2 Samuel 4 - Nobonob Baibel

Laa Isboset qe mauhom

¹ Amu Saul bekka Isboset nug Manahaim dayeye, laa nug Apner Hebron appa mauhom a doya, nuhig ɠagattag doyak iitta me, Israel laa oh ag eheɗ ottaippig.

² Amge Apner ii mauhom haenppa Saul bekka Isboset nug nuhikkud danab laala ag ukkaeg, kekeɗ ele ban henana, kekeɗ eɗadna, ahilkad keeke eɗun akkan uɗiglagnu tituanattom. Nug anam tituanatta, nug danab amu ag huu aɗit daaglagnu ele maatta, nug danab laa onig Bana, nug huu laanu ikki daakkunu tituana, nug danab laa onig Rekap huu laanu ikki daakkunu tituanom. Bana, Rekap ele aa Rimon bekoɗ. Rimon nug appag diig am Berot, amu nug Israel dilag huu okkai Benyaminnu danab. Aɗinu? Berot am Benyamin wanppa dayom.

³ Danab ag tatam Berot daappig amu, Israel ag uɗin heeg, ag ahan gona, Gitaim daaegeg uɗie, buɗulkad gemu ⌊nai imu yaak haenppa⌋ ele, ag wan laihnu danab, appa daatteb.

⁴ Amu Saul buɗub laa, am Jonatan bekka onig Mepiboset. Nug baekuɗ am kaliak ele. Uug amu nuhigppa beumnu diig am, haen Pilistia ag Israel eɗadna heeg, Saul, Jonatan ele mauhpiɗ, haen amuppa nid amu nug maɗ tanig ele, amu haen amuppa ele laa Jesrilnu uɗia, mauhpiɗnu a, ah nug nid amu gumom ele nug nai amu doya, oola gokkunu nid amu huma awa, qaiqaɗ ugakka, nid paɗe na qa, guittak awe, baekuɗ kaliak daapiɗ.

⁵ ⌊Amge Isbosetnu amu,⌋ deɗ laa Berot ted Rimon bekoɗ, Rekap, Bana ele aa ahaya, Isboset laugppa gokkulahnu goya, Isboset nug aam ameg tutukkuppa hik awa dayeye tepiɗ.

⁶ Aa goya, lag ooppanu wit awaknu ippu heya goya, Isboset niiomppa teya, aa nug biig qep-ppa yaaeh mauhom. Amuppa aa yaaeh mauhe, danab aɗit aa hewoya oolpiɗ.

⁷ Danab aɗit aa amu hekkulahnu hepiɗ, haen Isboset nug qaɗaqaɗppa niieye, aa ippu hak heya, wit lag ooppanu awaknu heya goya, Isboset niiomppa teya, yaapiɗ. Aa yoya, aa nug ikki baagppa otaɗya, ikki aoya oolya goya, atu onig Araba, aa amu oppatya ukkaeheh, tueb me ukkaeheh, wagkkaɗom.

⁸ Wagɗe goya goya, Hebron teya, aa Isboset ikki Dawit medapiɗ. Mettaya aa King Dawit amegppa apiɗ. “O naɗi ihinih, Saul, nahip kekeɗ, nug na nitteb mauhkkutnu heum amu, nug bekka Isboset ikki iikku. Gemu Yawe Nug he, uug oh Saul, am nug buɗub ele nahip-ppa heppignu nob nau na ag madakkutnu dayom amu, ag aakku aon malappig,” awa aum.

⁹ Aa anam apiɗ amu, Dawit nug oɗelahppa awa, Berot danab Rimon bekoɗ, Rekap, Bana ele amelahppa aum. “Yawe Nug ehaniɗe, uug oh dahilppa bette da eɗidttem amu, Nug genab bau daatte, genab amubia,

¹⁰ danab laa nug dahilppa uɗia, ‘Saul aakku mauhom,’ ana, nug, ‘Da nai ena Dawit medattem,’ dabmaama anam he, da nug aɗe hei, laa Siklak appa qei mauhom. Nuhig hak amunu da nob amu nug mettami.

¹¹ Amu gemu aa danab nau aɗit, aa danab nug mauhkkunu eheɗ hak laa ii heum, nug nukka nug laugppa, nuhig niiak abenppa niieye, aa qeeh mauhom amu, da ahilah hak nau amunu appi, aqatppeg aa mauhkkulahnunab daatte. Isboset tiig aa eppelahppa daatte, aa wanppa daaglahnu elele iitta,” awa aum.

¹² Dawit nug anam dabma aum amunu, nug nuhikkud danab ag danab aɗit amu aqatppeg mauhkkulahnu haknunab a, ag aqatppig. Ag aqatna, ag aa eppelti, baelti ele otaɗadna, ag aa gaɗalti le gottu Hebron appa dayom daugppa aihatppig. Ahilahppa ag anam heppig, amge aa Isboset ikki okkulpiɗ amu, ag Apner boumppigppa, Hebron appa ag nug ikki boumppig.