2 Samuel 24 - Nobonob Baibel

Dawit nug Israel danab ah ebaqom

¹ Yawe Nug Israel dilagnu baula oo nauhak huanak doya he, ⌊Satan nug⌋ Dawit Israel uug madakkunu, Dawit amegppa aum. “Na ahan, Israel danab ah, Juda danab ah ele ebaqe!” awa aum.

² Satan nug anam heum amunu, King Dawit nug nuhikkud ban daup ikki anuqak Joap amegppa aum. “Da Israel danab ag ban hekkulagnu elele daatteb ebqak dookkulnu amu, ag ahan, Israel dilag huu okkai ohppa, aab onig Dan, appanu ukka ukka, Berseba aabppa batak, ag wan amu ohppa gona oinna, ag Israel danab ag ban hekkulagnu elele daatteb, ag danab amu oh onilag yeeg!” awa aum.

³ King Dawit nug ag amelagppa anam aum, amge Joap nug eɗua nob ma aum. “Yawe, Nug nahip Kayak amu, Nug heeb, nahipad daup ag huanaknab daaglagnu ool daatte. Gemu daup laippu daatte, Kayak Nug heeb, 100 daaglagnu ool daatte. Nug heeb, na bau daanna, daup huanak anam anadkkutnu ool daatte, amge gemu diig aɗinu na king, na dahil naɗi, na daup ebaqakkutnu hettem?” awa oɗ mettom.

⁴ Joap nug anam aum, amge King Dawit nug nuhig dabmak eɗukkunu uua, nuhig nai am Joapnu eɗittom amunu, Joap, nuhikkud ehanittak okkai ele ag king uuidna, ag Israel danab ag ban hekkulagnu elele daatteb onilag yaaglagnu goppig.

⁵ Ag Jodan le mataɗna, ag gona, aab onig Aroer, oolnu noak gamagppa daatte, appa uɗat amu digmeppig. Ag amuppa digmena, ban danab onilag yaanna, ag gona gona, Gad wanppa ele hena, ag aab onig Jaser batak teppig.

⁶ Ag appa tewona, ag tuɗidna, Gileat gona ebaqona, ag gona wan atu onig Tahtim Hodsi, appa ahilag uɗat hewona, ag gona, Danjan tewona, ag gona Saidon batak danab ebaqadppig.

⁷ Ag Saidon tewon, eɗun uɗinna, aab Tair aɗ ɠagattagnab eleppa nena, aab oh Hiwi danab daappig, Kanan danab daappigppa ele ebaqappig. Ag amu hewona, ag nena uɗinna, Berseba batak ag ebqak uɗat amu malappig. Berseba am Juda wannu tom yau uɗitteppanu, appa ana daatte.

⁸ Ag Israel wan ohppa gona, ebqak uɗat amu hena malona, ag eɗun, Jerusalem uɗippig. Ag uɗat amu hekkulagnu oippig am kalam eblaih waɗele, deɗ 20 ele.

⁹ Ag Jerusalem uɗinna, Joap nug King Dawit gumitta ta, Israel danab gane ag ban daup daaglagnu elele daappig a doyom. Amu ebqak ahilagppa Israel dilag daup, ag qep elab aɗan, ban hekkulagnu elele daappig amu, ebqak ahilag am 800,000. Juda dilag daup amubia amu, ag ahilag ebqak am 500,000.

¹⁰ Dawit nug he, Joap aɗi ag ban danab ebaqadna malaeg, Dawit dimppa nug nuhig ooppan oiyak ippunittaknu ulumppa amu, nug eheɗ doya, nug Yawe amegppa aum. “Da hemi imuppa amu, da hipunin okkainab hemi. Da hipunin hemi amunu, O Yawe, da, nahip maɗi nid, da na hipunin dahil uhuqna meɗakkunu ool ohppa oɗ medattem. Aɗinu? Da dabmak tutukku iittappa keeke laa iikku hemi.” Dawit nug Yawe anam unuqittom.

¹¹ Dawit nug anam Yawe amegppa a, deɗ amu uue, wagɗe, Dawit nug ii ahom haenppa Yawe Nug nai laa nuhig propet danab Gad, Gad am Dawitnu propet amu, Nug nug amegppa nai laa inam aum.

¹² “Na gona, Dawit amegppa inam appe doyaɗ! ‘Yawe Nug inam atte. “Da bu medakkulnu ib ewam iikku ippunidkkulnu hettem. Da ippunidppi, na da ib attenppa bu medakkulnu oot daatte appe, da ib amuppa bu medakkul,” ’ ” awa aum.

¹³ Yawe Nug Gad amegppa anam aum amunu, Gad nug aha, Dawit toppa ukka, amegppa aum. “Yawe Nug da amelppa uug imu imutai laa bekkunu aum amunu, maɗ ewam Israel wanppa enug haen daakkutai, o iitta ahilkad kekeɗ ag kalam ewam ag Israel eɗadna lamadkkulagtai, o iitta oɗe nau danab kuɗum aqe mauhtteb am deɗ ewam Israel wan ooppa daya heeb, danab ah mauhkkulagtai? Na dabmak aona, na appe, da nahip dabmak laa meiɗe uɗimi ele amegppa appi dookku,” awa aum.

