2 Samuel 23 - Nobonob Baibel

Dawit nug wanppa baula ii daamanu nai

¹ Imuam Dawit, nug nuhig mauhaknu haen miag daye doya, nug nai laa inam mattiom. Imuam Jesi bekka Dawitnu nai meunab ele. Ao, imuam Kayak Attannab Laa Oh Eɗattak Nug he, Dawit nug danab okkainab dayom, am nuhig nai meunab ele. Jakopnu Kayak, Nug Dawit king daakkunu goɗen gokkaɗakppa tituane, nug king dayom. Ge, Dawit nug Israel dilag ahi enanag ettaknu danab dayom.

² “Yawenu Ouɗi Nug he, da oɗelppa nai mattimi. Ao, nuhig nai am, da oɗelppa iikku daatte.

³ Israel dilag Kayak Nug da dookkulnu nai mattiom. Ao, Israel dilag kekeɗ nikkamanu ehanittak, Nug da amelppa nai laa imu aum. ‘Danab nug king dayaya, kobol genab tutukkuib dim lamittatta; nug dahilnu ebehi oh bodoetta le meeme, nuhikkud danab ah atognoadtte amu,

⁴ nug am buttua haen enanag, lombig iitta aam baaba, amahlak wan medatte, nug amahlak amubia daatte. Ge, danab anam amu, nug gu wan leppu mette, keeke wanppa bette amu, nug gu nug na mala, amahlak okkai bette, nug amahlak amubia daatte,’ awa aum.

⁵ Kayak Nug da, da baeladppa ele tituanikkom. Ao, Nug he, da Nug ele i nug tituanɗa, nai qakkamuɗ, hanhan daakkunu heum. Nug tituana nai qakkak amu, am hanhan babaittak anamib daakku. Ao, Nug da hanhan atognoiɗebeb, da ena daappi, nug ele heeb, dahil uɗat am elele gokku.

⁶ Amuam anam bekku, amge Kayak Nug heeb, danab nau ag nauhkkulag. Aɗinu? Ag qaun danab eppeg he nauhtte, ag amubia daatteb.

⁷ Danab aun nug uud keeke qaun ele ehalkkunu hette ele amu, nug keeke aenppa hakppa, o banppa ehaltte. Keeke qaun ele amu, ag adeppa daatteb, amuppaib laa nug amote ewa, iitta mette.” Dawit nug anam aum.

Dawitnu danab ɠagattag onilkad

⁸ Dawitnu ban daup ɠagattagnab onilkad am inam. Tatam am Takemon ted onig Josep Basebet. Nug am huu laa onig Danab Ewam dilag ikki dayom. Danab Ewam ag am Dawitnu ban daup oolagppa onilkad okkai, laa oh eɗattak ele. Deɗ laa Josep Basebet nug danab 800 ele ban henana, qep elab nuhigppa aqe mauhppig.

⁹ Danab Ewam oolagppa Jasobeam dimugppa am Aho ted onig Eleasar, nug Dodai bekka. Amu haen laa Dawit, Eleasar, amu Israel dilag daup laa ele ag Pilistia Pasdamim appa ban hekkulagnu qagmeeg, Israel ag Pilistia aon aon aqaegeg, Pilistia wagainab meeg, Israel ag eɗun oolppig.

¹⁰ Amge Eleasar nug ii oolom. Iitta! Nug dayaya, qep elabppa Pilistia aqe mauhegeg, nug eppeg qep qaɗib aɗeɗe, dagta dayom; eppeg qep paɗakkun elele iitta. Nug anam he, Yawe Nug deɗ amuppa Eleasar eppegppa Israel ehanittak okkai mattom. Kayak ehanitte, Eleasar nug anam he, Israel dilag daup laa ag eɗun uɗippig, amge ban ii heppig. Iitta. Ban iitta meum. Ag eɗun uɗin, mauhppig dilag keeke amuib akkan, aon goppig.

¹¹ Eleasar dimugppa am Harar ted onig Sama, nug Agi bekka. Deɗ laa Pilistia ag uɗin, dad okkai ee laa onig lentil ebappigppa ban hekkulagnu qagmenana heeg, Israel dilag daup ag oolppig.

¹² Amge Sama nug dad okkai amu gamagppa dayaya, Pilistia ag aomnanu ban haaha, Pilistia aqe mauhppig. Yawe ehanitte, nug aqe mauhppig amunu, nug eppegppa Yawe Nug Israel ehanittak okkai mattom.

¹³ Amuam danab ɠagattagnab ewam, amge Dawitnu ban daup ɠagattag ameg laa am Danab 30 ele. Amu maɗ laappa ee aeg awak haenppa Danab 30 amu oolagppanu danab ewam ag ahan gona, Dawit nug wan oɗe onig Adulam, nug amuppa daye, ag nug gumidna uɗippig. Pilistia danab ag oolnu noak onig Repaim appa haen tutu dayaknu aab kalan daaegeg, danab ewam ag neppig.

