2 Stori 12 - Nobonob Baibel

Isip dilag king Sisak nug, nuhikkud daup ele ag Juda wan aoglagnu uɗippig

¹ Amu Rehoboam nug Juda dilag king ba daye ukke, haen king daakkunu ɠagattag nug eppegppa dayeye, laa nug abenab aokkunu ii heehe, Rehoboam nug ɠagattag dayaya, nug Juda danab ah oh ele ag Yawenu ɗo dim lamidkkulagnu uun, Yawe ii dim lamidppig.

² Ag Yawe ippunattomnu oo metta ii uuak kobol ii dim lamidppig amunu, Isip dilag king Sisak, nug Rehoboam king abenab awe, maɗ waɗele ukke, Rehoboam nug nuhig king dayaknu maɗ tanig eleppa, Sisak nug nuhikkud ban danab ele ag Jerusalem banelag uɗippig.

³ Isip dilag king Sisak nug bannu karis 1,200 ele, daup hosppa ban heppig ele 60,000, amu ban danab baelagppa oippig huanaknab ele. Daup amu ag Isip danab, aria, Libia danab, Suki danab am Kus danab ele.

⁴ Sisak, nuhikkud daup amu ele ag Juda dilag aab okkai ɠagattag aɗ ele ohnab eɗadna aon, ag Jerusalem aoglagnu teppig.

⁵ Sisak aɗi ag anam heegeg, Juda dilag ikki danab ag Sisaknu baɗan, Jerusalem ukkaeg, ag Rehoboam ele ag appa daaegeg, propet Semaia nug ag gumatta wana, ag amelagppa aum. “Yawe Nug inam atte. ‘Ag da dimeɗan, dim ii lamiɗtteb amunu, da ag dimatten, Sisak eppegppa iikku maadttem,’ awa atte.” Semaia nug anam aum.

⁶ Semaia nug Yawe oɗe anam ag amelagppa a, King Rehoboam, Juda dilag ikki danab ele ag akka ag onilag qeeg ne, ag, “Yawe Nug hette imu amu, Nug genab nai doya mala hettoɗia epeɗia elele mettak kobol dim lamitta hette,” aon appig.

⁷ Ag anam heeg, Yawe Nug akka ag onilag qeeg neum antta, Yawe Nug nuhig nai Semaia mettom. Nai nug mettom am inam. “Juda dilag ikki danab, Rehoboam ele ag akka ag onilag qeeg neum amunu, da heppi, Jerusalem ag padal mena autna ii aomna. Iitta. Da ehanadppi, ag daaglag. Da bu eheɗ nau Sisak eppegppa Jerusalem danab ah ii madapa.

⁸ Anam, amge Sisak nug ahilag okkai daakku, amu amuppa ag da waalppa dayaknu kobol, wan laappan king waappa dayaknu kobol ele anidna, epeɗin dooglag,” awa aum.

⁹ Amu haen Sisak aɗi ag ban hena, Jerusalem eɗidna, ooppa nona, Isip dilag king, Sisak, nug Yawenu mettid lagnu en oh awa, am kingnu lag enanagnab, appanu en oh ele awa, keeke ena amu oh akka, Solomon bannu guppiɗ hatta golppa tonattom, amu oh ele akka, keeke amu oh nug akka, Isip ukkom.

¹⁰ Sisak nug guppiɗ amu awa ukkom amunu, King Rehoboam nug guppiɗ amubia, amge brasppa hak heum. Nug anam ha, Rehoboam nug daup ag king laug enanagnab odppa daan, gumak uɗat heppig dilag ikki ag guppiɗ amu dabmettaglagnu ɗo meum.

¹¹ Haen laala king nug Yawenu mettid lakka ugekke amu, aria gumak danab amu ag guppiɗ amu maoegeg, nug ele oh goppig. Aria, king nug eɗua laugppa ugekke amu, ag guppiɗ amu eɗun akkan gona, gumak danab laulag ooppa maadppig.

¹² Rehoboam nug nukka nug onig qe ne, Yawe dim lamittom amunu, Yawe Nug bu eheɗ nau ii metta he, Sisak nug he, padal ma auta autanab ii awom. Amu Juda wanppa ag ena daappig.

Rehoboam nug Juda dilag king dayomnu nai tutu

¹³ Keeke amu oh ba ukke, King Rehoboam nug king ɠagattag daakkunu, nug ɠagattag amu awa, eppegppa ɠagattag aɗa daya, king dayom. Nug maɗ 41 dayaya, nug king ba dayom. Nug king ba, nug maɗ 17 Jerusalem appa king dayom. Yawe Nug Israel dilag huu okkai oh oolagppa Jerusalem appa, Nug onig aguppa meeb daakkunu tituanom. Rehoboam anig am Amon wanppanu ah onig Namah.

¹⁴ Amge Rehoboam nug meu ohppa Yawe antta dim lamidkkunu Nug ii mattiom amunu, nug eheɗ heum.

¹⁵ Amu Rehoboam nug king dayaya, digmakppan ukke batakppa ele aɗi aɗi heum amu, kaya amuam buk laa propet Semaia yom, buk laa propet Ido yom amu, kaya amu buk aɗit amuppa daatte. Buk aɗit amuppa amu aa king anilkad, mamelkad, dokkialkad, memetalkad uma ukkak ele, nai aakku yaapiɗ. Amu Rehoboam nug king dayeye, Juda, Israel ele ag hanhan ban hedappig.

¹⁶ Dimppa Rehoboam nug mauhe amu, ag Dawitnu Aab, appa nug mamekkud aɗi boumadppigppa boumppig. Rehoboam mauhe, nug bekka Abaiya nug mameg abenabppa king ba dayom.