2 Samuel 3 - Nobonob Baibel

¹ Amu haen elab danab Saul bekka dim lamidppig, amu danab ag Dawit dim lamidppig ele ag ban henan daappig. Amu Dawit, nuhikkud danab ele ag ɠagattag okkai mena daaegeg, danab ag Saul bekka dim lamidppig amu, ag nauhegeg ukke, gai-iitta bia daappig.

Dawit bekkod

² Amu Dawit nug Hebron appa dayeye, nuhikkud ah ag bekkod laa menuadppig. Nuhig nid danab naanaeg am Amnon. Nug anig am Jesril ah onig Ahinoam.

³ Amnon dimugppanu am Kileab. Nug anig am Karmel ah, Abigel; tatam nug Nabal wau dayom, amge Nabal mauhe, Dawit awom. Amu dimugppa am Apsalom. Nug anig am Makah. Makah am Gesur dilag king Talmai aɗeg.

⁴ Apsalom dimugppan am Adonaiya. Nug anig am Hagit. Adonaiya dimugppan am Sepatia. Nug anig am Abital.

⁵ Sepatia dimugppan am Itream. Nug anig am Dawit wau Eglah. Dawit nug Hebron dayeye, nug wauud ag bekkod amu menuadppig.

Apner nug Dawit ehanidkkunu dabmeum

⁶ Amu laa ag Saul bekka dim lamidppig, laa ag Dawit dim lamidppig ele amu, ag ban henan daaeg ukke, Apner nug ban haaha, Saul bekka dim lamidppig oolagppan amu, nug danab onig okkai ele laa beum.

⁷ Amu Saul qappu laa, nug am nug wau amge waunab iitta, nug onig Rispa, nug Aia aɗeg; amu deɗ laa Isboset nug Apner amegppa aum. “Aɗinu na da mamel wau amge waunab iitta ele niipiɗ,” awa aum.

⁸ Isboset nug anam a amu, Apner nug oo huana nauhe, nug aum. “Da am qaitai? Da Juda ehanadkkulnu hettemtai? Da hanhan na mamen Saul baekkudppa, laikkud ele, da ahilagib dabmein oo metta ii uuak kobol dim lamidttem. Da na Dawit eppegppa mekkulnu elele, amge da ii hemi. Da amu hekkulnu elele dayeye ii hemi, amge gemu na da ah imu ele eheɗ hemuɗnu naippa yaaiɗna, da eheɗ heminu attem.

^9-10 Yawe Nug Dawit amegppa keeke laa hekkunu nuhig nai ɠagattag qetta, Dawit amegppa aum. Keeke nug amunu aum am, Nug heeb, Saul buɗub ele ag Israel dilag king ii daamna. Iitta. Dawit nug king daakkunu aum. Nug Israel wan, Juda wan ele, amuam aab onig Dan, appanu ukka ukka, Berseba aabppa batak, nug wan amu oh dilag king daakkun aum amunu, da Dawit anam daakkunu ii ehanidkkul dayeb amu, da Kayak Nug da, Apner, Nug da bu okkai meɗakkunu ool daatte.” Apner nug Isboset amegppa anam aum.

¹¹ Apner nug anam a amu, Isboset huana baɗa, nug nai laa nug amegppa ii aum.

¹² Aa anam hewoya, dimppa Apner nug nai awa ukkak danab ag nai laa aon gona, Dawit amegppa akkulagnu maatte goppig. Nug nai imu Dawit appeg dookkunu maatte goppig. “Israel wan oh am aunnu daatte? Na da ele nai qakkagnih dayeb amu, da Israel danab ah oh ag na ahilag king daakkutnu ib bappaidkkulnu uɗat hekkul,” awa aum.

¹³ Apner nug ag gona, Dawit amegppa anam akkulagnu ana he, ag gona tena, Dawit amegppa nai amu mattieg doya, nug nai imu Apner dookkunu me ukkom. “Am ena. Da na ele nai qakkagnih, amge keeke laippuib, na tatam heppe, i nai qakkagnih. Na Saul aɗeg Mikal, nug ah dahil amu, na nug eɗun omalna uɗina, da meɗakkut. Na amu ii hekkut dayeb amu, na da gumiɗna aib uɗime,” awa aum.

