2 Stori 10 - Nobonob Baibel

Israel danab ag Solomon bekka Rehoboam waappa daaglagnu uun, nai nuhig tappaeg neum

¹ Israel danab ah oh ag gona, Sekem appa ag Rehoboam aon, ahilag king mekkulagnu goppig amunu, Rehoboam nug ele appa ukkom.

² Amu anukka Nebat bekka Jeroboam nug King Solomon, ⌊nug nuhigppa eheɗ ha,⌋ nug Solomon baɗitta, oola Isip ukka dayaya, nug Israel wanppa aɗi beum, nug nai amu doya, nug Isipnu aha, eɗua uɗiom.

³ Nug Isipnu uɗiom amunu, Israel danab ag Jeroboam onigppa eeg do, nug Israel oh ele ag Rehoboam gumidna gona, amegppa inam appig.

⁴ “Na mamen Solomon nug, nug ig uɗatnu uug okkai, ɠagattagnab mekkom. Anam amunu, gemu na ihinignu bodoettak hena, ihinig uug heppe, nakok iitta mekkunu oɗ medattem. Na anam heppe amu, ig geha na waatppa daat, nahip maɗi nid daagnig,” aon appig.

⁵ Ag anam aeg amu, King Rehoboam nug ag amelagppa aum. “Deɗ ewam uueb ag eɗun, da gumiɗna uɗippeg, da oɗmak amunu nob ag amelagppa appi dooglag,” awa aum. Nug anam a amu, ag eɗun goppig.

⁶ Ag ukkaeg amu, King Rehoboam nug ikki danab laala, danab amu ag anukka nug mameg Solomon dabmak ena medattappig ele, nug ag onilagppa e doeg, nug nai amunu oɗ matta, inam aum. “Israel danab ag da mamel heum bia ii hepanu atteb, amu ag attem dabmetteb? Da nai amu attem amelagppa nob mein, aɗi akkul?” awa aum.

⁷ Aria, nug anam oɗ matte amu, ag nug amegppa inam appig. “Amu na danab ah amu dilagnu oo bodoettak doon, ag na aɗi hekkutnu oolag daatte ele dabmettan, na amunu nai ena ag amelagppa akkut amu, ag geha nahipad maɗi nid daanna, na waatppa hanhan daaglag,” aon appig.

⁸ Danab kaino ag anam appig, amge Rehoboam nug ahilag ulum nai dookkunu uua, nug nid bau, ag nug ele oh laippu ena meppig, gemu ag nug waappa daan, nuhig maɗi nid daappig ele amu, nug ag onilagppa e doeg, nug ag ulum mettaglagnu anana,

⁹ nug inam ag oɗ matta aum. “Ag ahilag ulum nai am attem? Ig danab imu ag da amelppa, ‘Na mamen bia uug okkai ii mekkamnanu oɗ medattem,’ appig ele amu, ig nai amunu nob ag amelagppa attem akkunig?” awa oɗ mattom.

¹⁰ Nug anam a amu, nid bau, ag nug ele oh laippu ena meppig ele amu, ag nug amegppa appig. “Na danab ah amu, ag na amenppa, ‘Na mamen nug ig uɗatnu uug okkai, ɠagattagnab mekke hemut amu, na uug amu heppe, nakok iitta mekkunu oonig daatte,’ appig, na amu dilag oɗmak amu nob mena, na ag amelagppa inam appe doyeg! ‘Da eppel doɗo nakoknab imuam da mamelnu ɠagattag oh eɗidtte.

¹¹ Genab, da mamel nug ag uɗatnu uug okkai, ɠagattagnab mattom, amge da amu, geha da ag amu eɗittak, okkainab madakkul. Da mamel nug ag bu qaun eleppa mataɗattom, amge da amu geha bu laa noobppa aeg ele awe, ag huan mataɗadkkul.’ Na anam appe doyeg!” aon appig.

¹² Aria, ag anam aeg, King Rehoboam nug Jeroboam aɗi amelagppa matu aum bia deɗ ewam ukke, Jeroboam, amu Israel danab ah ele ag eɗun Rehoboam gumidna goppig.

¹³ Ag ukkaeg, King Rehoboam nug baag ɠagattagppa ag amelagppa nai mattiom. Nug danab kaino dilag ulum nai dab-ii-maama,

¹⁴ nug nid bau dilag ulum nai dim lamitta, nug ag amelagppa inam aum. “Am genab, da mamel nug ag uɗatnu uug okkai, ɠagattagnab mattom, amge da amu, geha da ag amu eɗittak, okkainab madakkul. Da mamel nug ag bu qaun eleppa mataɗattom, amge da amu muɗi qaun ele noob aeg eleppa ag mataɗadkkul,” awa aum.

¹⁵ King Rehoboam nug anam aum amunu, nug danab ah, ahilag oo hak, ag amunu nug amegppa appig amu, nug ahilag nai amu ii dabmeum; dim ii lamittom. Amu beumnu diig am, Kayak Nug nukka he, King Rehoboam nug danab ah appig amu oɗelag dim ii lamittom. Aɗinu? Yawe Nug Nebat bekka Jeroboam amegppa nai aum, nai amu heeb, meu bekkunu heum. Anukka Yawe Nug Silonu propet Ahaiya amegppa Jeroboamnu a, Ahaiya ukka Jeroboam amegppa aum.

¹⁶ Aria, Rehoboam nug anam a, Israel danab ah oh, ⌊amuam Israel dilag huu okkai laa oh, Juda, Benyamin aakkuib iitta⌋, ag aakku dooppig, king bau amu nug nai ahilag dookkunu uuom. Ag anam dooppig amunu, ag king amegppa inam appig. “Ig Israel laa oh, ig Dawit ele laippu iitta. Ao, ig Jesi bekka Dawit, ig nug buɗub iitta. Anam amunu, ig Israel danab, ig oh eɗut, aabppa gotu. Ao, Dawit bekkod, ag akka nug gumanna dayeg!” Israel ag anam aon anana, ag oh qatin, appalagppa ukkadppig.

¹⁷ Israel laa oh ag laulkadppa goppig, amge Israel buɗub Juda wanppa daappig amu, Rehoboam ag gumattom.

¹⁸ Aria, amu nakok dimppa King Rehoboam nug ⌊Sekem appa tuɗitta dayaya, nug⌋ he, Adoniram, nug danab ag ɗo waappa kingnu uɗat haknuib daappig ele gumattom, nug Israel huu ⌊ag eɗun laulkadppa goppig amu,⌋ nug ag gumatta ukkom. Ukkom, amge haen Adoniram nug ukka, ag gumatta te, Israel ag oh ahan, men ena, menppa makkuɗeg mauhom. Ag anam heeg, King Rehoboam nug Israel Adoniram menppa makkuɗeg mauhom doya, nug baɗa, pahanab aha, ban haknu karis attan ta, oola, Jerusalem ukkom.

¹⁹ Amu haen amuppa digma uɗie, gemu ⌊nai imu yaak haenppa⌋ batak, Israel danab laih, Juda wanppanu yawalti uɗitteppanu, appa ana daatteb, ag Dawit buɗubppanu laa waappa daaglagnu uun, king amunu nai tappaeg nette.