2 Stori 11 - Nobonob Baibel

Propet Semaia nug Rehoboam nau aomanu dabmettak nai mettom

¹ Rehoboam nug oola ukka, Jerusalem tewowa, nug Juda dilag ban danab, am Benyamin dilag ban danab ele oh onilagppa e, ag uɗin qagmeppig. Ban danab nug diiom amu, ahilag ebqak am 180,000. Nug ukka, Israel ahilagppa ban ha heeb, ag eɗun nug waappa daaglagnu heum.

² Rehoboam nug anam heum, amge Yawe Nug propet Semaia, nug Kayaknu danab, Nug nug nai mettom. Nai nug mettom am inam.

³ “Na gona, Solomon bekka, Juda dilag king Rehoboam, na nug amegppa, amu Israel danab ah oh ag Juda wanppa, amu Benyamin wanppa ele daatteb amu, na ag oh amelagppa nai inam appe doyeg!

⁴ ‘Yawe Nug inam atte. “Ag gona, Israel ele ban aib heppig. Ag oh tiig laippu amunu, ag anam ii hemana. Iitta. Ag oh eɗun appalagppa ukkeg! Aɗinu? Da dakka ai, Israel ag oppatna, ag uuadna, laa daatteb,” ’ ” awa aum. Semaia nug Yawenu nai amu doya, Rehoboam, danab nug ele daappig oh ele amelagppa anam aum amunu, ag Yawenu nai amu dim lamidna, ag wana, Jeroboam ele ban hekkulagnu ii goppig.

Rehoboam nug he, Juda wanppanu aab laala ban haknu ɠagattag dayaknu bappaidppig

⁵ Rehoboam nug Jerusalem appa dayaya, nug Juda wan gumom. Nug anam daya, nug Juda wan ɠagattag daakkunu aab laalanu aɗ keeke ɠagattag elele daakkunu tuɗitta heum. Aab nug anamppa heum am inam:

⁶ Betlehem, Etam, Tekoa,

⁷ Betsur, Soko, Adulam,

⁸ Gat, Maresa, Sip,

⁹ Adoraim, Lakis, Aseka,

¹⁰ Sora, Aiyalon, Hebron ele. Aab amu Juda wanppa, Benyamin wanppa ele aab okkai ɠagattag aɗ ele daappig.

¹¹ Rehoboam nug aɗ keeke daappig ɠagattagnab daaglagnu ha, nug ele aab anen anenppa daup dilag okkai ag aguppa daaglagnu maattowa, nug ee, olip goɗen, wain ele aab anen anenppa meum.

¹² Nug guppiɗ, ban ele aab okkai amu anen anenppa meum. Nug aab amu oh ag ban haknu ɠagattagnab daaglagnu he heeg, aab amu ag ban haknu ɠagattagnab daappig. Amu Rehoboam aakku Juda danab ah, Benyamin danab ah ele dilag king tuɗitta dayom.

¹³ Israel danab ag oppatna, wan aɗitppa daaegeg, Lewi buɗub, amuam Lewi buɗubppan mana mettak danab, Lewi buɗubppan mana mettak danab iitta ele, ag Israel dilag huu okkai laa oh oolagppa daanna, ag Jeroboam waappa daaglagnu uun, Rehoboam ɠagattag qedappig.

¹⁴ Jeroboam, nug bekkod ele ag Lewi buɗub Yawenu mana mettak danab daaglagnu geɗattom amunu, Lewi buɗub ag ahilag lag, ahilag gikkiɗah dad ele uun uɗin, Juda wanppa uɗin, Juda wanppa, Jerusalem aabppa ele daappig amunu, ag Rehoboam ɠagattag qedappig.

¹⁵ Jeroboam nug danab laa ag mana mettak danab daaglagnu tituanattom. Israel ooppa kayak hambuppuak dilag mettid lag nakok daappig, aben laalappa nug makau gaiɗ dottog, meeme dottog ele qappalattom amu, amuppa ag mana mettak uɗat hekkulagnu maattom.

¹⁶ Jeroboam nug anam heum, amge Israel danab laala, Israel dilag huu okkai ohppanu, ag nug waappa daappig, amge ag Yawe, Israel dilag Kayak, ag Nug mattin anidna dim lamidkkulagnu oolag heum amunu, ag Lewi buɗub dim lamadna, Jerusalem appa doɗ manadna, Yawe, Nug ag mamelkad aɗi dilag Kayak, ag Nug mettaglagnu goppig.

¹⁷ Ag wana, Juda wanppa daaeg ukke, ag maɗ ewam anam daanna, ag Solomon bekka Rehoboam ehanidnana, Juda wan ɠagattag medappig. Aɗinu? Ag Dawit, Solomon ele dilah kobol dim lamidppig.

Rehoboam baekkudppa

¹⁸ Rehoboam wau am Mahalat. Mahalat mameg am Dawit bekka Jerimot. Mahalat anig am Abihail. Abihail nug am Jesi bekka Eliap aɗeg.

¹⁹ Rehoboam, Mahalat ele aa nid danab ewam ele; Jeus, Semaria, Saham ele.

²⁰ Amu dimppa amu, Rehoboam nug Apsalom aɗeg Makah awom. Nug awe, aa nid danab waɗele menuadpiɗ: Abaiya, Atai, Sisa am Selomit.

²¹ Rehoboam nug wauud 18 ele, amu ah laa nug wauud amge wauudnab iitta, am 60. Amu Rehoboam nug ah amu oh dilag oo mauhom, amge nug Apsalom aɗeg Makahnu oo huana mauhom. Amu Rehoboam nug bekkod 28, aɗekkud am 60.

²² Rehoboam nug Makahnu oo huana mauhe, nug Abaiya, nid ahilah amu, nug nid amu nid oh oolagppa anuqak daakkunu tituanom. Aɗinu, Rehoboam nug mauheb, nid amu nug king daakkunu dabmeum.

²³ Nug Abaiya king daakkunu dabma, nug doyak dabmak ena ele dim lamitta he, bekkod laala ag Juda wanppa, Benyamin wanppa ele, obatak anen anenppa, aab okkai ɠagattag aɗ ele daappigppa ele daappig. Nug ag dayaknu keeke elelenab matta, ah kuɗum ag waalkad daaglagnu ele diiom.