¹⁴ Dawit nug nai amu Apner dookkunu me ukke, nug ele nai imu Isboset dookkunu nuhig nai awa ukkak danab laa eppelagppa me goppig. Nai amuam inam. “Na heppe, dahil ah Mikal nug dahilppa uɗiaɗ! Anukka da nug aokkulnu da Saul aum bia, da ukken, Pilistia ban danab 100 aqai mauhppig. Mauheg, da hipalag gaɗa ele otaɗatten, akke, Saul mettami.”

¹⁵ Dawit nai amu me ukke, Isboset doyom. Nug doyom amunu, nug he, laa ag gona, Mikal gamu gehanu onig Paltiel ele daapiɗppa tena, Mikal aɗidna aon uɗippig. Paltiel mameg am Lais.

¹⁶ Ag Mikal aɗidna aon goppig, amge Paltiel nug waunu oo doye, nug dim lamitta gayaya ukkom. Gayaya ugekke, ag Bahurim tena, Apner nug aum. “Na eɗun, lakka ukke!” awa aum. Nug anam aum amunu, Paltiel nug eɗua ukkom.

¹⁷ Amu Apner, Israel dilag ikki danab ele qagmena, nai mattinna, Apner nug aum. “Haen nakok elab ag Dawit ahilag king daakkunu oolag aakku dayom, gemu ele daatte

¹⁸ amunu, ag gemu anam aakkude heig! Aɗinu ag anam hekkulag? Yawe Nug inam aum. ‘Da heppi, dahil maɗi nid Dawit nug dahilad danab ah Pilistia danab eppelagppanu, ahilag kekeɗ laa oh ele eppelagppanu eɗua diiattebeb, ag ena daaglag,’ awa aum.” Apner ag amelagppa anam aum.

¹⁹ Apner nug amu hewowa, nug Benyamin huu ele qagmena, nai madippig. Nug amu oh ha male, Israel, Benyamin ele oh ag, “Ena, anam hekkunig,” appig amunu, nug Dawit amegppa Israel danab ah, Benyamin danab ah oh ele ag aɗi dabmeppig ab dookkunu Hebron gokkunu aha ugekke,

²⁰ danab 20 nug ele oh goppig. Gona Hebron teeg, Dawit anatta he, ag ee naɗi Apnernu, nuhikkud danab 20 dilagnu ele bappaidppig.

²¹ Ag ee amu lawona, Apner nug Dawit amegppa aum. “O naɗi, na heppe, da paha ukken, Israel danab oh ag na ele nai laippu qakkaglagnu qagmaadkkul. Da amu heppi, ag na ele qagmena, nai qakkona, na Israel oh dilag king, na oot hette bia daakkut,” awa aum. Apner nug anam a, Dawit ena doya he, Apner nug maɗoɗ ele eɗua ukkom.

Joap nug Apner qe mauhom

²² Apner aha ukke, haen elab iitta amu Joap, Dawitnu daup laa ele ag ukkaeg, kekeɗ ele ban hena eɗattona eɗun uɗippig. Ag kekeɗ eɗadna, ahilkad keeke kuɗum aon, ag amu ele akkan uɗippig. Ag eɗun uɗippig, amge Apner nug matu ukkom. Aɗinu? Dawit nug ena gokkunu a, nug maɗoɗ ele aha ukkom, Dawit ele ii daapiɗ.

²³ Amge Joap eɗua uɗie, laa nug Joap amegppa Ner bekka Apner uɗie, King Dawit ele nai mattiya, Dawit he, nug maɗoɗ ele aha ukkomnu a doyom.

^24-25 Danab amu Joap amegppa anam a, Joap nug aha, Dawit toppa ukka aum. “Na Ner bekka Apner doottem. Nug nahip dayak, nahip ɠagattag ele antta, na hambuppuidkkunu nug uɗiom, amu na aɗinu anam heme? Antte! Apner nahipnu uɗiom. Aɗinu na nug gokkunu ae, nug aha ukkom? Gemu nug aakku ukkom,” awa aum.

²⁶ Joap, Dawit amegppa anam awowa, nug Dawit uuitta ukka, nug nai awa ukkak danab laa ag Apner nug eɗua uɗikkunu appeg dookkun maatte gona, Apner nug le moɗ Sira dayom amu, nug appa dayeye, nai awa ukkak danab ag appa tena, aeg doya, eɗua uɗiom, amge Dawit nug Joap heum, nug amunu laa ii doyom.

²⁷ Anam daye, haen Apner nug eɗua Hebron uɗie amu, Joap nug aabnu aɗ odppa dayaya, nug Apner ele aa laih danab ii daattebppa goya, aya daayya, nai mattiglahnu he goya, appa Joap nug Apner big qep-ppa ye mauhom. Apner nug Asahel ye mauhom amunu, Joap nug gemu nob ma, Apner ye mauhom.