¹⁴ Dawit nug ban haknu aben ɠagattag amuppa daye, Pilistia ag ahilkad huu laa ag ahan gona, Betlehem aabppa, ag appa daappig.

¹⁵ Ag daaegeg, ⌊aben Dawit dayom, amuam atu taɗak amunu,⌋ Dawit nug le baag diie, nug aum. “O gadon, le moɗ Betlehem aab odppa daatte amu, elele daalo, laa nug ukka, le appanu awa uɗia, meɗeb lalom!” awa aum.

^16-17 Nug anam aum, amu daup nuhig ewam amu ag doon, ag gona, wagainab mena, Pilistia eɗadna, Betlehemnu le moɗppanu le aon, ag eɗun Dawit gumidna goppig. Ag nug gumidna gona, le mettaeg, Dawit nug antta, nug lakkunu elele ii doya, nug, “O Yawe, danab ewam imu ag mauhkkulagnu henana, ag le imu aon uɗippig amunu, le imuam ag tiilag bia. Da lakkulnu elele iittanab iitta,” awa aum. Nug anam ana, nug lanak uua, nug danab wain mana mettak qaɗeppa gokkaɗa, Kayak medatte, nug amubia wanppa gokkaɗom. Ban danab ɠagattagnab ewam amu, ag anam anam heppig.

¹⁸ Seruia bekka Joap amag Abisai, nug am Danab 30, nug amu dilag okkai dayom. Deɗ laa nug danab 300 ele ban henana, nuhig banppa aqe mauhppig amunu, nug onig am danab ɠagattagnab ewam onilag bia dayom.

¹⁹ Danab 30 amu oh ag onilag okkai ele, amge Abisai nug onig okkainab ele, nug ahilag ikki dayom. Nug Danab 30, ahilag ikki dayom, amge nug danab ɠagattagnab ewam oolagppa ii dayom.

²⁰ Aria, Jehoiada bekka Benaia, nug am Kapsel danab, nug ele ban hak danab ɠagattag. Nug kobol okkai okkai, iɗu iɗu ele heum. Nug Moapnu ban danab ɠagattag aɗit aqatom. Deɗ laa sno neene, nug wan moɗ laa oɗe okkai ele ooppa noa, laion laa appa dayom amu, nug qe mauhom.

²¹ Amu haen laa nug Isip ted okkai naɗi laa, nug danab amu qe mauhom. Isip ted nug ban aɗe, Benaia nug daɗibib aɗom, amge nug danab amu ele ban hekkulahnu ha wana, nug Isip tednu ban aɗom amu, nug ban amu qa oqaia, aɗitta awa, nug Isip ted nukka nuhig ban, nug amuppa eɗua nug ye mauhom.

²² Jehoiada bekka Benaia nug kobol okkai okkai anam heum. Nug ele onig okkai, danab ɠagattagnab ewam, ag onilag okkai daappig bia, amge ag bianab iitta.

²³ Danab 30, ag oh binalag okkai ele, amge ag oolagppa Benaia nug binag okkainab awom. Nug amu awom, amge nug ban danab ɠagattagnab ewam oolagppa ii dayom. Anam amu Dawit he, danab ag Dawit gumappig ele, nug ahilag okkai dayom.

²⁴ Dawitnu danab ɠagattag, ag Danab 30, huu amuppa daappig onilag am inam. Joap amag Asahel; Betlehem ted onig Dodo, nug Elhanan Bekka;

²⁵ Harod danab aɗit onilah Sama, Elika ele;

²⁶ Pelet ted onig Heles; Tekoa ted onig Ira, nug Ikes bekka;

²⁷ Anatot ted onig Abieser; Husa ted onig Mebunai;

²⁸ Aho ted onig Salmon; Netopa danab aɗit onilah Maharai,

²⁹ Bana bekka Helep ele, nug Netopa ted; Benyamin wanppan aab onig Gibea ted onig Itai, nug Ribai bekka;

³⁰ Piraton ted onig Benaia; Nahalegas ted onig Hidai;

³¹ Araba ted onig Abialbon; Barhum ted onig Asmawet;

^32-33 Salbon ted onig Eliaba; Jasen bekoɗ; Harar danab aɗit onilah Jonatan, Sama bekka, amu Ahiam, Sarar bekka ele;

³⁴ Maka ted onig Elipelet, nug Ahasbai bekka; Gilo ted onig Eliam, nug Ahitopel bekka;

³⁵ Karmel ted onig Hesro; Arap ted onig Parai;

³⁶ Soba ted onig Natan, nug bekka Igal; Hagri bekka;

³⁷ Amon danab onig Selek; Berot ted onig Naharai, nug Seruia bekka Joapnu bannu keeke mawom;

³⁸ Itra danab aɗit, aa onilah am Ira, Garep ele;

³⁹ Aria, Hit danab onig Uraia ele. Danab amu oh dilag ebqak am 37 ⌊amu ag oh huu onig Danab 30, ag huu amu ooppa daappig⌋.