2 Samuel 5 - Nobonob Baibel

Israel oh ag heeg, Dawit nug ahilag king dayom

¹ Amu dimppa amu, Israel dilag huu okkaippan danab oh ag Dawit gumidna, Hebron uɗippig. Ag uɗin appig. “Ig na ele ig oh tiinig laippu.

² Amu anukka Saul nug ihinig king dayeye, haen amuppa ele na ihinig ban danab noolag awe, ag oh ban heppig. Am haen amuppa Yawe Nug na amenppa aum. ‘Na sipsip gumak danab sipsip gumadtte, amubia na dahilad danab ah, Israel, na ag gumadna, na ahilag king daakkut,’ awa aum,” aon appig.

³ Ag anam aeg, Israel dilag ikki danab oh ag King Dawit gumidna, Hebron uɗieg, nug he, ag nug ele Hebron appa, Yawe noobppa nug tituanna, nai qagappig. Ag nug tituanna, nai qakkan, ag Dawit, nug Israel oh dilag king daakkunu goɗen gokkaɗakppa tituanppig.

⁴ Dawit nug maɗ 30 dayaya, nug king ba dayom. Nug king ba, nug maɗ 40 king dayom.

⁵ Nug tatam king ba dayom amu, nug Juda dilagib king dayom. Nug digma, king daye ukke, nug maɗ eblaih aɗit, kalam eblaih laippu ele Hebron appa dayom. Amu dimppa nug Israel oh dilag king digma dayeye, maɗ 33 dayom. Nug Jerusalem appa dayaya, amu heum.

Dawit attem ha, danab Jerusalem daaegeg eɗattom

⁶ Dawit nug king dayeye, Jebus danab, ag aab okkai Jerusalem appa daaegeg, Dawit nug nuhikkud ban danab ele ag appa banelag gona, Jerusalem teeg, Jebus danab ag ahilag aabnu, “Am aab ɠagattagnab, Dawit nug wagai ma, ooppa nekkunu elele iitta,” dabmenana, ag Dawit amegppa appig. “Na aab okkai ooppa ii nemana. Aɗinu? Ihinkad danab laa amelag gaɗuak, laa baelag nau autaut oitteb ele, ag akka, ag na, nahipad daup ele ag eɗadkkulagnu elele,” aon appig.

⁷ Ag anam appig, amge Dawit eɗattowa, nug aab Sion aɗ ɠagattagnab ele amu awom. Amuam Dawitnu Aab aakku.

⁸ Dawit nug Jerusalem nuhig daakkunu awom, amge ii awom haenppa nug aum. “Jebus danab imu oh amu, ag dahil kekeɗ, ag ameg gaɗuak, baeg nau autaut oiyak ele daatteb bia doyeye, ahilagnu amu, da nau ninig ele doottem. Auntai laa nug Jebus danab imu eɗadkkunu hekku amu, nug le ippu wan ooppa hoyak dim lamitta ukka, aab imu ooppa ta, ag eɗadkkuoitte. Ib laa iitta,” awa aum. Dawit nug anam aum amunu, danab ag digmena appig. “Ameg gaɗuak, baeg nauhak ele am Dawitnu lag enanagnab, ag appa ii daamna,” adappig.

⁹ Dawit aɗi ag aab aɗ ɠagattagnab ele amu aon, Dawit nug aab aɗ ɠagattagnab ele amuppa ukka dayaya, nug aab amu onig, “Dawitnu Aab,” ataɗom. Nug appa dayaya, nug aab amu daug daug lag keeke, bau hattom. Nug aben laa wan ita me bak, nug amuppa digma, lag keeke, hatte ukke, Dawitnu Aabppa ukkom.

¹⁰ Yawe Kayak Nukka Ɠagattag Oh Ele Nug Dawit ele daapiɗ amunu, Dawit nug king ɠagattag daye, nuhig ɠagattag teete, Dawit nug king ɠagattagnab dayom.