²⁸ Joap nug amu he, dimppa haen Dawit nug amu doya, nug aum. “Laa Ner bekka Apner qe mauhom, amge Yawe Nug dootte, da, da buɗulad ele, ig Nug noobppa hak amunu beɗunigppa aab iitta.

²⁹ Joap nug hak nau amu heum amunu, nob am Yawe Nug nug, nug buɗub ele madakkunu ool daatte. Da Joap buɗub oolagppa hanhan laa nug ihi nau, ii qaɗaiedatte ele daakku, o iitta nug buɗub oolagppa hanhan laa nug gaɗa oɗe nau ele daakku, o iitta, nug buɗub oolagppa hanhan laa nug baeg nau ele daakku, o iitta nug buɗub oolagppa hanhan laa nug qep-ppa mauhkku, o iitta nug buɗub oolagppa laa nug ee iitta dayeb, enug qekkunu ool daatte,” awa aum.

³⁰ Amu diig aɗinu Joap, nug amag Abisai ele aa Apner qeeh mauhom? Apner aɗi ag Gibeon appa ban henana, appa Apner nug Joap, Abisai ele amalah Asahel qe mauhom, amunu aa anam hepiɗ.

³¹ Anam daye amu, Dawit nug Joap, danab ah nug ele daappig ele amu, nug ag oh amelagppa aum. “Ag lamen ahilag patiɗna, lamen heɗiag ele takkeg! Ig Apner boumkkunignu gotata, ag mahidnana anuqna ukkeg!” awa aum. Dawit nug anam a, ag anam heegeg, King Dawit nug qaɗaqaɗ, ag amuppa Apner gaɗa maoppig amu, nug qaɗaqaɗ amu dimugppa oiyom.

³² Ag Apner Hebron appa boumppig amu, King Dawit nug Apner boumak abenppa nug huana gayom. Nug gayeye, danab ah laa oh ele gaappig.

³³ Ag boumeg, King Dawit nug ahi laa nai oo doyak ele, Apner binag ma ettom. Ahi ettom am inam. “Laa nug Apner ɗo tippalak danab bia qe mauhom amu, kobol amuam enatai? ⌊Iitta! Amuam kobol ena iittanab iitta.⌋

³⁴ O Apner, na danab ah gumattak danab ag danab nau eppeg hippalna, qeeg mauhtte, na amubia ii mauhme. Ao, na danab ah gumattak danab ag danab nau baeg qakkan, qeeg mauhtte, na amubia ii mauhme. Iitta. Danab nau ag danab laa hamu qeeg mauhtte, na amubia mauhme.” Dawit nug anam ahi ettom. Ahi ette, danab ah oh ag baula gaappig.

³⁵ Ag amu hena malona, ag oh uɗin, Dawit nug paha amunppa ee nakok lakkunu duttunna appig, amge Dawit nug nob ma, nuhig nai ɠagattag qetta aum. “Da aam ii noumppa bret nakok lakkul dayeb, o iitta da aɗi ee laa nakok laa aam ii noumppa lakkul dayeb amu, Kayak Nug bu okkainab meɗakkunu ool daatte,” awa aum.

³⁶ Danab ah oh ag Dawit heum anidna, ag amunu ena dooppig. Ge, King Dawit nug aɗi aɗi heum ele amu, ag amu anidnana, ag amunu ena dooppig.

³⁷ Dawit nug deɗ ag Apner boumppigppa anam heum amunu, Israel oh ag dooppig, Dawit nug a, Joap, Abisai ele aa Ner bekka Apner qepeɗ mauhkkunu ii hepiɗ. Iitta. Joap, Abisai ele, aa aya amu hepiɗ.

³⁸ Amu Dawit nug nuhikkud danab laa amelagppa aum. “Ag gemu Israel oolagppanu danab okkai, danab onig ele na qeum amu, ag amu iite dootteb?

³⁹ Kayak he, da goɗen gokkaɗakppa tituanak, da amuppa gemu king daattem, amge da am ɠagattag okkai iitta. Seruia bekoɗ imu aa am ɠagattag okkainab ele. Aa eheɗ hepiɗ amu, Yawe Nug eheɗ hak amu andatta, Nug eɗua ahilah eheɗ hak eleleppa nob matakkunu ool daatte,” awa aum.