2 Samuel 8 - Nobonob Baibel

Dawit nug kekeɗ kuɗum eɗattom

¹ Amu Dawit nug king ba dayaya, nug Pilistia dilag daup eɗatta he, Pilistia ag ban hekkulagnu elele iitta daappig. Nug anam ha, nug aab onig Meteg Amma Pilistia eppelagppanu awe, Israel dilag dayom.

² Am Dawit nug Moap dilag daup ele ban ha eɗattom. Nug eɗatta he, Moap ban danab ag wanppa niiegeg, Dawitnu danab aɗit aa muɗi eeɗeh ukke, haen aɗit bataeh, Moap danab ag muɗi eeɗak aɗit amu waappa daappig amu, ag huu laappa daaegeg, danab aɗit aa muɗi amu baula eeɗeh ukke, laippu bataeh am, Moap danab eeɗak amu waappa daappig ag huu laappa daappig. Danab aɗit aa anam heeh ukke, Moap ban danab ag huu amu anen anen daaegeg, Dawit he, nuhikkud ban danab ag huu laa, huu amuppa danab kuɗum daappig amu, ag danab amu aqaeg mauhppig amge Dawit nug he, Moap daup ag huu kuɗum iittappa daappig amu, ag aakku bau daappig. Dawit nug anam he, ⌊Moap ag ban hekkulagnu daup kuɗum iitta daappig⌋ amunu, ag Dawit waappa daan, ag en takis bia, hanhan Dawit medattappig.

³ Am Dawit nug Rehop bekka onig Hadateser, nug am Soba dilag king amu, nug nug ele ban hepiɗ. Haen Hadateser nug wan laa le onig Yupretis guguittak dayom eɗua gumakkunu nug nuhikkud daup ele appa ukkaegeg amu, Dawit nuhikkud daup ele ag ukkaeg, ag ele ban heppig. Ag appa ban hena, Dawit nug Hadateser eɗittom.

⁴ Nug eɗitta, nug Hadatesernu bannu karis 1,000, daup ag bannu karis attan daan, ban heppig ele 7,000, danab ag baelkadppa oinna, ban heppig ele 20,000 aɗalattom. Dawit nug anam ha, nug hos karis eeɗppig ele ⌊ag baula banppa gomananu⌋, nug hos amu baelag diɗi otaɗattom. Hos 100ib nug baelag diɗi ii otaɗattom.

⁵ Dawit amu he, Aram dilag daup Damaskusnu, ag Soba dilag king Hadateser ehanidkkulagnu uɗieg, Dawit nug Aram dilag daup 22,000 aqe mauhppig.

⁶ Dawit nug anam ha, nug he, nuhikkud daup laala ag Aram dilag wanppa daaegeg, Aram ag nug waappa daanna, en takis bia, hanhan Dawit medattappig. Aben ohppa Dawit nug appa ukka, ban heum ele amu, Yawe Nug he, Dawit nug nuhikkud kekeɗ eɗattom.

⁷ Amu Hadatesernu ban daup ikki dilag guppiɗ am golppa hak, amu Dawit nug daup amu eɗatta, nug ahilag guppiɗ amu awa, diia Jerusalem ukka, appa meum.

⁸ Dawit nug amu awa ukka, nug aab onig Beta, Berotai ele, Hadateser nug aab aɗit am gumatom amu, Dawit nug appanu bras huanak ele awa ukkom.

⁹ Amu Hamat dilag king Toi nug Dawit, Hadateser, nuhikkud daup oh ele eɗattom doyom.

¹⁰ Tatam Hadateser nug Toi eɗidkkunu ban haaha dayom amunu, Toi nug Dawit Hadateser eɗittom doya, nug he, nug bekka Joram, nug King Dawit humidkkunu, Dawit nug Hadateser eɗittomnu amegppa, “Ena heme,” ele akkunu, gumitta teum. Nug keeke silwappa, golppa, brasppa hak ele Dawit medakkunu awa ukkom.

^11-12 Nug keeke amu awa ukka, Dawit mette, Dawit nug keeke amu oh Yawenu tituana mettom. Nug tatam silwa, gol ele Edom, Moap, Amon, Pilistia, Amalek ele ban haaha awa, Yawenu tituana mettom, anamib nug keeke Hadoram awa uɗiom ele Yawenu tituana mettom. Aria, nug keeke Rehop bekka Hadateser, Soba dilag king, nug nuhig keeke ban ha awom amu, Dawit nug amu ele Yawenu tituana mettom.

¹³ Amu Dawit nug Edom dilag daup ele oolnu noak onig Yunu Oolnu Noak, nug ag ele appa ban henana, Dawit nug ag eɗatta, ahilag danab 18,000 aqe mauhppig. Nug anam he, danab ah kuɗumnab, wan atu digdigppa, ag Dawit nug onig okkai ele dooppig.

¹⁴ Dawit nug Edom eɗattowa, nug nuhikkud daup laala ag Edom daaglagnu maattom. Nug anam maatte, Edom danab ag Dawit waappa daappig. Yawe Nug he, Dawit nug adeppa adeppa kekeɗ ele ban hekkulagnu ukkom amu, nug kekeɗ eɗadttom.

Danab ag Dawitnu danab okkai daappig

¹⁵ Dawit nug Israel danab ah oh gumattom. Nug gumattatta, nug nai doya mala hettoɗia epeɗia elele mettak kobol, kobol tutukkuppa ele ag gumattom.

¹⁶ Seruia bekka Joap, nug ban daup ikki anuqak daye, Ahilut bekka Jehosapat nug yaak danab dayom.

¹⁷ Ahitup bekka Sadok, Abiatar bekka Ahimelek ele, aa am mana mettak danab daapiɗ. Seraia nug nai yaak danab dayom.

¹⁸ Jehoiada bekka Benaia nug danab Dawit gumappig, amuam Keret danab, Pelet danab ele, nug amu dilag okkai daye, Dawit bekkod ag nug ulum mettak danab daappig.