¹⁴ Gad nug anam a, Dawit nug aum. “Da uug naunab nau doottem. Amge Yawe Nug oo gai-iitta doya oo metta ehanittak kobol okkainab aɗa dim lamidtte amunu, ig Nug eppegppa bu aognignu ool hette. Da danab eppelagppa bu aognignu ool ii daatte. ⌊Nug heeb, oɗe ig iqakkunu ool hette⌋,” awa aum.

¹⁵ Dawit nug anam aum amunu, Yawe Nug he, oɗe nau danab kuɗum aqe mauhtteb ele buttua amuppa digma aqa he ukke, Kayak aumbia deɗ ewamppa batom. Oɗe anam aqa he, Israel wan ohppa aab onig Dan, appanu ukka ukka, Berseba aabppa batak danab ah aqe mauhadppig. Mauhadppig ebqak am 70,000.

¹⁶ Yawe Nug he, engel laa nug oɗe amu he beum amu, engel amu nug Jerusalem uug amu aon nauhkkulagnu eppeg hume, Kayak antta, ooppa guittak naɗi doya, Nug engel uɗat amu heum ele amegppa aum. “Aakku elele! Baula aib heme!” awa aum. Yawenu engel nug Jebus buɗubppan danab Araunanu ee aeg mumuɗaknu abenppa dayeye, Yawe Nug engel amegppa amu aum.

¹⁷ Amu haen Dawit nug engel danab ah aqom antta amu, nug Yawe amegppa aum. “O Yawe, daib hipunin hein, eheɗ hemi. Imu ag am sipsip bia aakkuib. Ag aɗi eheɗ heppig? Iitta. Da eheɗ hemi. ⌊Da hipunin hemi amunu, na anam hekkutnu anidttem dayeb,⌋ na da, da baeladppa ele iqakkutnu ool hette,” awa aum.

Dawit nug mana mettaknu qaɗab babaittom

¹⁸ Amu deɗ Yawe Nug engel nug uukkunu aum amu, deɗ amuppa Gad nug Dawit gumitta ta, amegppa aum. “Na ahan gona, Jebus danab Arauna, na nug nuhig ee aeg mumuɗaknu abenppa appa Yawenu qaɗab bappaitte!” awa aum.

¹⁹ Yawe Nug Gad oɗeppa Dawit nug anam hekkunu aum amunu, Yawe haknunab aum bianab Dawit nug hekkunu aha, aben amuppa teum.

²⁰ Dawit nug appa teete, Arauna nug neekke ukke, king, nuhikkud danab ele, ag nuhigppa uɗiegeg anatta, nug ukka, king noobppa gateg qaun o, gomela, iɗu wanppa meum.

²¹ Nug anam hewowa, nug king amegppa aum. “Dahil naɗi, dahil king, na dahilppa uɗittemnu diig am, da ii doottem. Na appe dookkulnu oɗ medattem,” awa oɗ mettom. Arauna nug anam Dawit amegppa a, Dawit nug nob ma aum. “Da ee aeg mumuɗaknu aben imu, da wan imuppa Yawenu qaɗab qein, amuppa mana mettak heppi, oɗe nau danab kuɗum aqe mauhtteb ele ig uuikkeb, danab ah baula ii mauhmananu aben imu daden mekkulnu uɗimi,” awa aum.

²² Dawit nug anam a, Arauna nug Dawit amegppa aum. “O dahil naɗi, dahil king, na aɗi aon, mana mettak hekkutnu oot daatte amu, na awe! Makau okkai ebehi ele na manaknu ofa hekkutnu iikku daatteb. Ee aeg mumuɗaknu keeke palang otala okkaippa hak, amu doɗnu duugppan tuqai ele na ilakkutnu ele iikku. Na awe!

²³ O king, da, Arauna, da imu oh na, na king amu, da na medattem; amu keeke laippu aakkuib am da ool daatte. Amuam Yawe, nahip Kayak, Nug nahipnu ena dookku,” awa aum.

²⁴ Arauna nug anam aum, amge King Dawit nug nob ma aum. “Iitta! Da daden mekkulnunab doottem! Aɗinu? Da doɗ da ii daden memi amu, da doɗ amuppa manaknu ofa, Yawe, dahil Kayak, ii medapa. Iittanab! Da daden mewoya, da manen medakkul,” awa aum. Nug anam aum amunu, Dawit nug ee aeg mumuɗaknu aben amu, makau okkai ebehi ele daden mekkunu Arauna 600 gram silwa mettom.

²⁵ Dawit aben amu anam daden ma, nug qaɗab qewowa, nug manaknu ofa, laippu dayaknu ofa ele qaɗab amuppa manatta, Yawe mettom. Dawit nug amu he, Yawe Nug Dawitnu unuqittak doya, Israel ehanatta he, oɗe nau danab kuɗum aqe mauhtteb ele aakku iitta meum.