2 Stori 1 - Nobonob Baibel

Yawe he, Solomon nug doyak dabmak ena okkai elenab ele dayom

¹ Amu Dawit bekka Solomon nug king ba daya, nug laa nug king abenabppanu lamidmanu ha, ɠagattag okkai awa, nug aakku king ɠagattag dayom. Aɗinu? Yawe, Solomonnu Kayak, Nug Solomon ele daayya he, Solomon nug onig okkai, ɠagattag okkai ele dayom.

² Amu Solomon nug Israel dilag ban daup 1,000 dilag ikkilkad, ban daup 100 dilag ikkilkad, epeɗiak danab, Israel dilag ikki danab laa, amu Israelnu baelkadppan ikki danab ele, ⌊danab amu ag Israel oolagppanu Israel danab oh oulag daappig amu,⌋ nug ag oh onilagppa e uɗieg, nug ag amelagppa a,

³ Solomon nug danab qagmeppig ele oh ag ahan, aabppanu mettid lag nakok Gibeon appa daatte, ag appa goppig. Ag appa goppignu diig am, Kayaknu mettid haknu peh lag danab ah appa qagmetteb ele, peh lag amu appa dayom. Yawenu maɗi nid Moses nug atu taɗakppa lag amu babaittom.

⁴ Anukka Dawit nug Kayaknu Tituanak Nainu Kunup Jerusalem appa meeb daakkunu peh lag aguppa taiettom amunu, nug aha, Tituanak Nainu Kunup amu Kiriat Jearimnu awa uɗie, aben nug babaittom amuppa meum.

⁵ Kayaknu Tituanak Nainu Kunup Jerusalem dayom, amge qaɗab brasppa hak am Gibeon appa, mettid haknu peh lag odppa dayom. Uri bekka Besalel, Hur alag amu, nug qaɗab am heum. Amu Solomon aɗi ag appa gona, appa ag Yawe ulum madakkunu unuqidppig.

⁶ Amu Solomon nug qaɗab brasppa hak, qaɗab amuam mettid haknu peh lag danab ah appa qagmetteb ele, am lag amu odppa dayom amu, nug qaɗab amu guguitta ukka, appa Yawe noobppa dayaya, nug qaɗab amuppa nug manaknu ofa hattatta, doɗ 1,000 manatta, Yawe mettom.

⁷ Solomon nug anam he, tuqan amuppa Kayak Nug Solomon gumitta noa, amegppa aum. “Na aɗi keeke da medakkulnu oot hette amu, na appe doyei!” awa aum.

⁸ Kayak Nug Solomon amegppa anam a, Solomon nug nob ma aum. “Na oo mauhaknab kobol okkainab da mamel Dawitnu doon dim lamidna, na da nug ou king daakkulnu nuhig abenppa meiɗme.

⁹ Na hee, da Israel danab ah, ahilag ebqak am huanak, wan gappudnu ebqak bia, da ahilag king daattem amunu, O Yawe Kayak, gemu na keeke hekkutnu da mamel Dawit amegppa nai anan qakkame amu, na aakku heppe meu okkunu oɗ medattem.

¹⁰ Anam amu, keeke na meɗakkutnu ool daatte am, na heppe, da danab imu ena, elele gumadkkulnu doyak dabmak ena ele, doyak ele meɗakkutnu oɗ medattem. Aɗinu? Auntai nug nukka, nuhig doyakppa danab ah huanak imu ena, elele gumadkkunu elele?” awa aum.

¹¹ Solomon nug anam Kayak amegppa a, Kayak Nug aum. “Na en okkainu, binan okkainu, nahip kekeɗ eɗadppe iitta mekkulagnu ele oɗ ii meɗame. Laa amu na bau dayak elabnu ele oɗ ii meɗame. Iitta! Na danab ah imu, da hei, na ahilag king daattem amu, na ag ena, elele gumadkkutnu doyak dabmak ena ele, doyak elenu oɗ meɗame. Amuam nahip oo hak naɗi.

¹² Na oot anam daatte amunu, da doyak dabmak ena ele, doyak ele medakkul. Amge da amuib ii medapa. Iitta. Da en okkai, binan okkai ele medakkul. King laa anukkanu uɗie, gemu batak am en okkai, binag okkai ele amubia am laa iitta. Butti aɗi ele laa amubia ii daama,” awa aum.

¹³ Amu dimppa Solomon nug Gibeonnu eɗua, Jerusalem ukkom. Gibeon appa amu mettid haknu peh lag danab ah appa qagmetteb ele, mettid haknu abenppa dayom amu, Solomon nug mettid haknu peh lag amu odppanu eɗua, Jerusalem ukkom. Nug Jerusalem ukka, nug Israel danab ah gumadttom.

¹⁴ Amu Solomon nug hos, bannu karis ele diiom. Nug bannu karis 1,400 diia, nug hos 12,000 ele diiom. Nug hos, karis ele diia amu, nug aab okkai laala hos, karis ele daaglagnu aben babaittak daappig ele, nug laa appa maatta, laala nug Jerusalem maattom.

¹⁵ Solomon nug king dayom, haen amuppa amu nug silwa, gol, ad sida ele huanak awa, Jerusalem uɗiom. Amunu haen amuppa silwa, gol ele am men bia, ambak Jerusalem appa daaeheh, amu ad sida gikkiak ele huanak, ambak; Israel wan qauko nakok qauko okkai diigppa daatteb, appa ad sikamo fig huanak daatteb, amubia Jerusalem appa ad sida gikkiak ele huanak dayom.

¹⁶ Hos Solomon diiom ele amu, nug Isipnu, Kuenu ele diiom. Kue appanu King Solomonnu keeke laihnu awa dadennu mak danab ag hos men doɗo ganeppa awaknu ɗo dayom bia, ag hos daden amuppa aodppig.

¹⁷ Solomonnu keeke laihnu awa dadennu mak danab ag bannu karis Isipnu aoppig amu, ag karis mameg 7 kilogram silwa mettana, ag karis laippu aoppig. Hosnu am ag 1.7 kilogram silwa hos mameg mettan, hos aoppig. Ag hos, bannu karis ele amu aona, ag Hit dilag king, Aram dilag king ele ippuanatteg, ag Israel dilagppa aoppig.