2 Stori 13 - Nobonob Baibel

Abaiya nug Juda dilag king dayom

¹ Amu Jeroboam nug Israel dilag king dayaya, nuhig king dayaknu maɗ 18ppa Abaiya nug Juda dilag king ba dayom.

² Abaiya nug king ba, nug maɗ ewam Jerusalem appa king dayom. Nug anig am Mikaiah. Mikaiah am Gibea ted Uriel aɗeg. Amu Abaiya nug king dayeye, Juda, Israel ele aa ban hepiɗ.

³ Amu Abaiya, nuhikkud daup ele ban heppig amu, daup nuhikkud, ahilag ebqak am 400,000. Jeroboam nuhikkud daup ele ban heppig amu, daup nuhikkud, ahilag ebqak am 800,000. Abaiya, Jeroboam ele, ahilti daup amu oh ag am ban haknu elelenab daappig.

⁴ Amu Abaiya nug qauko Semaraim, qauko amuam Epraim wanppa, qauko qauko daattebppa amu, nug qauko amuppa hibaitta dayaya, nug ewa aum. “Jeroboam, amu ag Israel dilag daup ag nug ele daatteb amu, ag oh dahil nai doyeg!

⁵ Ag Yawe, Israel dilag Kayak, Nug Dawit, amu nug buɗub ele ag hanhan Israel dilag king daaglagnu Nug ha, Nug ag ele ag nug tituana nai qakkak tuqa awak laa iitta ele heppig amu, ag amu iite dootteb?

⁶ Yawe Nug anam heum, amge Nebat bekka Jeroboam, nug Dawit bekka Solomonnu ehanittak anuqak danab amu, nug Solomon waappa daakkunu uua, nug oɗe tappe neum.

⁷ Jeroboam nug anam he, dimppa danab nau ag nug ɠagattag mettanna, ag nug ele hena, Solomon bekka Rehoboam nug danabnab ii daya, nug king abenabppa ta, king dayom, amge nug king haen elab dayayate, nug king daakkunu dabmak elele aolo, amge anam iitta, haen nug bau king beum, haen amuppa Jeroboam nug laikkud ele ag uɗin, nug aɗi aɗi hekkunu nug amegppa aeg, nug ahilag nai qeeb nekkunu ɠagattag elele iitta.

⁸ Anam amu, gemu ag Yawenu wan, Dawit buɗub gumatte ele, ag wan amu ele ban hekkulagnu dabmetteb. Am genab, ag daup huanak daatteb, amu ag makau gaiɗ dottolah golppa hak, Jeroboam ahilag kayak daaglahnu heum ele amu, ag amu ele.

⁹ Ag amu ele, amge ag heeg, Yawenu mana mettak danab, Aron buɗub ag, amu Lewi buɗubppan mana mettak danab iitta, ag ele ahilag wan uun, Juda wanppa iite gona daatteb? Mana mettak danab, amu Lewi buɗubppan mana mettak danab iitta, ag gona Juda wanppa daaeg, ag Israel, Jeroboam dim lamidtteb ele, ag wan laalappan danab hetteb bia ag ahilag danab hamu laala tituanatteg, ahilkad mana mettak danab iite daatteb? Ge, auntai laa nug nukka, nug kayak hambuppuaknu mana mettak danab daakkunu nug nukka nug beɗu tituana, nug aha, makau gaiɗ laippu, sipsip dawai eblaih aɗit ele kayak hambuppuak amu medakkunu awa uɗie, ag heeg, nug mana mettak danab daatte.

¹⁰ Ihinignu amu, Yawe Nug ihinig Kayak daatte. Ig Nug ii uumut. Mana mettak danab ag Nug waappa daanna, Nug oɗe dim lamidtteb amu, ag am Aron buɗub. Ag Aron buɗub daaeg, Lewi buɗubppan mana mettak danab iitta, ag ag ehanadtteb.

¹¹ Ag deɗ oh hanhan buttua, tueb ele manaknu ofa hena, Yawe mettan, ag kalu danab ile muttuɗig enanag bette ele amotna, Nug medatteb. Ag hanhan bret balal Yawe noobppa oppiaawak daatteppa meeg, ag lam, lam maattaknu balal golppa hak attan daatteb ele hanhan tueb amotadtteb. Aɗinu ig anam hettem? Ig Yawe, ihinig Kayak, Nug attem attem hekkunignu aum amu, ig hettem, amge ag Yawe ii dim lamidtteb. Ag Nug uuppig.

¹² Kayak Nug ig ele daattem. Nug ihinig okkai daatte. Nuhig mana mettak danab ag ig ban hekkunignu trampet iwalppeg, ig amuppa ban haknu ewak doot, ban hekkunig. O Israel dilag daup, ag Yawe, Nug ag mamelkad aɗi dilag Kayak, ag Nug ele aib ban heppig. Aɗinu? Ag amu hekkulag dayeb amu, ag Nug ii eɗidmana,” awa aum.

¹³ Abaiya nug anam awa eum, amge Jeroboam nug matu he, nuhig daup laa ag Juda daappigppa taliliadna wana, ag Juda dimulagppa ban hekkulagnu lokkumna uɗiegeg, Jeroboam nuhig daup laa ag Juda noolagppa daappig.

¹⁴ Jeroboam aɗi ag anam heeg, Juda ag eɗun, daup ag dimulagppa ban hekkulagnu uɗiegeg anadna, Jeroboam aɗi ag noolagppa ban hekkulagnu ele uɗieg anadna, ag Yawe ɠagattag unuqitteg, mana mettak danab ag trampet iwalppig,

¹⁵ Juda danab ag ban haknu ewak eppig. Ag anam eeg, Kayak Nug Abaiya, Juda ele ehanatta he, ag Jeroboam, Israel dilag daup nuhikkud ele eɗatteg oolppig.

¹⁶ Ag ooleg, Juda lamattegeg, Kayak Nug Israel dilag daup Juda dilag daup eppelagppa meum.

¹⁷ Abaiya nuhikkud daup ele ag Israel dilag daup huanaknab aqappig. Ag Israel dilag daup 500,000 aqaeg mauhppig. Daup mauhppig ele amu, ag am ban haknu elelenab daappig.

¹⁸ Yawe Nug Juda ehanatte, ag heeg, Israel aakku gai-iitta daappig. Juda danab ag Israel eɗadppignu diig am, ag Yawe, ag mamelkad aɗi dilag Kayak, ag nuhignu oolagppa genab dooppig amunu, Nug ehanatte, ag Israel eɗadppig.

¹⁹ Abaiya nug nuhikkud daup ele ag Jeroboam nuhikkud daup ele lamadna, tuɗidna ban henana, ag aab Betel, Jesana, Epron ele, amu aab naunau aab okkai amu talilidna daatteb ele Jeroboam eppegppanu aoeg, Abaiyanu daappig.

²⁰ Amu Abaiya nug Juda dilag king dayeye, Jeroboam nug eɗua, king ɠagattag ii dayom. Anam daye ukke, Yawe he, Jeroboam nug mauhom.

²¹ Jeroboam nug anam gai-iitta daye, Yawe he, nug mauhom, amge Abaiya nug king ɠagattagnab ba dayom. Abaiya nug ah 14 diiom, nug bekkod danab am 22, nug aɗekkud am 16.

²² Abaiya nug king dayom, haen amu ohppa nug aɗi aɗi keeke laala heum, mattiom ele amu, propet Ido nug buk laa onig, Kingnu Kaya, yom amu, keeke amu ohnu kaya buk amuppa daatte.