dilag king dayom

¹ Amu Abaiya nug mauhe, ag Dawitnu Aab appa boumppig. Nug mauhe amu, nug bekka Asa nug mameg abenabppa king ba dayom. Nug king daye ukke, maɗ eblaih laih ele ban laa Juda wanppa ii dayom; maɗoɗib daappig.

² Amu Asa nug king dayaya, nug Yawe, nuhig Kayak, nug nuhig neekkakppa kobol ena, kobol genab tutukku ele heum.

³ Nug atu laihnu kayak hambuppuak dilag qaɗab loppaɗatta, nug aabaabppanu mettid lag nakok loppaɗatta, nug men gappi he aoɗatteg, nug kayak hambuppuak Aserah dabmekkulagnu biidod ele okkulattom.

⁴ Nug Juda ag Yawe, Nug ag mamelkad aɗi dilag Kayak, ag Nug anidna dim lamidkkulagnu Nug mattiglagnu, ag nuhig ɗo oh, nuhig haknunab anak oh ele dim lamidkkulagnu haknunab ag amelagppa aum.

⁵ Amu Asa nug Juda dilag aabaab ohppa aabaabppanu mettid lag nakok, amu kalu danab ile muttuɗig enanag bette elenu qaɗab oh ele loppaɗattom. Nug anam ha, king dayeye, Juda danab ah ag maɗoɗib daappig.

⁶ Yawe he, Juda ag maɗoɗ daappig amunu, Asa nug maɗoɗ haen amuppa aab okkai ɠagattag aɗ ele kalattom. Maɗ amu ohppa ban laa ii dayom. Aɗinu? Yawe Nug he, kekeɗ ag uɗin, ban ii heeg, Juda wanppa maɗoɗ dayom.

⁷ Amu Asa nug Juda danab amelagppa inam aum. “Ig aab imu eɗut bappaladtu! Ig aɗ ahilkad, aɗnu lag attan ta ukkak menppa hak, aɗnu od, amu od manak qaknu keeke ele hetu! Ig Yawe, ihinig Kayak, ig Nug anidta dim lamidkkunignu Nug mattimut amunu, Nug he, wan imu gemu ihinig daatte. Laa uɗia ii awom. Ig Nug anidta dim lamidkkunignu Nug mattiut, Nug he, ig maɗoɗib daattem. Kekeɗ laa attemtai laa ii hette,” awa aum. Anam amunu, ag aab am eɗun bappaladna, ena daappig.

⁸ Amu Asanu daup Judanu, ahilag ebqak am 300,000. Daup amu ag guppiɗ okkai, ban ele aɗualadppig. Aria, nuhikkud daup Benyaminnu ebqak am 280,000. Daup amu ag guppiɗ naunau aɗualadna, ag lat aɗualadppig. Danab amu oh ag ban hekkulagnu oolagppa ɠagattag dooppig.

⁹ Amu Kus danab onig Sera nug daup nuhikkud huanaknab, 1,000,000 aakku, ag Juda ele ban hekkulagnu uɗippig. Sera nug ban haknu karis 300 ele, amu nug ban haknu karis amu, daup amu oh ele ag uɗin, Juda wanppa aab onig Maresa beppig.

¹⁰ Ag uɗieg, Asa nug nuhikkud daup ele ag ahan gona, Sera, nuhikkud daup ele uɗalag tekkulagnu goppig. Ag gona Maresa guguittak teeg, oolnu noak onig Sepata, ag appa ban hekkulagnu bappaidppig.

¹¹ Ag bappaidna, Asa nug Yawe, nuhig Kayak, nug Nug unuqitta aum. “O Yawe, laa na bia laa iitta. Na laa ag gai-iitta daatteb ehanadppe, ag laa ɠagattag daatteb eɗadkkulagnu elele. O Yawe, ihinig Kayak, ig nahipnu dabmettata, na oninppa daup huanaknab imu ele ban hekkunignu uɗimut daattem amunu, na ig ehanigppe, ig daup imu eɗadkkunignu oɗ medattem. O Yawe, na ihinig Kayak daattem, na uuigppe, daup imu eɗigppeg, danab ah laa ag daup imu na eɗidppig amananu na unuqidttem,” awa unuqittom.

¹² Asa nug anam unuqitte, Yawe ehanatta he, Asa, nuhikkud daup ele ag Kus daup eɗattegeg, Kus danab amu ag aakku oolppig.

¹³ Kus dilag daup ag oolegeg, Asa, nuhikkud daup ele ag lamadna gona gona, Gerar batappig. Ag ban hena, lamadnana, ag Kus dilag daup huanaknab aqappig. Ag anam huanaknab aqaeg, Kus dilag daup ag eɗun ahan, baula ban hekkulagnu elele iitta. Aɗinu? Yawe Nug he, Kus ag Nug eppegppa, nuhikkud daup eppelagppa ele aakku nauhna autna autnanab aoppig. Yawe Nug anam he, Juda ag Kus dilag daupnu keeke huanak aoppig.

¹⁴ Amu Gerar danab ah, aab naunau, aab okkai amu talilidna daappig ele, danab ah appanu ele ag ⌊Kus ehanadppig amu,⌋ ag Yawe Nug Juda ehanatta he, Juda ag Kus daup dilagppa attem heppig doon, ag baɗak eheɗ nau Yawenu doon, ban hekkulagnu elele iitta amunu, Juda ag aab amu oh eɗadna heeg nauhppig. Nauheg, en kuɗumnab amuppa dayom amunu, ag en amu ele aoppig.

¹⁵ Juda ag anam hena, ag ⌊Pilistia lailkad⌋ laala appa sipsip, meeme, kamel ele gumadppig amu, ag appa banelag gona, ag ele ban hena, ahilkad doɗ kuɗumnab ag akkan, ag eɗun, Jerusalem goppig.