2 Samuel 22 - Nobonob Baibel

Dawit nug Yawe binag mekkunu ahi imu ettom

¹ Dawit nug Yawe Nug ehanitte, nug nuhig kekeɗ eppelagppa ii dayaya, Saul eppegppa ele ii daya antta, nug ahi imu edatta,

² nug aum. “Yawe Nug kekeɗ niɗamanu ehanittak dahil daatte; Nug aab aɗ ɠagattagnab dahil bia ele daatte. Nug ehanitte qagaiettakppa ii dayaknu ehanittak dahil daatte;

³ Kayak dahil Nug kekeɗ niɗamanu ehanittak dahil dayeye, da nuhigppa ukken, padal mak eɗitten, ena daattem. Kayak Nug am dahil guppiɗ, da nuhig ɠagattagppa da kekeɗ eppelagppa ii daattem; Nug am ban haknu aben ɠagattag dahil bia daya, Nug dahil padal mak eɗitteb ena dayaknu ehanittak daatte. Nug Padal ii maknu ehanittak dahil daatte; Nug danab laa ag laa guittak nau mauhnoak mettaknu tiigppa daatte amu, nug danab amu eppelagppanu awiɗtte.

⁴ Da Yawe onigppa eiyi, Nug kekeɗ eɗilna aɗaelmananu ehaniɗe, ag ii eɗiltteb; Nug ig danab ah, ig Nug binag mekkunignu elele daatte.

⁵ Danab nug yu gamagppa dayeye, duban eheɗ qa, nug talilittak daye, nug yu ooppa nokkunu hette, amubia da mauhkkulnunab daami. Yo, da amu, da danab nug le ui naɗippa mauhkkunu malom daatte, da amubia daami.

⁶ Boumak moɗnu muɗi da qakkiɗe, da mauhkkulnu hemi. Yo, mauhak am pelem laa bia, da amuppa daami.

⁷ Amge da uug nau amuppa dayeye, da Yawe onigppa emi. Ao, da Kayak dahil unuqidmi. Da Nug unuqitti, Nug nuhig mettid lagppa dayaya doya, da ehaniɗom. Ge, Nug dahil unuqittak doya ehaniɗom.

⁸ Nug unuqittak dahil doya he, wan uɗalala, hahaɗom. Ao, Nug doya he, hab ukku uɗalom. Amu hab wan ele aa anam hepiɗnu diig am, Kayak Nug ⌊laa ag da heiɗppeg nauhkkul anatta,⌋ Nug oo nauhom.

⁹ Danab laa oppoɗi huana beeb, diig amunu kahug nug noobppa neebeb, oɗeppa dittiak ele neebeb, dittiak waappa ottag daalob; amubia Yawe Nug oppoɗi huananab beum.

¹⁰ Nug he, hab obate, Nug neum. Ao, lombig gatatunab ele Nug baeg waappa dayom.

¹¹ Nug engel okkai-kerubim gomeppa dayeye, hagagɗa uɗiom. Ao, ai haugppa oitte, amubia ulah am Nug haug dayeye, huana uɗiom.

¹² Nug he, gatatu amu nuhig peh bia dayom. Ao, lombig gatatu ele aa peh amunu gilil bia daapiɗ.

¹³ Nug dayeye, amahlak okkainab aakku dayom. Ao, amemɗi nuhigppa palaedatta neum.

¹⁴ Yawe Nug hab attannu nai mattie, baag oqotti am hakkaɗ oqotti okkai bia neum. Ao, Kayak Attannab Laa Oh Eɗattak baag am ɠagattagnab ele.

¹⁵ Nuhig lat aeg am amemɗi, amu Nug lat aeg e, nuhig kekeɗ ag oolna, matatun goppig. Yo, nuhig amemɗi palaedatta amahlele, ag oolna goppig.

¹⁶ Yawe Nug he, ulah huanak hos ihie, ulah huana noobppa doa gotte, amubia Nug he, ulah huanak ukke, yu oppate, yu unuqag diigppa oolnu noak daatteb amu, ag miag atippig. Ao Yawe Nug nai he, wan ukku miag atiom.