¹¹ Dawit nug anam dayeye, Tair dilag king onig Hiram nug he, nuhig nai awa ukkak danab laala, kapenda danab, keeke menppa hak danab ele ag oh Dawit toppa goppig. Ag gonana, ag ad sida ele aon gona, kapenda, keeke menppa hak danab ele ag Dawitnu lag enanagnab heppig.

¹² Amu Dawit nug Yawe, Nug nuhikkud danab ah Israel dilagnu anuqak doya, Nug he, Dawit nug ahilag king dayeye, wan laappan danab ag nuhig gumaknu am binag ele dooppig amu, nug amu doyom.

Dawit bekkod Jerusalem doppig onilag

¹³ Amu Dawit nug Hebron uua, Jerusalem ta dayaya, nug wauud laala, aria wauud amge wauudnab iitta laala ele diie, ag Dawit bekkod, aɗekkud laala ele menuadppig.

^14-16 Nug bekkod Jerusalem appa menuattak amu, ag am Samua, Sobab, Natan Solomon, Ibhar, Elisua, Nepek, Japia, Elisama, Eliada, Elipelet ele.

Dawit nug Pilistia ele ban heppig

¹⁷ Amu haen Pilistia danab ag Israel oh ag Dawit nug ahilag king daakkunu goɗen gokkaɗakppa tituanppig doon amu, ahilag daup danab ohnab ag Dawit mattin anidna, qeppeg mauhkkunu Israel wanppa goppig, amge Dawit nug nai amu doya, nug ban haknu aben ɠagattag eleppa noa dayom.

¹⁸ Dawit nug aguppa dayeye, Pilistia ag oolnu noak onig Repaim, appa uɗin, oolnu noak amu oh aon daappig.

¹⁹ Ag anam daappig amunu, Dawit nug Yawe oɗ mettom. “Da Pilistia banelag tekkul am enate? Da banelag teppi amu, na ag da eppelppa maadkkutte?” awa oɗ mettom. Dawit nug Yawe anam oɗ mette, Nug nob ma aum. “Da Pilistia na eppenppa maadkkul amunu, na te!” awa aum.

²⁰ Yawe Nug anam aum amunu, Dawit, nuhikkud daup ele ag ukkaeg, Pilistia ele ban hena, Dawit aɗi ag Pilistia aqappig. Ag anam hena, Dawit nug aum. “Le keeke awa duttune gotte, amubia Yawe Nug dahilad kekeɗ he, iitta meppig,” awa aum. Dawit nug anam anana, nug aben amu onig Bal Perasim ataɗom.

²¹ Dawit aɗi ag Pilistia eɗatteg, ag kayak hambuppuak dottolkad ahilkad uuadna ooleg, Dawit aɗi ag uɗin akkan gona, ⌊dimppa manatteg eoppig⌋.

²² Ag anam heeg ukke, haen laappa Pilistia ag baula uɗin, oolnu noak onig Repaim appa uɗin, haen tutu dayaknu aben kalan daappig.

²³ Ag anam heeg, Dawit nug Yawe, nug aɗi hekkunu oɗ mette, Yawe Nug Dawit amegppa aum. “Tutukku, Pilistia noolagppa tena, ban aib heme. Iitta. Na taliliadna gona, dimulagppa tena, ad balsam kuɗum ag dimulagppa daatteb amunu, na aben amuppa tena, appanu Pilistia gukkuadna goppe, ag ele ban heig!

²⁴ Amge na gona, atu ad amu eleppa tewona, ad balsam amu gogppa oqotti laa, oqotti amuam ban danab ag laippuppa tappa ukkak oitteb oqotti bia, na oqotti amu doon, na da, Yawe, da na noomppa Pilistia aqadkkulnu gottem ippunidtte dookkut amunu, na amu doon, na paha ahan, Pilistia danab aqadkkutnu ukke!” awa aum.

²⁵ Yawe Nug anam haknunab aum amunu, Dawit nug anam heum. Nug anam ha, nug Pilistia danab kuɗum aqom. Nug aben onig Gibeon appa digma aqe ukke, Geser batak aqom.