2 Samuel 6 - Nobonob Baibel

Dawit nug Tituanak Nainu Kunup awa, Jerusalem uɗiom

¹ Aria, dimppa Dawit nug baula Israel dilag daup enanag 30,000 onilagppa e uɗieg,

² Dawit nug danab amu oh ele ag ahan, Kayaknu Tituanak Nainu Kunup aon, Jerusalem uɗiglagnu aab onig Bala, Juda wanppa dayom amu, ag appa goppig. Tituanak Nainu Kunup, amuam Kayaknu, am Yawe Nukka Ɠagattag Oh Ele, Nug sia king nuhigppa, engel okkai-kerubim aɗit dottolah, Tituanak Nainu Kunup amuppa daattep ele, Nug aa gamalahppa daatte.

³ Tituanak Nainu Kunup am danab onig Abinadab laugppa dayom, amu Abinadab laug am qauko nakok attan dayom. Am ag Kayaknu Tituanak Nainu Kunup aon, uɗatnu karis bau okkai iitta, makau eeɗpiɗ ele attan mena, qaukoppan nonana, Abinadab bekoɗ Usa, Ahio ele aa uɗatnu karis amu atognoeheh noppig.

⁴ Ag anam noegeg, Kayaknu Tituanak Nainu Kunup uɗatnu karis attan dayeye, Ahio nug anuqa ukkom.

⁵ Ag anam nonana, Dawit, Israel laa oh ele daappig amu, ag oolag gamag huana ahehe, ag Yawe noobppa ahi huana ettanna, ag harp, laia, tambarin, sistrum amu simbal ele aɗan, musik ele huana heppig.

⁶ Ag amu henana, ag Nakonnu ee aeg mumuɗaknu abenppa gona teegeg, makau uɗatnu karis eeɗpiɗ ele aa taataɗ qettak heeh, Kayaknu Tituanak Nainu Kunup, uɗatnu karis attan uɗalom amunu, Usa nug ɠagattag daakkunu eppeg bahia aɗom.

⁷ Usa nug Kayak danab laa Tituanak Nainu Kunup aɗamanu ɗo meum, nug ɗo amu ii dim lamitta, eppeg bahia aɗom amunu, Yawe oo huana nauhom. Nug oo nauhom amunu, Nug he, Usa nug Kayaknu Tituanak Nainu Kunup daugppa appa mauhom.

⁸ Dawit nug Yawe he, Usa mauhe anttom amunu, ⌊nug nuhig hakppa uug amu beum doya, nug nukka nuhignu⌋ oo nauhom. Nug oo nauhom amunu, nug aben amu onig Peres Usa attaɗe, gemu, ⌊nai imu yaak haenppa⌋ ele ag anamib atteb.

⁹ Amu Dawit nug Yawe anam he antta, Yawenu baɗa aum. “Da genab Yawenu Tituanak Nainu Kunup awe tein, dahil aabppa mekkulnu elele iitta,” awa aum.

¹⁰ Dawit nug anam ana, nug Yawenu Tituanak Nainu Kunup awa ta, aab nug daatteppa, amuam Dawitnu Aab amu, nug appa mekkunu uuom. Nug uua, nug laih ukka, Gat ⌊Rimon⌋ danab onig Obetidom, nug laugppa meum.

¹¹ Dawit nug Yawenu Tituanak Nainu Kunup Obetidom laugppa appa me, Tituanak Nainu Kunup kalam ewam appa dayom. Dayeye am, Yawe Nug Obetidom, nug baegppa oh ele itattom.

¹² Anam daye amu, danab laa ag King Dawit amegppa appig. “Kayaknu Tituanak Nainu Kunup Obetidom laugppa daatte amunu, Yawe Nug Obetidom, nug baegppan ele itadtte,” aon appig. Ag anam aeg, Dawit doya, nug aha ukka, nug Kayaknu Tituanak Nainu Kunup appanu awa uɗiye, danab ah ag gamag ahak okkai doon ahi ettaegeg, Dawit nug Tituanak Nainu Kunup amu Dawitnu Aabppa meum.

¹³ Digma mawakppa amu, danab ag Yawenu Tituanak Nainu Kunup maon, tappa ukkak eblaih laippu ele ukkaeg, Dawit nug makau dawai laippu, makau nag ittag ele laippu ele manata, Yawe mettom.

¹⁴ Amu Dawit nug lamen enanag-epod linenppa hak takka, nug anam dayaya, nug Yawe noobppa nuhig ɠagattag ohppa ahi goɗom.

¹⁵ Am danab Yawenu Tituanak Nainu Kunup maon ukkaegeg, Dawit, am Israel laa oh ele goppig ele ag enana, ag trampet ele iwalppig.

¹⁶ Ag Yawenu Tituanak Nainu Kunup anam aon uɗinna, ag Dawitnu Aab, ag appa bena, aab ooppa nonana, Dawit nug gamag ahak okkai ele doyaya, nug oola taata, oola naana, ahi huana goɗeɗe, nug wau, Saul aɗeg Mikal, nug lag ooppa dayaya, gililppa ulah ibuppa daya, haen nug neekke ukke, King Dawit anam he antta amu, nuhignu nug ooppa ena iinab doyom.

¹⁷ Aria, ag Kayaknu Tituanak Nainu Kunup anam aon uɗin, Jerusalem bena, peh lag Dawit nug amunu babaittom ele, ag amuppa Tituanak Nainu Kunup amu aguppa daakkunu aben dayom amu, ag appa meppig. Ag meeg, Dawit nug manaknu ofa, laippu dayaknu ofa ele Yawe noobppa Nug mettom.

¹⁸ Amu Dawit nug manaknu ofa, laippu dayaknu ofa ele manatta, Kayak metta mala, nug Israel danab ah Yawe Nukka Ɠagattag Oh Ele onigppa itittak ena ag mattom.

¹⁹ Nug anam hewowa, nug Israel danab oh, ah oh ele appa daappig ele am anen anen oh bret batappatak laippu, det meu qaɗaiettak batappatak laippu, grep meu qaɗaiettak batappatak laippu ele mattom. Nug matte, danab ah oh ag ahan, lakka goppig.

²⁰ Dawit nug anam hewowa, haen nug nug baekkudppan ele itittak ena madakkunu ukke amu, Saul aɗeg Mikal nug dimittim uɗia, uɗa ta, amegppa aum. “Na king, na nakka na gemu onin memede! Na danab kaaka, dabmak iitta ele nug lamen iitta oitte, na anam bia hee, nahipad ehanittak ah dilag begbeg maɗi ah, ag na anam anidppig,” awa aum.

²¹ Mikal nug anam mattia male, Dawit nug nob ma aum. “Yawe Nug na mamen, nug baekkudppa ele guhuɗatta, da tituaniɗa, da nuhikkud danab ah, Israel, da ahilag king daakkulnu tituaniɗom amu, da Nug binag mekkulnu ahi goɗami. Da anam ahi goɗeɗe, da Nug binag mekkulnu, da tuɗitte, bau bau ahi goɗakkul.

²² Da hein, da danab hamu, king iitta bianab aakku daakkul. Da hein, da dakka, da dahil neekkakppa da danab hamu, king iittanab iitta bia dakka aniɗkkul, amge begbeg maɗi ah, na ahilagnu ame amu, ag dahilnu, ‘Nug am danab ena, binag ele,’ akkulag,” awa aum.

²³ Amu Saul aɗeg Mikal nug haen amu ii nak nug nid laa ii menuom, amu dimppa ele ii menuewe ukke, mauhom.