¹⁷ Yawe Nug attannab umanu eppeg bahia da aɗailom. Ao, Nug da, danab laa nug laa le naɗi ooppan ehanidtte bia da aben eheɗppanu ehaniɗa awiɗom.

¹⁸ Nug da kekeɗ ɠagattag ele eppelagppanu awiɗom. Ao, Nug laa ag dahilnu nau ninig ele dooppig eppelagppanu eɗua awiɗom. Aɗinu? Kekeɗ ag da eɗilak, da ag eɗadkkulnu elele iitta.

¹⁹ Deɗ da uug naunabppa daaiyi, ag da eɗilkkulagnu heppig. Ge, ag anam heppig, amge Yawe Nug he, da ɠagattag daami.

²⁰ Yawe Nug anam ha, Nug omaiɗa, aben okkai, enanag, Nug appa meiɗom. Ao, Nug dahilnu oo mauhtte amunu, Nug da ehaniɗe, da qagaiettakppa ii daami.

²¹ Da kobol genab tutukku ele dim lamittitti, Yawe Nug da ehaniɗe, da padal ii memi. Ao, da eheɗ haknu uuen, ii hei, Nug ehaniɗa, nob ena meɗom daatte.

²² Aɗinu? Da Yawe oɗe dim lamidmi. Ao, da Kayak dahil dimettalom amu, da nau helom, amge da kobol eheɗ ii hemi.

²³ Laa amu, Yawenu ɗo oh am hanhan dahil neekkakppa daatteb. Ao, da nuhig ɗo dim lamidkkulnu iinab uumi.

²⁴ Anam amu, Kayaknu neekkakppa da oolppa kaliak laa ii daatte. Ao, da hipunin hepanu da dakka da hipuninppanu awaitten daattem.

²⁵ Da kobol genab tutukku ele dim lamittitti, Yawe Nug da nob ena meɗom daatte. Ao, da eheɗ hak uuen, ii hei, Yawe Nug amu antta, nob ena meɗom daatte.

²⁶ O Yawe, danab ag oo metta ii uuak kobol dim lamidtteb amu, na amu dilag, na oo metta ii uuak kobol dim lamidttem ag ippunadttem. Ao, danab ag oolagppa nahip neekkakppa, kaliak iitta ele daatteb amu, na amu dilag, na ootppa kaliak laa iitta daattem ag ippunadttem.

²⁷ Danab ag oppiak ele daatteb amu, na amu dilag, na am oppiak ele daattem ag ippuandttem. Ge, na anam hettem, amge na hipunin danab ah, ahilag kobol kaliak ele amu, na ag geɗadttem.

²⁸ Na danab ag akka ag onilag qeeg nette ele ehanatte, ag padal ii metteb. Ge, na anam hettem, amge na laa ag dada hena laa eɗittaknu dabmak aotteb amu, na heppe, ag nena qekkulagnu neekkadttem.

²⁹ O Yawe, na am dahil amahlak. Ao, Yawe Nug dahil gatatu he, amahlak daatte.

³⁰ O Yawe, nahip ehanittakppa da daup laa eɗadkkulnu elele. Ao, da Kayak dahilnu ehanittakppa, da aɗ okkai leten, ooppa nokkulnu elele.

³¹ Kayaknu amu, nuhig hak am, qa oppiaawak ele. Ao, Yawenu nai am enaib; hambuppuak, o kaliak nakok laa nuhig naippa ii daatte. Nug danab aun aɗi laa ag padal mak eɗitteb ena dayaknu abenppa daaglagnu nuhigppa uɗitteb amu, Nug ahilag guppiɗ daatte.

³² Yawe Nug anam daatte amunu, Nugib Kayak daatte. Kayak laa ii daatte. Ao, ihinig Kayak Nugib am kekeɗ nikkamanu ehanittak ihinig daatte. Laa nug amubia ii daatte.

³³ Kayak Nug ɠagattag meɗatte. Nug he, dahil ib am, qa oppiaawak daatte.

³⁴ Am doɗ dia laa nug na qekkunu elele iitta oitte, amubia Kayak Nug da ehaniɗeɗe oittem. Ao, ib qaukoppanu oikkulnu, Nug da ehaniɗe, da ii nein qettem.

³⁵ Nug da ippuniɗe, da eppelppa ban hekkulnu elele. Ao, Nug ɠagattag meɗe, da lat brasppa hak pimalkkulnu elele daattem.

³⁶ O Kayak, na guppiɗ aɗan, kekeɗ eɗadttem ele amu, na guppiɗ amu da meɗae, da ena daattem. Na dahil unuqittak nob me, danab ah ag da ɠagattag daattem aniɗtteb.

³⁷ Na da ippul babaitte, da aguppa oikkulnu elele. Ao, ib na bappaidme, ib amuppa da bael baag ii amemɗitte.

³⁸ Da kekeɗ dahil oɗoɗatti nauhppig. Ao, da laa ii uuadmi. Iitta. Da hei ukke, ag ohnab nena qeppig.

³⁹ Da ag huana oɗoɗatti, ag padal mena autna aoppig. Ag eɗun ahaglagnu elele iitta. Ao, ag nena qena, da bael waappa daappig.

⁴⁰ Na da dahil kekeɗ ele ban hekkunignu ɠagattag meɗame. Ao, na da ehaniɗe, da dahil kekeɗ eɗatti, ag da noolppa dup noppig.

⁴¹ Na hee, dahil kekeɗ ag da dimeɗan ooladna goppig. Ao, da laa ag dahilnu nau ninig ele dooppig amu, da ag hatti nauhppig.

⁴² Ag ehanattaknu eppig, amge auntai laa ag ehanatteb, padal makppa ii daamnanu laa ii dayom. Ao, ag Yawe ehanadkkunu unuqidppig, amge Nug ii ehanattom.

⁴³ Da oɗoɗatti, ag wanppa gappud bia daappig. Ge, da danab nug gappud tate, ib daugppa gotte, amubia da hei, ag nauhppig.

⁴⁴ O Yawe, danab da ele ban haknu ahaeg amu, na ehaniɗe, da ag eppelagppa ii daami. Ao, na ehaniɗe, da wan kuɗum dilag okkai daattem. Ge, danab ah da ii doyadmi ele amu, ag da waalppa daatteb.

⁴⁵ Wan laihnu danab ag beɗulkad aɗaeg ne, gumiɗna uɗitteb. Ao, danab ah amu ag da aɗi attem doon, laippun ag akka da oɗel dim lamidtteb.

⁴⁶ Wan laappan danab amu ag ɠagattag ii doon hetteb. Ao ag hahaɗnana, ban hekkulagnu aben ɠagattagppanu dimittim uɗitteb.

⁴⁷ Yawe Nug bau daatte! Nug am kekeɗ niɗamnanu ehanittak dahil daatte! Heppeg, danab ah ag Nug binag meig! Ao, Kayak, kekeɗ nikkamanu ehanittak ihinig daatte, Nug da padal ii mepanu ehanittak dahil daatte. Heppeg danab ah ag Nug binag meig!

⁴⁸ Kayak Nugib Nug he, laa ag dahilppa eheɗ heppig amu, ag amunu nob elele aotteb. Ao, Nug he, wan laappan danab ah ag da waalppa daatteb.

⁴⁹ Ge, Yawe Nug he, da dahil kekeɗ eppelagppa ii daattem. O Yawe, na hee, da kekeɗ eɗatten, ahilag ikki daattem. Ao, na danab ag laa guittak nau mauhnoak mettaknu tiilagppa daatte amu, na da ag eppelagppanu eɗun awiɗme.

⁵⁰ O Yawe, na anam hettem amunu, da na onin danab ah oh oolagppa humakkul. Ao, da na onin humakkulnu ahi edakkul.

⁵¹ Yawe Nug nuhig king ehanitte, nug nuhikkud kekeɗ eɗadtte. Ao, Nug laa nug king daakkunu goɗen gokkaɗakppa tituanom ele, Nug nuhignu oo mauhaknab dootte. Ge, Nug da, Dawit, amu da buɗulad dilagppa hanhanib anam hekku.” Dawit nug anam aum.